Hmar Indigenous People's Forum

Barak Valley huom sunga Hmar nauhai ngirhmun ngaituotlang dingin September ni 13, 2019 khan Hmar Inpui Barak Valley Region chun Barak Valley joint organisation meeting a hung ko a. Chu dungzui chun Hmar hnam sunga pawl tum tum hieng - HSA, HNU, Headman Association hai chu Hmar Inpui advisers Pu Lalthomlien Hmar le Pu Lalringum Sanate hai uopna hnuoiah inrawnltangna khunkhan taka nei a nih.

Keikhawm HSA tieng a'nthawkin fielna ka dawng angin le, Hmar Inpui Adviser Pu Lalringum Sanate fielna dungzuiin ngaipawimaw takin ka hang thang ve nih.

Hi huna thurel laia pawimaw deu tak chu Hmar Indigenous People's Forum (HIPF) indin hi a nih.

HIPF Assam thuoitu dinga thlanghai chu:

Chairman - Dr. Vanlallien Pulamte

Secretary - Tv. Lalsiemthar Hmar

Members - Pu Lalzawmthang Hmar, Pu Lalthomlien Hmar, Pu Lalringum Sanate, Pu James Lalnunsang, Tv. Gospel Songate.

Hmasawp Pawimaw Thenkhat:

1. 'High-Level' Committee on Clause 6 of Assam Accord ah memorandum pek ding.

2. Union High School Harsatna sawrkara intlun le bawzui.

Hmar Indigenous People's Forum, Assam Meeting Hmasatak:

September ni 15 zan dar 8 khan Pu Lalringum Sanate inah meeting hmasatak nei niin, Pu Lalzawmthang Hmar ti naw chu member kan fe kim thei a. Memorandum ziek dan ding le inchuon ding thilhai kan hriltlang a, September ni 16 zana Guwahati pan dingin thu kan rel. Chun Hmar Inpui Barak Valley Region-ah pawisa sum hnina pek a ni angin Cheng 10000/- HIPF kutah an inhlan bawk.

September ni 16 zan dar 6:30 hin rail-in Silchar a'nthawk Guwahati AC Tier 3 ah chuongin kan pan. Pu Lalringum Sanate chu tul thutna a um leiin a hung thei ta naw a, rail stattion chen a motor-in a mi va thak a. Chuongchun mi 4 - Tv. Gospel Songate (kei), Dr. Vanlallien Pulamte, Tv. Lalsiemthar Hmar le Pu James Lalnunsang hai chu kan fe thei.

Ni Khat Sunga Hmalaknahai:

1. Zingkar dar 5:40 velin Guwahati Station kan tlung a. Cachar Hill Tribes Synod guest house-ah innghatin, kan insiem sawk sawk nghal a. Zing dar 7:34 in 'High-Level' Committee on Clause 6 of Assam Accord member a mi Sr. Advocate Nilay Dutta chu a chengna inah kan va hmu a. Memorandum copy pein, thu ramtin kan intlun bawk a, a tawp takah thla inlapuiin kan suoksan. Nilay Dutta hih Hmar le Dimasa buoi (2003) laia Hmarhai ukil a nih.

2. Assam Secretariat ah Education Minister kuomah Union High School harsatna intlun dingin zing dar 11:00 in ka fe a. Education Minister Siddhartha Bhattacharya hi a lo um naw leiin A Personal Assistant kuomah kimchang taka inltunin lekha kan pek a. Minister PA hin Secondary Education director Sri Phanindra Jidung, AES hmu dingin thurawn a mi lo pek bawk a. Theitawpa Minister mi lo hrilpui dingin kan ngen.

3. Assam Secretariat a'nthawkin High Level Committee on Clause 6 of Assam Accord Implementation of Assam Accord Department Officers Training Institute of A.H. & Veterinary Department Farm Gate, Khanapara, Guwahati - 781022 kan pan a, Hmar hnam a'nthawka thurawthai chu kan peklut.

4. Directorate of Secondary Education, Assam, Kahilipara, Guwahati-19 (Assam), District- Kamrup (M), PIN- 781019 zantieng dar 2 velin kan pan nawk a. Director Phanindra Jidung, AES hi fumfe takin kan inhmupui thei a. Ama hin Inspector of School, Cachar chu vawi tam biek tumin a call a, a tawpah biepaw theiin, hma lo la nghal dingin kan um lai ngei hin a zuk hril bawk.

Hi a chunga tarlanghai hi duthusamin kan sukpuitling thei a. Assam Accord chungchanga High Level Committee chairman B.K. Sharma chu a in kan zawng dawk el thei naw leiin, hunin a mi dai ta naw bawk leh CHT Guest House kan pan a. Zan dar 7 in Deep Travels bus-in Silchar kan hung pan nawk a. Zing dar 6 in Silchar kan tlung nawk.

Kawng iengkimah Pathien mi thuoina a'n lang a. Assam Accord committee chairman hmu naw inla khawm Member Nilay Dutta kan hmu thei a. Ama hi Hmar hnam ta dinga ngir thei dinga ei ngai a ni leiin pawimaw ei ti nih. Chun, Education Minister khawm nghak met chunzuk hmu thei dinga um chu a n'a. Amiruokchu 'One Day CM' ang deu khan, ni khat sunga thaw ding 'Action Plan' umsa kha bawpel kan nuom naw leiin a PA hmu kha huntawk ei ti hle nih; Minister nekin PA inhmin hi a lo pawimaw tho bawk leiin.

Hmar Inpui pawisa cheng 10000/- hmangin mi 4 kan zu ramsuok a. A hlawlting ei beisei hle nih. A fehai chu silaimu ang kan ni a, a mu'n a deng fuk theina ding chun silai kawm cheltu Hmar mipuihai ei pawimawna a'n sang hle.

Tlipna: Tuta tuma HIPF Assam hi Hmar pawl nghet ding ni naw sien khawm, hun tawite sunga dinga pawimaw bek bek el a nih. Thuoitu tieng khawm hi kan inthuruolna tha hle dingin ka ngai a. Lungril kawi le inkhik inkhalna um lo dinga fe hi ei nuom dan a nih. Mimal hming ding a ni naw a, ei dam leh Hmar hi ei dampui dinga ei dit a nih.

A hun takah Assam Secretariat pass mi lo lapektu Pu Hauva Biete chungah lawmum ei ti hle. Thingpui tuihnai tak a mi la hlui nawk nghal a! Assam rorelna insang kawttuolah khawm Hmarhai ei mikhuol bik nawh. Chun, Pi Gracy khawm kha Hmartawng kan hmang ri hrein a mi hung hnawtzui vang vang a. Palai fehai leh kan hei inhmelhrieta lawm a um hle. Hmun tin ram tinah ei um hi, Pathien le Hmar hnam ta dinga ei tangkai theina hi a lo tam hle nih, ti ei hriet nawn awn awn el a nih.

Thlalak thekhat hei khumkhawm ka tih: