INDIA SAWRKARTHARA HIN KRISTIENHAI EI MUONG AM?

 Ei hriet seng ta angin kum 2014 Lok Sabha inthlangpui result May ni 16th a suok chun Sawrkarna cheltu Indian National Congress, Kristienhaiin ei muongpui em em chu nasa takin peithlakin an um a, seat 68 lain kum 5 sung chu tlarhnung an chang ding an tah. Hienglai hin an khingpui, Hindu tanghma siel em em Baharatiya Janata Part(BJP) le an thawpui party danghai chu beisei baka invawrin a pumpuiah seat 338 lain, an ditdan le nuomdan fepui thei dinga hratna filawr hmuin kum 5 sung India ram rorelna khawl khalvir dingin India mipui chun an kutah thuneineina ei lovin hlan tah a nih.

            India ram hi sakhuo chitin umna, hnamtin le tawngtin zaikhata ei luongkhawmna a ni a. Sakhuo thila inkhuopna umlo Secular State (sakhuo zalenna) ti a nih. Amiruokchu, party thenkhat sakhuona ringsana ngir an um a, hienghai hin thuneina an hung chang pha chun hnam tlawm lem le sakhuo tenauhai chun hnengdena ei tuok ta hlak a nih. Abiktakin tuta tuma sawrkarna latu BJP hi Hindu sakhuoa innghat a ni angin state thenkhat BJP hratna hmunah rawva takin sakhuo dang lakah an che hlak a, hi lei hin minorities, abikin Kristienhaiin Central-a thuneina an chang hi namen lovin ei ti a nih.
           Kum 2002 khan Gujarat state-ah Muslim-hai suosamna rapthlak tak a tlung a, vawisunni chen hin ‘Gujarat Riot’ khan hril a hlaw a nih. Muslim tam tak a hmei a pa’n Hindu kulmut ruolin an raw hlum a, mi 1800 neka tamin an hringna an chan hman. Hi hunlai hin tuta ei Prime Minister Narendra Modi hi Chief Minister niin mitam takin  maw an inphur a, United State khawma Modi’n US a sir a khap pek hiel a, hi inzin khapna(visa ban) hi ni tlawmte liemtah a khan Prime Minister a  ni ding/nina leia sutpek a nih. Supreme Court chun Gujarat Riot chungchanga hin Modi chu thiem an changtir thung.

              Kum 2008 khan Kandhamal district,Odisha(Orissa) state-ah Kristienhai chun sukdudana le intuolthatna nasa tak an tuok a, mi 38 laiin suknawmnatna tuorin hringna an chan a, mi 50,000 zet chengna in neilovin an  hnawtsuok a ni kha! Kha thlitlunga khawm khan Kandhamal bieltu MLA chen inrawlin politician-hai inrawina hnuoiah an che ta hlak a nih.

Khi a chunga ei zuk tarlang khi a langsar zuol deu chau a ni a, hienghai naw khawm tam tak hril ding a um. Christian Persecution Watchdog Ministry-in a tarlang danin India hi Kristien sumnawmnatna hlak ram langsar 28-naah a thang phak a. International Christian Council (ICC) khawma tuta sawrkarthar hi India rama Kristienhai ta dingin a himnaw thu a hril bawk.

            Kristienhai suknawmnatna chungchanga zawna Modi’n a dawnnaa chun, “Kristienhaiin suknawmnat an tuok hrim hrim ka la hriet nawh,” tiin a dawn.  Dr. John Dayal, Secretary General, All India Christian Council (AICC) le National Integration Council(NIC), Govt. Of India-a member ni bawk chun Modi dawnna selin, “kum 1998 khan Gujarat-ah Christmas lai Biek In 25 lai suksiet a ni a, chiengtakin Modi hin Kristienhai chunga thiltlung hrie ngei a tih,” tiin a hril.  A hril peinaah chun Kandhamal, Orissa, Mangalore, Karnataka le hmun dang danga kum 2007 le 2008 laia thiltlung, Biek In 300 le Christian-hai chengna in 6,000 lai suksiea, Dalits le Christian mi 120 lai Hindu kulmuthai inrawinaa that an ni kha khawvel hriet a nih a tih. Indian Christian Council (ICC) Regional Manager, William Stark chun BJP keihruoi National Democratic Alliance hin Kristianhai a suktia, sakhuo zalenna (Freedom of Religion) khawm a derthawng pha hiel thu a hril ve. His Exc. Mgr. Stanley Roman, Kerala state-a Bishop chun minorities hieng Christian le a dang danghai hi India sukmawitu an ni angin constitution khawma  venghimna a pek a, sawrkartharin  a nuom a ninga India danpui kala a keilet el thei a ringnaw thu a hril.

            Madhya Pradesh Bishop His Exc. Mgr.Anthony Chirayath, Sagar-a um chun, “India hi ram hausa tak, tienlai hnamzie le sakhuona vawisun chen hin a la sawm pei a, hi hi tu sawrkar khawma an suksiet phallo a nih. Madhya Pradesh hi BJP sawrkarna a ni a, political leader-hai leh inlaichienna tha tak kan nei a, inhmelmakna a um naw a, inruol\hatna chau naw chu. Hindu naupang tam tak Catholic school an lut a, sawrkarthar hin election thila inchirthena (propaganda) theinghila ram tadinga sin ropui a thaw ka beiseiin ka ring nghet tlat,” tiin an state sawrkar a hrilmawi. His Exc.Mgr. Albert D’ Souza, Uttar Pradesh Archibishop le Indian Bishop Conference-a General Secy. ni bawk chun BJP sawrkar a hung pieng hi democracy fiena (test) ropui tak a ni thu hrilin, sawrkarthar hin India economy (fak le dawn thil)  siem\ha a, in\hanglienna (development) intluna Indian constitution a ngaihlut a ringthu a hril.

