Sikpui Ruoi (Silchar) 2018 Thlirvelna : Sikpui Ruoi Restricted Holiday in Assam

Assam sawrkar, General Administration Department in November 29, 2018 a Notification (No. GAG(A).81/2016/Pt-I/31) a'n suo dungzuiin, Assam ramah Sikpui Ruoi December ni 5 chu, Restricted Holiday in a mi puong pek der el ta a. Nasa taka hmalatu, Hmar Welfare Society, Guwahati hai, LAWM an um tak zet. 

Chun, Sectional Holiday dingin Karbi Anglong Autonomous Council chun 4th December 1991 kha a lo puong a. Kum 2 hnungah, Restricted Holiday dingin Karbi Anglong/District Council chun December ni 3, 1994 khan a lo puong ta bawk.


Vawisun Thlaphal ni 23, 2018 hin District Library Auditorium, Silchar hmunah a tum khatna dingin Silchar Hmar nauhaiin Sikpui Ruoi hlim le ditkhawplo takin an hmang zo.

Program hi zing dar 11 in tan niin. Sikpui Pa Pu S. K. Khobung-in Sikpui Lung hawngna le puonzar keipharna a nei. Hun khatna hi hun insersuon tieng deu niin, lawmlutna thucha, thuhriltawi Sikpui Pa le Dr. R. K. Singson a’nthawkin ngaithlak a ni a, Sikpui Lam inentirna HSA Silchar Branch a’nthawk a um bawk. Hla tieng tuolsung zaimi bakah khuol zaimi Lien Shakum, Je El Hmar le Lalsanglien Zote hai khawmin hla an sak ve bawk a nih.

Sikpui Ruoi Silchar

Lungphun Sikpui LungHnamthuom lukhum


Sikpui Ruoi Committee Silchar chun Hmar hlasakthiem Lalsanglien Zote chawimawina inhlanin, thuziek le sumfai cheng 10,000 chu Pu Lalringum Sanate le Dr. Lalzawmlien Hmar haiin committee aiawin an inhlan.

Hun khatna hi dar 1:30 in a tawp a. Chawl sung kamcherek nei niin, hun hnina chawhnung dar 2 a tan nawk a nih. Chawhnungah hin hla ruoi the niin, mipui an hlimtlang hle. Beisei lo takin Hmar hlasakthiem Nk. Lalparzo Sanate hmel a’n lang hlau a, mipui lawm a hlaw hle bawk.  Thuommawi le Kut Nunghak le Tlangval inelna chun hlutsak a hlaw hle bawk a. Kut Nunghak dingin Chawngthazo Keivawm, Kut Tlangval dingin Laltuoklien Hrangate hai thalai huongah thlang an nih. Hienghai baka hin naupang, nupui le papui pawl khawm thuommawi thlangna a um ve bawk a nih.
Silchar Sikpui Ruoi 
Zantieng dar 4:30 in hun ditkhawplo takin suktawp a ni a. Sikpui Ruoi vawksa hmepawk, arsa hmepawk le nga hme kiltlang a nih. Bu fa po hi mihriem 400 bawr vel an nih.

Sikpui Ruoi Committee chun tlawmngai insuoa thlaisuong dinga a fiel Muolhoi a’nthawka hunghai chungah lawmthu a hril tak meu a nih. Chu el bakah, hi hun a hlawtling theina dinga tha le zung, sum le pai sengtuhai po po chungah lawmthu a hril bawk.

Silchar hmuna Sikpui Ruoi programe hi All India Radio Silchar, Barak TV, Manipuri News, le chanchinbu dang danghaiin an hung kan nghe nghe bawk a nih (Virthli a dinga ka ziek a nih).

Sikpui Ruoi puonzarSikpui Ruoi Celebration Committee Chungchang

  1. Raltawnluoi Intovate - Chairman
  2. Lalringum Sanate - Vice Chairman
  3. Tv. Gospel Songate - Secretary
  4. Lalchawisang Khuolhring - Assistant secreatry
  5. Dr. Mary L Hrangchal - Finance cum Trasurer
  6. Tv. Nathanael Neingaite- Info. Secy.
Committee members hi mi 26 kan um a. Chuonghai baka chun Hmar Welfare Society Office Bearers in an mi thlawp bawk a nih. Pu Laldawnlien Tuolor chu a bik takin kan thlawppui nasa a. Kawng iengkimah ama'n a mi thangpui a nih. 

