ADC Mangțha a țûl el awm! - By Gospel Songate

~ Gospel Songate

Memorandum of Settlement (MoS) July 27, 1994 a ziek ta chu sukpuitling tumin thi-le-thau ei sêng a. Lâkkir theilo hringna tam tak ei vuiliem ta bawk. Nu-Nau hmeithai fahran a siem a. Ei i-mithla Autonomous District Council hlak chu a sumrisang a lan lang thei mawl si nawh. Kum 22 lai ei lo suol ta hi  iengleia beisei um hlawl loa ei suolser el mani aw? Inbiekna khawm vawi tam a um tah; a ngai bawk inbiekna, ei thilphût le inmil hlawl lo chu kum 22 liem hnungah khawm hin ei la lawm hlut tho niin an lang. "Ra neilo ding inbiekna a nih" ti lang, a paina ei um dim? 

Mizoram Home Minister R Lalzirliana chun an (Mizoram sawrkar) dit dan puong a ni hnunga inbiekna țan a ni thu a hril a ( www.vanglaini.org/tualchhung/60080). "ADC kan sawi lo ang" an ti hnung khawma inbiekna ei la neipui ta fan el hi, ei ngirhmun a derthawng ta hle a ni awm de aw..... ti dingin a um a. Rorum le hnam huoisen nia ka ngai hlak Hmar hnam chu pilvut ei thekhum zing ta niin ka hmu a. Hmar politician inchawmkalang mizie khawm hin ei Hmar hnam chu awmnêm le buon dâwl zo lo ei hlaw mek a. Hi zeneresawna chénghai hin Hmar hnam mawina le inzaumna chu a vun inhlipin ei hak țawl a ni tak tah.

Kum 22 lai bu tak khûkin ei khûkpui a. Movement leiin ei ram, ram țawlin an chang zo tah. Hmasawnna ding nekin tlangval ruol chawmnain ei nei ro thilhai ei hmang nasa. Chau chu a ni nawh; eini vêk ei la hang insapél tawn zak zak a. Ei ropui naw nih. Mani chipui thizama silaimu thun ngam ei tam anghu hin ei movement a hrat dér si nawh. Huoi lona dinga huoi hnam hming sâla intlaw suolhai leiin mi hmangtlâk tam takin sarthi an chang a. Ei population tlawm ngaituoin ei inthat rawn ta hle nih. Tuhin Charter of Demand thar ei peklut nawk tah niin ei hriet a. A sung thu ka hriet nawh; amiruokchu kum 22 hnunga Charter of Demand siem hi mawng hlîmna el ni loin, demand ei nei tak tak naw nia ngai thei a nih.

"ADC kan sawi lo ang" an ti si chun insukbuoi loin inbiekna hi hnâwl ngam inla. Ei thil phût hi ei tum tak tak a nih ti inhriettir a țha. Kum 22 ei hlawsam ta a, ei ngirna ngaiah ei ngir zinga kum 22 dang a la fe khawma hnungtawl nêkin suong a um lem el dim?  Ningintel thawkhat sukfel nuom hrim hrim ei ni ta chun țhangthar kutah sie lem el inla. Vawisuna Hmarnauhaiin ei hlawsam khawmin, zingah Hmarnau la um an tih; chuonghai chun ropui la hung rél thei an tih. Hienga ei fe a ni chun ADC chu mangțha a țûl el awm tah. A iengpo khawm tlung ding nisien, fumfe takin inrawntlâng inla. Tuta ei kalsiema hin ei lung a awi tawk chie am? Lungvar nei le remhrie tak tak ei i-hnengde an um el thei a nih. Zawngsuokin ei kalsiem hi thlak a hun a, a mihriem khawm inthlak a hun tah. Țhangthar khawvela hin țhangtharhai hmun inruok pek thiem a hun vieu tah.

Hmar hnam sungah inremna, inthuruolna hi um el dingin an lang nawh. Ei kuthai thisen kai neng nung, ei i-that, a mi thattuhai le inrem rawng rawng intak a tih. Kohran rama ei pawl ințhe hripui lei khawmin nasa takin ei political lamtluong a sukbuoi a nih. Chuleiin Hmar hnam hi inremna le inthuruolna neia kal a pen ding chun thisen kai puonsilhai, kum 50 chungtienghai chawl a hun. Țhangțhar hnam hmangaihai hmun upahaiin ei dâl niin an lang tah.

Ei hril tum tak chu hi hi a nih. Tuta Mizoram sawrkar khawm nilo, official le inbiekna hi ieng chen am ring thei a ni ding? Ei thilphut a vêl a vêla ei la hril hin ADC chu hlamzuia thi dingin an lang ta a.  Hieng tieng nek hin unau țhenkhat hmalakna High Court tieng mit inlén hin damna an tlun lem dim? Pawl khatin ei inbiekpui a, pawl khatin Court-ah ei khing a. Țhenkhatin ei zui a, țhenkhat hi chena lungawi hmel em em a sawrkar suklungawi tum leh. Inthuruol deu inla chu hi nek hin chu ei ngirhmun a zie um ding bah!  Hmar hnam hi chu mutmaleng mut puom ang vawng ei nih; inbúm nekin indar awlsam ei tih.
.
"ADC kan remti lo/ADC kan sawi lo ang," an ti hnung hin iem hril ei ta? 
Demand pakhat ei nei, ADC!

(Views expressed are personal, doesn't intend to hurt any organization)

13th September, 2016: 11PM