 |
| Guwahati - Silchar 6/01/19 |
Khawvela hin iengkim ei ditin ei pawimaw a. Pasie taluoa phiengtrama thi tam tak an um laiin, hausa leia dittawk hmu tah ei hmu ngai reng reng nawh. Economist Adam Smith chun, "Human Wants Are Unlimited," tiin a lo hril a. Pei ding a um thrak nawh. Neinungna le duamna hi an intlawn manih aw ti dingin a um. Mihriem hieng zat laiah, hausa mi inphal tak tak khawm an bo chuong nawh; a tam lem nunphung a nih ei zuk thlur deu chuh.
Thuvarhai bung 9 chang 10 ah, "Lalpa tri chu varna bul a nih," ti ei hmu a. Pathien hin hausakna hi a nauhai ta dingin a lo ngaipawimaw tak hliek naw a. Ama trituhai a ditsakna chungchuong chu VARNA pek hi a nih. Mivar chu a hausa kher naw khawmin, a damsawt ding ti chu ring a um a. Hausakna hin hriselna a'n chawk thei nawh. Varna ruok chun damsawtna a sawm sa ve tlat a nih.
Chuleiin, Lalpa, thil iengkim siemtu hi tri tum tlat ding a nih. Nuomin nuom naw inla khawm, ei la thi ngei ding a nih.
 |
| Ka ruongzang atna be |
Ka Tuok Ve Tah: Kum 2018 kum laihawl vela inthawk khan ka ruongzangah bawk chite a um a. Doctor rawn nuomna lungril lien tak nei lang khawm, san dang dang leiin ka la sukkhawtlai (delay) a. Kum tawptieng chun a lo lien fut ta a. Ka delna a na met met ta bawk leh, exam ka zo char January 3rd, 2019 chun Dr. Chongrolien Chonzik ka rawn a. Chuongchun a lien ta leiin at (surgery) a ngai ding thu a mi hril a. At man ieng za'm a ngai ding ti ngawt chu nih lung inphu ruola a phu suok chu. Thi le dam hi a kar a hnai hle.
Ka ruongzanga bawk hi Sebaceous a ni a. Chuong taka trium lem chu ni naw sien khawm, sawt a seia ding chun natna lien lem suok thei a nih.
Natna hi a tir chun chite a n'a, a tawpah a dam thei ta naw pha cancer ei ti kha a hung ni'l ta hlak. A hun taka ka'n entir thei hi ka vangneina a n'a, Dr. Chongrolien-in iengkhawm enfie hran (test/exam) ngai lova a nina tak a zuk hriet el khawm kha vangneina chungchuong a ni tak zet. Chu bakah, ka'n tlin tawka at thei le sum hmang ding um kha Pathien hmangaina chu a nih. Nuoi khat chau khawm trul sien, in tuorhlum el ngai ding kha a ni tak meu a. Thil dangah sum hmang hekna ding um lovin, a nina takah kut a thlak a, chuongchun ngaithra zetin faa dawnin hringnun ka hei hmang nawk phawt chu nih.
Mihai tuok le tekhi chun kei ve hi hril tham a tling nawh. Amiruokchu, mani tawka hin buon ei nei seng a. A chin a lienah, ei tuok ta poah Pathien ropuina ei hmu chun Natna khawm Lawmna, Vangduoina khawm Malsawmna, Tuorna khawm Hlawkna hi a lo ni thei tak tak a nih.
Dam A Hlu: Vawi khat chu ka lam lawn laklaw lai tak nupui pakhatin auto kawtkhar a hung hawng thut a, auto kawtkhar ka baw chawr a. Ieng rak ti lovin ka lawn nawk el a. Kar khat hnungah ka vawnnem (kal zawn) lai duk chur chu ka hmu thut a. Ka tetna hlak hre lo, a thawtu ding awm ka ngaituo suok thei nawh; natna thra lo tak ni ngei dingin ringna ka nei a. Chuonga iengkhawm a thawtu um loa duk hlut el chu ngai a thra naw a, suongtuona a'n vak hla nuom hle. A tawpah ka hei inngai ngai chun, auto kawtkhar zum ka baw trum khan a lo sun ni dingin ka ring ta a. A'n dik tak tak a, a hung dam ve nawk el a.
Amiruokchu kha hun tawite sunga ka lung inrimzie le ka trawngtrai nasatzie kha aw.... Pathien kona dinga hmangruo ang elin ka trawngtrai ta nghik el kha a n'a. Ka ring ang kha ni sien lem chu ka va trawngtrai nasa awm deh!
Pasiet khawma hrisel chun taksa el chau ni lovin, lungril khawm a hadam. Nunkhawnuom (nun inhawi) ei ti hi mani nei ang anga lungawina a nih. Ei hrisel chun iengkim ei nei ti hi pawm thiem a lo ngai a nih. Vawksa man ding nei zinga fa thei lo dam, chini thlum dawn thei lo dam. Chini dawn ding nei naw inla khawm dawn thei zinga um kha a hlu a, chini thlum chu kohran sin pha ei dawn nawk el ding a nih.
Dam Sawng Ding Ei Um Nawh: Hang ngaituo inla, mani pa hai pu (i pu pa) hmu phak khawm ei vang hle awm. A umzie chu ei nauhai tuhai khawm ei hmu phak kher naw ding a nih. An leh, chuonghai chu khaw lai am an um a? ti zawna chu a hung suok a. An hringna a tawp a, pilah an kir a, an thlarau chu hremhmun le chawllawkna (paradise) ah a um (ei thuring angin).
A tam tieng kum 100 hi khawvelah ei hmang ding a n'a, a dang po hmangna ding hmun hi a nih ngaituo ngai ta chuh!
Tags
Thusep (Article)