Thudik Hriet Ringawt A Huntawk Nawh

Thudik Hriet Ringawt A Huntawk Nawh 

 Vawi khat chu class test kan nei a. Mark 15 ah mark 9 an sângtakin a hmu a. Kei ve khawm chun, a bua mi țhanglo ka ngaituo chawp ka ziek hrep a; ruol danghai tiem dân ngaituo chun mark 8 ka hmu a, a thaw țha pawl chu ka ni ve dêr. Professor dang ni hai sien ka mark kha țha bîk vawr vawr naw nih. Mark 5, 6, 6.5, 7, 7.5 dâm an ni tawl. Professor chamber-ah mark kan va en a, "In lung a awi tâwk am?" a lo ti a. Diktaka hril chun, kei telul khawm a awi bîk nawh; ka nêka inhnuoihai tak tak an hmêl a hlim nawh. Amiruokchu, India rama ding khawma JNU suok ngat le, Indian Historian ropui ve tak Romila Thapar hnuoia Phd zo ngat, kum 26 lai inchûktirna tienga tawnhriet (experience) nei tah hin, mark pêk dân a hriet naw kan ring hlawl nawh. To țawkin kutin hmawr kan sik a, a bauva thu hung suok nawk ding chu kan inchân ta lem a.
 Student lai a țawngsuok kan um meu naw leiin, ama bawk chun:

 "Ka marksheet in en chun Second Class a Degree zo ka nih. Master khawm kan sâng chuong nawh, sienkhawm subject pakhatah O Grade (Outstanding) ka hmu ve tlat el! Jawaharlal Nehru University (JNU) ah Phd admission ka zu thaw dingin Professor Romila Thapar-in interview/viva voice a mi neipui a, O Grade (outstanding) i hmu bawka thiem i tih tiin a nuom nuom a min dawn a. Dawn thei ka nei dêr nawh. Kan zak a, ka mark hmu țhatna ka lawm hlak kha a mi sukmuolphotu takin an chang tah. Subject pakhat chaua O Grade ka lo hmu chu vangnei kan ti hle bawk. Professor Thapar chun, "iengtin am History subject ah O Grade i hmu thei?" tiin a min dawn hiel a. . . Mark tam tak ka pêk thei cheu, tukhawmin sawisel naw ni hai. Sienkhawm, lawmna tehlêma in hmakhuo (future life) suksiet pêk cheu kan lau. . . Chun, in dawnna (answer paper) ka en a, lekhabu ziektu (author) ziek ang thlapin in ziek fur tâwl a. Mark țha ka pêk ding a ni chun, nangni ni lovin a ziektu (author) a nih a hlâwkna (credit) hmutu ding. Lekha inchûkna kawnga hin thudik hriet el hi a huntâwk nawh. 
Ngaidân thar le thil âwium tak in siem thei chun miropui la nîng in tih. In answer paperah thil thar ka hmu nawh; mi lekhabu in byheart in ziek a ni ringawt. Hi hih pawl 2/3 hai khawmin an thei," tiin kan Professor chun a mi hril a. 
A ni tak, Albert Einstein, Karl Marx, Plato, Aristotle, Adam Smith le mi dang danghai khan tu ziek sa khawm an hril bîk nawh. An hun laia um thei lo ding anga mihai ngai chu țhiekin, ngaidan (theory) dang an hung siem pei lem a nih. Tulai khawvela khawm chu chu a thei zing. 

Indian History a vawi khat kim le puitlinga an ngai ta hnung, Irfan Habib chun hrildan hmasa po po an dik nawh tiin a sêl a. Ama pawm dân le hmu dân ngei a hung vawr suok chun, Historian ropui a hung ni ve dêr el. Mi hril sa tiem le hriet ringawt ni lovin, mi ngaidân țhiek thei hi a lo ropui lem a. Ringtu nuna khawm, a țha le indik hre ringawt lovin, zâwmtu le hmangtu ni hi a nih ropuina chu. 

Post a Comment

Please Select Embedded Mode To Show The Comment System.*

Previous Post Next Post