Tulai Boruok, Hieng Zawng Hin Aw !

Coronavirus (Covid-19) leiin khawvel hringmi nuoi tam nunphung a khailak el ni lovin, a chi-ai a. Mi tin el chu, inbikna nei lovin, thuhmun le intluktlang takin a mi nawt vel a; rethei le hausa inkar hnai trum tak, leilung chanchina Piellei Huop Intluktlangna (Universal Equality), ti thei a ni hiel awm ie!

Amiruokchu, rethei le hausa kar inang nawna chu, pakhatin fakfawm a zawng a, pakhat dangin a siekhawlsa a ring thei. Hrileng ruok chun a tu lem lem khawm zuk hrie hran chuong ta lo a nih.
Lungthulien
Khawtlang Inrelbawl Dan

Lientlangpui hi in 300 khuo rau ei ni ta leiin, roreltuhai ta ding khawma mi tin pawm zawng rorelna nei thei ni vawng kher naw nih. A pawimaw tak ruok chu, iengkimah thu-lai thre thiem hi roreltu thra nina a nih. 

Tulai hrileng kara ei khuo hmalaknahai a thren-a-zar puontieng a'nthawk hriet ding a um a. Dam nuom ei ni leiin, ei hriet ang ang ei thaw hih, thaw awm tak hrim a nih. A dam hi hang dam phawt phawt inla, "A dam bawkin hlaw an lak" ti a ni khah!

Ei lo ngaituo zawm ding:

  • 'Social Distancing' ei ti hih a huhoa um lo ding. Midang le insirpaw amanih, inhai taka um lo ding, tina a nih. Thrahnem ngaia khuo venghim dinga duty-hai khawm fimkhur a ngai hle. Hmu theilo hmelma hih, ei inchanna ki nawa dawng pal thei a nih. Midang le inbiek ding khawma hlam 2 vel bek KAR sie ding. 
  • Ei hri do hih inkaisawng theina tam tak hrila umhai kha ei hriet seng ring a um tah, hril nawn kher ta nawng ei tih. Chun, boruoka inleng (Airborne) khawm ni dinga ring a ni leiin, midang le inpawl rawn kha tum naw hram ding. 
  • Ramsuok, lo fe, le mamaw chakkhai zawng kha ienglai khawm khap naw hram ding a nih. Amiruokchu, sungkuo khata mi an ni naw chun, mi pakhat bak suok naw tum tlang inla.
  • Fe le Hung, ei khuo paltlang dinghai hi dang bur theina a um naw a. Kawtsuoa duty-haiin, khawsungah mi CHAWL pek naw hram ro aw, tiin hril tawl inla. Ei harsat vanglai taka lo insukharsa nawk sawng hi pumpel hram ding.
  • Ccpur, Aizawl, Fulertal le a dang danga mamaw phur ding/fe nuom an um chun, inthrangpui tlang a, chakkhai ei tlaksam nawna dingin thruoituhaiin hma an lak nuom a um.
  • Lientlangpui chu lirthei nei ei tam a. A khuo phek ei tram el ta chun, ruohmangna siem a, mi tin ei thrangtlang theina dingin.
  • Leilang le Chartemuol kawtsuoah bukte/in hei khaw thei inla. Chu chuh khawsung inenkawlna thu INFORMATION CENTRE, ei khuo lut/paltlang dinghai hriet ding le, damnaw ringhla an um huna khawm, tuol para inumtir el neka an lo sawl hadamna ding.

Tlangpa Khawsak Dan Ding

Tlangpa Khawsak Dan DingInkharkhip ei nei hi mihriem le mihriem insirpaw leia hri indarzau ding dangna hmangruo pakhat a nih. Ina intawm zing el chu, taksa hadam vieu sien khawm, fak le dawn zawng a ngai leiin, mani lohma tienga inbur zai rel vat hi ei damkhawsuokna dinga pawimaw pakhat ve niin a'n lang. 

Vawisun hin sawrkarin bufai a mi la pek thei khawm a ni thei. Hrileng a la fe pei chun mi pe zing thei naw nih. Dik tak chun, nunphung pangngaia ei khawsa lai khawmin sawrkar bufai hi insukkhawpna tham ei dawng nawh. Hieng ang hun khir karah hin, ei hmu thei ding hi a veitham hle. Mani lohma sengah, midang le insirpaw kher lovin sin hang pu thei inla nuom a um. Hieng tieng zawng hin thrang hang la inla:
  1. Chula bal, kawlkai, maibal, mai le a dang dang nei hai chun phurkhawm inla.
  2. Lo ei raw ta bawk a. Thlai tlung inhma thei ding ching vat vat.
  3. Tru (tu) kum dang neka lien deu met hang bawl phawt inla.
  4. Kum dang nekin lohma tieng tharsuok rawn dinga ei thaw nasa a pawimaw.

India ram ngirhmun

Lo SinthawtuCoronavirus inirsuok hma daia inthawk khan Indian economy hi inhnuoi tieng pan a ni tah. Hi hripui lei hin nasa takin khawvel pumpuiin tuor a ta. India tuorna khawm a belsa hle ding a nih. Hripui hi a'n kieng khawm a, ngai ei aw nawkna ding chun kum a'n vawi ngai ngei a tih. 

Fak ding ei nei thei zingna dingin, lo sin thaw a chatlak a thieng nawh; chu nek hmanin ei uor nawkzuol thrang a tih.

Bahra hlak a vang ngang el ta si. Ruotuoi um hmaa fak ding, mai but bek ring ding ei nei theina dingin, lo hnawm hmun awlah mai tu bit phawt el ding a nih.

Post a Comment

Please Select Embedded Mode To Show The Comment System.*

Previous Post Next Post