HSA Silchar Branch Freshers' Meet 2018

Kum 2011, June thlaa inthawkin Silchar hmunah lekha inchukin ka um tan ve a. Guru Charan College (GC College) ah kum 3 sung B.A. History ka thaw a. Assam University ah kum 2 sung M.A. History ka thaw nawk a. Chu zovah, kum 2017 khan Teachers' Training College, Silchar-ah B.ED kan chuk nawk a. Silchar hmuna ka um a'nthawk H.S.A. Freshers' Meet ka la thang hmaih nawh a. A ni pumhlum ka um thei naw khawm a, ka thei hun po bek ka hmang ve hlak. 

Kum 2014 khan Branch Secretary ka chel ve a. Term 2 sung zet chu hun ka lo hmang ve a. Hi hun sung hin thil tam tak kan lo buoipui ve a. Branch history-a ding khawma inchiktlak iemani zat a um. Chuonghai chuh : -

1. A tum khatna dingin thuoitu tharhai hmang ding Rs. 4000 lai kan hnutsie thei (Kum dang chu deficit deu zing a nih).

2. HSA Silchar Branch property hieng Hnampuon, Keyboard (Rs. 12000), le Sports material a kimin kan sie.

3. Calendar 2016 a vawi khatna dinga insuo a nih.

4. Damnaw thisen mamaw tam tak pek an nih. Kei ngei khawmin HSA ka thuoi sung hin tum 5 lai ka pek hman.

5. HSA GHQ meeting, inkhawmpui le thithawnaah thang kim vawng a nih. 

Hienghai baka hin a neu neu tam tak hmalakna a um. 

Kum 2018 HSA Silchar Branch Freshers' Meet hi kum 2 lai ka chawl hnung a lo ni ta a. Tlawm chun phurna khawm a re vieu tah. Silchar Branch sunga ding chun HSA hmalakna hi inpaktlak a tling a. Politics le sum le pai hlawkna ding um nawna a ni bawk a, thuoituhai khawm "sawl" naw chu hlaw ding a um nawh.

26th Freshers' Meet hi Tv. David Keivom chun Chief Guest niin a hung hmang a. Guest of Honours chu Dr. Samson Lalhnethang Amo le, Dr. Nathanael hai an nih.

Hla tiengpangah Jajai Singsit, Churachandpur-a inthawkin a hung a. Program a sukphuisui hle.

Hi huna hin ka thei ang angin video coverage ka thaw a. Ka YouTube Channel ah en theiin ka sie tah.