Hmar festivalKum 2018 December ni 9 laia Assam Panchayat election ding lei hin Sikpui Ruoi hin buoina neu neu a tuok a. Cachar Deputy Commissioner Dr. S Lakshmanan phalna lekha lak niin, Election tieng buoipuituhai kuomah November 23rd hi min ruok pek dingin ngenna siem a ni a. An mi phalpek bawk a nih. Hi kawnga hin Pu Ratan, DC Office Clerk, Pu Jonathan Vaiphei, ASLR le Pi Lalsiem, ADC Cachar hai chun theitawp mi suopuiin, Sikpui Ruoi program hi harsatna um loa hmang thei a nih.

Silchar Sikpui Ruoi 2018 a ding hin Silchar puotienga mi thawlawm hung pehai hming hang suklang kher ka tih:
  1. Pu Jonathan Vaiphei, ASLR
  2. Pu James A Songate, APS
  3. Pu George Lalngaisang Khozol, Sr. Plant Manager, IOCL Borkhola
  4. Pu Thangrelo Songate, Railway Dept., Badarpur
Khi a chungahai khin thawlawm an hung thaw ve a nih. Thawlawm hi cheng 5000, 3000, 1500, 1000, 500 le 300 haia thethawp a ni a. A hmingin keikhawmin cheng 1500 thawlawm ka pek ve bawk a nih. 

Silchar khawpuiah hin kum 2011 July thla khan ka um ve tan a. A um nghet pawl chu ka lo ni ve ta zing. Amiruokchu, inchukna lei chaua um ka ni a. Sikpui Ruoi, a vawi khatna ding nawk nghala Organising Secretary mawphurna an min hlan hi ka rin khawp el a. Ka sel hne chuong ta naw leiin 2018 march thla khan mawphurna ka lak tan tah a nih. 

Hmar FestivalHi Sikpui Ruoia hin sum hmang ding ruongam cheng 1.8 lakh kan siem a. A tawp chen hin 1.2 lakh vel kan dawlsuok thei a. Hmang bang hi cheng 13,000 lai zet a um. Hi sum hmang bang hi Hmar Students' Association, Silchar Branch-in hnamthuom, lam huna nuhmei lukhum, tawnlairanga siem chu 10 zet batin an lo lak a. H.S.A. President Tv. Peter Kungate'n a mi biekrawn angin, bata lo lak el a nih. Chuleiin, sum hmang bang um laia mi hi cheng 8000 chu Tawnlairang Lukhum man dingin HSA kutah kan inhlan a. A renga tumpek a nih.

Silchar Sikpui Ruoi 2018 in a ra suok chu Hnamthuom le Sikpui Lam thalaihaiin an hriet pha hi a nih. Chu bakah, inthuruolna le Hmar hnamthuom ngainatna a suksang hlein ka hriet.

Kum 2018 hin Silchar sungah Hmar nau mi 500 bawr zet kan um ve ta a. Vantlang inkhawm hmang khawm a'n hawi ve hle tah. Sawrkar thawktu hi mi 150 vel um anga ngai a nih. Thawktu tam lem chu Hmar Medium-a teacher, Bengali school-a posting-hai an nih.

Ka mimal takah, Sikpui Ruoi a vawi khatna tluong taka a phursuoktu laia ka thang hi ka lawm a. Sa ring tan ngeia vawksa hmepawk kan hme thei hi ka lawm bek bek bawk a nih. Vawk hi Tv. Lalsiemthar Hmar-in Hmarkhawliena mi a lo huol a. A puma inchawk niin, a sa khawm a'n hnik vieu. Vawksa bakah arsa hmepawk le nga zeu khawm siem a nih. Mi 400 bawr velin Sikpui Ruoi hi kan kil.
Kan lawm cheu

Gospel Thang Songate

Lungphun Sikpui Lung

Ziek Ni: 25th Nov. 2018
Ziektu: Gospel Songate






Post a Comment

Please Select Embedded Mode To Show The Comment System.*

Previous Post Next Post