Krismas Hi I Ta Dingin Iem A na? Christmas Sermon Tawi

"Tho la,naute le a nu thuoi la, Aigupta ramtieng tlán

hmang rawh." Matt 2:13

Mihriem nun hi hunbi inthlak ang peiin an her ve a. Naupang hun le puitling huna ei nuom zawng khawm an dang pei bawk. Naupanglai hun khan chu tlângsâmbuor a hung par tan hin chu ei lungril ieng dangin a hluo ta ngai nawh. Krismas huna thuomhnawthar nei bak kha thlakhla dang techiem ei nei naw a. Krismas chu sa fakna ang deua ngai pawl khawm ei bang ka ring chuong  nawh. Rawlthar le lenglaihai tading ruok chun umzie dang nei ngei a tih. Chuongang bawkin nu le pa beiseina le nuom dan khawm dang a tih. Hlim le tlai taka Remna Lal piengchampha chu hmang dingin mitin,a tar a zúr ei in ditsak ém em. Amiruokchu,ei hlimna khawm chanchintha leh inmawi sien nuom a um. Ei sungrilah Lal Isu ansieng ve theina ding chun mani ditdan le nuom dana kalchawi chu rem kher naw nih. Ei tisa nuom zawnghai hnawla, Krista insiengna tlaka hringnun ei khal a pawimaw hle. Mari anga Isu piengna tlákin i thienghlim am? Mitin nunah ansieng theia sienkhawm,khawvel hlimhlawp inchelrempui zingtu nunah insieng ngai naw nih. Kohran mipui,i thalai changpui hai ngei khawm zaia Lal Isu pieng an lawm laia khawvel mawina par lo tlân i tum a ni chun,chu chu sukpuitling kher naw rawh. Chu chu Isu pieng nasan an nawh. Lal Isu piengcham kum tam tak i hmang ta a,tuta tum bek chu Krismas hin i nun a tawk danglam ve na dingin i mihriem remruotna hnawlin inphahnuoi a hun ve tah. Incheina amanih,sil le fên ringawt buoipui lovin ansiengna tláwmtak thlir pumin hi hunpui dingah hin inbuotsai la,malsawmna tamtak dawng ngei i tih. Chupha chun i nunah Krismas hin umzie mihai tiem theiin nei a tih. Ei nunah Isu ansieng hnung khawm hin thaw ding tam tak

a la um. Herod chun naute that tumin a zawng zinga,Josef chu vantirkoin a nu le naute thuoia Aigupta rama tlan hmang dingin a hril a ni kha. Josef chun thuawi takin a fepuia naute chu a him ta a nih. Ringtu nuna hin umhmun sawn hi a pawimaw hle. Ei kawl le velah misuk buoi thei ding thil dam,naute insieng sukbohmang thei ding khawvel mawina,tisa chákna dam le ringtu nun suk chau thei ding thilhai chu maksan vat chu lampui thatak a nih. Vantirko hril anga Josef-in a zawm ang khan,ei nu le pa,thuoituhai thurawn chu sél lo a zawm chu ei ni a um Naute himna ding a nih. Thurawntha pawma tlawmna nun hraw hi inthangliena nasatak a nih. Krismas hi ei tadinga umzie nei ding chun a mithuoitu lal arasi hi chieng taka ei hriet a tul. Mivarhai khawm lal arasi anzui sung chu tluong takin an fe a. An hrietna hmanga, arasi an en naw char chun Herod in an luta,mitamtakin an thi pha a nih. Chuleichun,krismas phéna tum dang,beisei dang i nei chun chu chu hnawl ngam a ngai. Khawvel mawina le chákna hai hi bo ta naw nih. Chuleichun,ringtu ei ni si chun ei the ngam a tul tak zet. Ei hringnun thuoitu dingin ei sandamtu chu zui ei ta,chutaka inthawk fehmang loa ei um chu Krismas chun thil ropui tak min tlun pek a tih. Kumhlui inthla zan hin ei Sandamtu hung el ta sien, khawlam um i ta??

Khawvela ei um sung hin lawm kim ngai naw ni a,dittawk hmu ngai bawk nawng ei tih.

 Thalai dittak,i suongtuona anga thil a tlung naw khawmin Isu hmingin tuor ngam la,mal sawm mawl a che. Insung khawsakna ngaituo rêng rénga hun i hmang zo a ni chun hi hun tawite hi ra nei lovin inliem tir ngei i tih. Kum 2013 khi i hringnun tawpna ding ni ta sien, nikhat chau khawm chu Krista tadingin inpám awm vai leh. Chu hma khawm chu i tawpna

ni a ni thei,siemtu chau naw chun A hriet nawh. An hnu hma le an khél hma hin Lalsin thaw mawl mawl ei tiu. Krismas chu mihriemhai intlan dinga hung vanlalnau piengchampha a ni leiin lawm a phu a,sopui hum hum khawm a phu. Thlarau ram taka khawp taka chanchintha ruoi kíl dingin tiemtu po po ka ditsak cheu.

__________________________________________________________________________________________________________________________________________________________________
Kum 2012 khan Gospel Today Facebook group chun sermon tawi ziek inelna a buotsai a. A pakhatna lakpui.
2012, Silchar