English ah Vowel panga (5) a um a. Chuonghai chu - A, E, I, O, U a nih. Hi baka hin a chang chang Y khawm hi vowel ri angin a um ve hlak bawk a. Vowel puopa anga ngai thei a nih.
Hmartawng ah Vowel 6 a um ve thung a. Chuonghai chu - A, AW, E, I, U, O a nih.
Hi vowel 6 lai hin O naw hi chu mania umzie nei, thumal dang thang loa kawk nei an nih.
Entirna Hang siem inla -
1. A : Naute A lawn. (' A' hin naute bawk kha a hrilfie nih)
2. AW : Fe naw raw aw...... ('Aw' hin indawnna ang a zuk siem a nih)
3. E : E he!! A va lien ta de. ('E' hin mak a ti thu a hril)
4. I : I ta ka bat. ('I' hin mihriem/neitu a kawk)
5. U : Ka U a nih. ('U' hi piengpui unau neka upa a nih)
Hi a chunga ei zuk hril ang hin, vowel 5 hai hin mani khatin umzie puitling an nei seng a. 'O' ruok hi chu a khatin a ngir ve thei nawh.
Vowel inkawp, pahni pathum hmang kawpna hi Hmartawngah a tam em em a. Chuonghai chu DIPTHONG (Vowel 2 inkawp) le TRIPTHONG (Vowel 3 inkawp) ei ti nih.
Entirna:
1. Ka chau let der ie..... * Hi taka hin vowel 2 inkawp hmun hniah ei hmu.
2. Thli a hrang hieu hieu.... * Vowel 3 inkawp hmun 2 ah ei hmu.
Hmartawnga vowel hi ri siemna kawngah pawimaw tak a nih. Tulai thangtharhaiin vowel ei lam kim ta ngai naw leiin, ei tawng lam rik dan hi an dik zo zat naw a. 'Hrietthiem' ti ding khawm 'Hritthiem' tiin ei lam a. Ei lam suol rawp pha chu a ziekna tieng khawm ei hung suksuol pei hlak a nih. Chuleiin, tawng ei hmang hin fel takin lam ri ding a nih. 'Parte par a 'CHUOI' tah' ti dingah CHUI ti hi ei hmang nasa tah. A pawimaw tak chu ei bauin lam indik sien la. Chu chun, a ziekna tieng khawm ei sukdik lem thei ding a nih. Ei bauin a lam indik naw tlat chun va ziek dik hi an tak ta hlak a. Vowel 2, 3 a umna hmunah hin fimkhur takin lam (pronounce) hlak ding a nih.
(Computer ah thluksei a um naw a. Chun VNT Times ei hmang khawma Internet ah ei sie pha tiemtuhaiin an lo nei seng naw a, spelling a buoi vawnga, symbol ramtin an lang hlak leiin thluksei ei hmang naw nih.)
Gospel Songate ::: Hmar Grammar
Tags
Hmar Grammar