Kum 2005 December ni 16 laia Hmar Students' Association buotsaiin Senvon khuoah Sikpui Ruoi phuisui taka hmang a ni tum khan, kei ngei khawm lam pawla thang ve kha ka na. Sikpui Ruoi hi ka lo sim ve nuol chu a'n tah. Pawl 7 kan chuk khan HSA Office Bearer sin ka chel ve der ta a. Information Secretary a'nthawk tanin, Branch Level-ah Secretary chen ka chel a. JHQ ah khawm hmun hni laiah a ro phurtuah thangin, ka hrilhmai lo ding chu Unit Adviser chen khawm ka lo chel ve ta bawk a nih. Ka hei hril duotna san tak chu, Hmar hnam nunphung hre tawkin ka lo inthai ve tah a nih.
Kum 2005 kuma Sikpui Ruoi ang kha tu hnungah um nawk thei a tim aw.... ka ti vawng vawng hlak. Tlangrama khawsa ve ta kha ei na, vawi khat thur hunlai ve chu ka ni ta bawk leh, a'n hawina kha hril ding a tam ngang el.
Kum tawp exam zo, thlasik zan dei kara a ruk taka ei dithai le Sikpui Lam inchuk kha, a lo inhawizie chu, khang ang boruok kha tawng nawk dingin ka mawi ta si nawh. Senvon Zopuitlangah Sikpui Lam chu HSA Unit Lungthulien-in kan inentir a. Pu Zaituokung khan pilbelin zupui a hung put a. Lam pawl thenkhat a mi hung indawntir khiet khiet a. Keikhawma Sikpui Zupui kha kam liem zarin ka zuk tlak ve ni kha! Ka mitthlaa la cham zing pakhat chu, Zopuitlang zawla pawi hrui inkhaithlaah khan Singer Laltuoklien a hei inpak kai a, mipui khan an en nuom khawp el a. Kan inri dur dur el a nih.
Kum 2007 khan kan vengbuk, Lungthulien Kawnpui chun Sikpui Ruoi kan hmang ve a. Kha tum khan Nk. Rotinkhawlin "Headmaster Babu" ti kha a sak a. Patling fu fu khawm tuolzawlah an biling zak el a nih. Chawltui hniengzu rui ni lovin, nunhlui tawna suilungleng an ni lem a. A hlimum el chau ni lovin vengbuk inthuruolna khawm a siem khawp el. Kha tum khawm khan lam pawl tawiawmtu ka ni ve a. Zan tin lam inchuk kha ka pel ngai nawh. "Chel el lang tlangin mi rel an tim" ti kha kan hei bei a. A lai lamnu le lampa hei inzap dawr dawr kha ka mitthlah a la fie ngang el. Tu tieng tieng hin a hla thuhai ka hrietfie zuol sau a, phut thar a, vanglai huna nghaknu lenghai le lan sailam a nih ka nap.
Khang hnunga khan Sikpui Ruoi hi hmun tum tuma hmang a ni hlak a. A hming indang naw sien khawm, ka lo hmang ve tahai khum thei dinga ka ngai naw leiin ka'n hnik ngai naw a ni tak. Mani hnam puola kut inthang nei ve ta chawk chu, hmang hun khawm a lo um ve nawk el chu nih.
Kum 2018 Sikpui Ruoi ruok hi chu Organising secretary chelin, ka'n zin chamna Silchar hmunah ka hmang hmel a. November ni 23 hin kum tam liem taa ka hmang kha, ka nawn nawk ding chau a nih. Ka hmang hmasaahhai khan lam pawla thang ka ni hlak a. Tuta tum ruok chu mawphurna lien tak, organising secretary chelin ka hmang ding a nih. Thil ka ihrietchieng em em chu, ni dang angin ka naupang ta naw nih. Dit ruk le ngaimel nei khawm a, inthup taka sai a ngai ta a. Rawlthar huna mawi kha tu hin chu a mawi chie ta naw vawng a. Mani ngaidana nun hmang vawng hi a rem kher ta naw a. Mani thu loa mi dang mitmei veng deka khawsak a ngai tah.
Sikpui Ruoi hi Winter Festival annawleh Harvest Festival tia hang inlet chawr el hi tuhai ti dan amanih "A Value Um Nawh" ka ti a. Ei chanchin sui ding a tam naw a. A ziek rawn rawn a hre tak anga ngai thei khawm a nih. Ka hei hril ve nuom ruok chu hi hih nih. Sikpui Ruoi hi thlasik le busik kut el a ni nawh a. Kum that kum, kum hrisel, malsawm dawng kuma hmang hlak, inthuruolna le inunauna rasuok a nih. Chuleiin, umzie nei naw taka thlasik kut (Winter Festival) ti ringawt el hi chu a pamhmai lulai deuin ka hriet.
Tags
Thusep (Article)