Harsatna tamtak karah kum 2013 thruoitlungin ei um a, kum bula inthawka Krista Chanchinthra neka Kohranhaiin inselna thu hmura fu ding ei nei hi thil vangduoi thlak tak chu a nih. Ei hnam sungah nghatna tieng tieng ngaidan inthrieng dingin pawl thubuoi a um a. Khawvel High Court le mitin lungrila relfel thei lo ding paitu ringtuhai hin, ni tlawmte liem taa A piengcham ei lawm huoi huoi remna Lalpa hi ei hmu threl deu tawl ni'n an lang. Mihriem pawmdan um nawna Van Supreme Court-a naw chu mitin hrietthiem dingin thuthlukna siem ring a um naw a, 'Hung El Ta La Lalpa Isu' tia khek rak rak nuom a um rum rum el. Lalpa kona sáng a, A rawngbawlna sin thawtuhai lai, pakhatin a dum a ti, a dum tih pui thei der lo ringtuhai hin fesuoka va hril nekin mani hringnunah, midang tawksa lovin rawngbawlna ding tamtak ei hmuhmai niin an lang. ' A thei phawt chun nangni tieng bék mi po po leh inremin um ro' ti hi chu biek In ei suokpui mang naw mani ding ti theiin a um. Iengpokhawm nisien, buoina ram ei la pél naw a, ei la famkim naw zie chu a hretu vawng ei nih. Amiruokchu, Krista zuitu ei ni hi khawvel mihai tiem theiin suklang inla chu buoina tamtak inkieng a tih. Midang en lovin Krista chu ei nuna hring mawl raw seh
.
Tláng titi tulaia ei hnam sunga ka lo hriet phak ve tlawmte a um a. Ka varna le hrietnain uichal var phak naw sienkhawm, vawkpui ek thring zawng bék a hen ta'm tiin ka taptebul ngaidan hang sep ve hrim hrim ka tih.
HNAM :
Hmar hnam hin Pathien thruoina a dawng nasa ém ém a, ngirsuokna ding tamtak kawng khawm a mi hawng pék ta khawm niin an lang. Ei ni sunga inrélbawl dan felhlel lei damin hun tamtak ei lo en liem ta a, hunthra dang ei hmu nawk a ni ngai chun kuongkuo tlat a hun tah. Zani laia ei hnam thruoituhaiin Political Talks an nei kha lawmum ka ti hle. Inrawntuona tlawm lei khawm hin midang ngaidan va tlawn harsa ei ti tawlin an lang. Hnam sipei huoisen tak takhai khawmin mani tranghma neka nasa nawkzuolin hma la hai sien, pawl tum tum um inla khawm dit thuhmun, tum thuhmun ei ni vawng angin lungril hmunkhat putin Hmar hnam pársuokna dingin thrang la tlang ei tiu. Thlarau ram taka khawm society ei ngir kawp thei chuong naw a. Chuleiin,Sawrkar ngaia helhai lem hi chu a ding reng angin um sien,thu an kal khawma tisa indo lo dingin trawngtraipui lem ei tiu. Mani nina suong taluo lovin, a tamlem thratpui thei ding thilhai dapin, ei ngaituona hmang a hun tah. Roreltuhai khawmin thruoitu ei nina suong lovin thruoitu mawphurna sútchieng lem hlak inla chu rorelna khawl inchu'n insekhek vet naw mei nih. Hmarram (Tipaimukh biel) lem hi chu Village Authority khuo khata pawl 2 umna a um nuol. Hiengang hih ei hnam zierang an leiin rém tieng pan naw ziezáng ding ei ni nawh.
¤Mani chau khawma ka fe thei ti nekin, midan zui thei ka ni'm ti hi in fie lem ding a nih.-Hubert Humphrey.
KOHRAN :
Tulai thil umzie, Hmarkhawlien le Delhi thuthang leng vel hin khawvel ram taka khawm inthuruol harsa ti naw ding ei lo ni naw hrim hrim. Pawl dang to rieu rieu awm takhai khawm sopui ding nei naw leia bau inchip mei mei ti pawl khawm um bawk ei tih. A pawimawtak chu Lalram hi ram letling a na, a hrathai tlawmna, a huoihai dawizep hlawna, thiem lem thiemnawna, mivar hrietna hnawlna a ni a. Khawvel ruola kei hém ve chi an nawh. Pawltin hin Biek In nei nal, ramdang pawisa khawn thei ti vel hi kohran inthranglienna angin ei ngai chu an ta a. Sandamna huonga laklut ruok chu kum khat sungin rawngbawltu ei nei zat khawm hi ei nei tak tak di'm. Chulaizing chun biekin thar bawl ruok chu ei inhman vieu tawl. A tu pawl khawm hin " ei vélah busík ding sáng tamtak an la um" ti'n sak dup dup hlak inla khawm, sîk sa inchu dar tieng hin ei thrang lak a na lem tawl a. Ei zui hi misuolhai zawng dinga hung nisien khawm rawngbawltu zu zawr ina lenglut pei an um mang nawh. Rawng ka bawl ei ti hi a sa lam tlák chauin ei thaw tawl el rawi mawh!!
Annawleh, mipuihai hin ei rawngbawltuhai ei enkawl dan hi a huntawk naw deu am a ni ding. Korea ramah chu rawngbawltuhai hlaw tamtak an péka mi inhnar lo dingin. An hun po po rawngbawlna'n an hmang hlak an ti chuh! Krista rawngbawltu vantlang boruok hap rawn taluo hi Kohranhaiin ei hlawkpui techiem nawh. An hun po po, tha le zung an inhlan theina dingin vawk chawma chawm lovin, sil le fen chenin enzui inla umzie a nei ring a um. Rawngbawlna ding kawt lien tak an hawng a, India rama kristienhai po hin China ram bituk inla khawm thang ei suona ding a hla taluo. Umhmuna in nawr nawr lovin an thawl le trul lemna tieng pan ei tiu. Ei nuom leh China, Pakistan, Bangladesh dam Biek In hau inel lem inla. Eini lai chu inrem takin thaw lem ei tiu.
¤ Mi po po leh inremna le inthiengna hnawt ro,chu inthiengna naw chun tukhawmin Lalpa hmu naw ni hai.-Heb 12:14
Hi a chunga ka mimal ngaidan ka phawrlang hi midang sukelna an naw a, ka tum bawk nawh. Ziektu neka hmu fie lem le hmathlir thra nei lem tamtak um in tih, ka ngaidan mi trawmpui dingin ka nawrlui naw che a, keimaa thil um ka hril chau lem a nih. Thubuoi ka dit naw a, Freedom of Speech and Expression changchawin ngampatakin ziekfung ka khalvir a nih.
Tags
Thusep (Article)