              Iengpo khawm nisien, BJP sawrkar kum 10 hnunga a hung ngir thei nawk hi thlirna dang danga inthawkin lawmtu an tam a; congress sawrkar hlemhletnain a bawm nasa em leiin a awm hrim naw chuong nawh. BJP hin lu lingin an innghatna Hindu-ah thahnem an lo ngai deu a ni khawma invet hlawnaw tawp an tih; an tobul theinghil el dingin Hindu hin 80.5% an hluo phak tlat si a. Eini Kristienhai hin 2.3% ei hluo ve tawk chau a, an tading chun vote bank politics (vote dit lei) ding khawma ei vei tham em si. Chuleichun, iengpo khawm tlung ding nisien hmasuon ngam dingin ringtuhai inpuocha lem inla hadam dingin ka ring. Ei Bible Thilthawhai 14:22 ei en chun, ‘‘rinumna tamtak tuorin Pathien ram ei lut ding a nih,’’ tiin thuoihruoihai an insuknghet a, ringnaa chun um zing dingin an infui a. Eini khawm tuor ding ei nizie hi hriechieng inla, pumpelna chau zawng lovin iengang harsatna thlipui khawma mi nuoi sien do ngam dingin insukhrat sau sau lem ding ei nih.

           Johan 15:18 chun, “khawvelin a theida cheu chun, a theida hma cheu khawmin kei a mi theida ti in hriet.’’ Chang 20-ah, “suok a pu nekin a ropui nawh.’’  Tulai ringtuhai hin nun zalen ei nei tum taluo lei hin suol le thlemnahai khawm do ding tinin ei tin ta naw niin an lang a, suknawmnatna lem hi chu ei tuor hma hmaa zamsie pawl ei tam hle ka ring. Khi a chunga ei tarlang ta ang khin suok a pu nekin a ropui lemna ding thu a um naw a, chuleichun, ei sandamtu le ei Pathien meu hmana a lo tuor ta leiin a hnungzuituhai chun a hniekhnung ei hraw ve hi a tul a, helna hrim umnaw nih.

           2 Timothe 3:12 ah, “Krista Isua Pathien ngaisaka um taphawt chun suknawmnatna tuor bawk an tih,’’ ti ei hmu. Tuorna hi ringtu nuna ding chun inthanglienna a ni a, nun hadam (harsatna tuoklo) zing zing ringtu chun fakding tha a hmu ngai naw a, mi dang lem chu a kep thei meu nawh. Hi hi ringna ram el chau nilovin khawvel nunphung pangngai reng a nih. Iengkawnga khawm rinumna a hmasa phawt naw chun an hawina a tlung maw vieu hlak.

             BJP sawrkar ei hrawn dinga hin Kristien el chau nilovin Hindu tilo chun titthawngna ei nei seng a, Kristien seng senga khawm a eng zawnga thlir pawl an um laiin namenlova hawphur pawl ei um bawk. Harsatna ei lampuia um hi hraw lova fetlang thei a ni naw a, mani kross seng puta rinum pawisa lovin hi khawvela ei cham sung chu chawl lova ei fe pei a ngai a nih. BJP sawrkarin sakhuo danga inlet khapna dan a hung zam a ni lem chun India rama chu missionary tirsuok intak ta hleng a tih. Amiruokchu, chuongang hun khir a lo tlung a ni khawma inthlada hrim a thieng naw, a hma neka huoisen hung ngai a ta, lu chan ngam naw chun missionary khawm tlin ta nawng an tih. Chu hun chu Krista tading pasaltha infiena ni lem a ta, buchi tha le thanaw thlier ni pei a tih. Tuta inthawk hin tawngtaina leh nasa taka ei lo infuituo naw chun hun harsa hung tlung thutin chi-ai pal hlau ei ta, Pathien ram lien naw hlau rawi a tih. Nasa nawkzuolin insukhuoisen ei tiu khai!

             Tirko Paul-in Korinth mihai kuomah, “suknawmnatin kan um a, nisienlakhawm maksanin kan um si nawh; lungzingin kan um a, nisienlakhawm beidawngin kan um si nawh,’’  tiha a lo hril kha hun hnuhnunga ringtuhai hin ei la tuok ve ding a ni a,Krista tuorna ei tuorpui vena a ni leiin zam hlek lovin fepei ie tiu. Ei Pathien chun mi maksan ngai naw nih, ei tuor a phal a, ei thi khawm a phal. Kristienhai hi suknawmnatna ei tuok po leh ei pung deu deu lem a nih ti hi hrezing ei tiu a, Pathien ram lienna dinga a tuortu ei lo ni chun lawm lem ei tiu.

      Tuor ding ei ni lei amanih, harsatna hung tlung ding leiin ti hrim hrim nawng ei tiu. Fiea ei um theina dinga Diebol hmalakna a nih (Thupuon 2:10). Krista dodaltu an hung suok mek a, la suok pei bawk an tih. Hi hi hun hnuhnung inchikna pakhat a nih (1Johan 2:18). Hun sawt ni ta naw nih, thahnem ngaitakin thawng ei tiu, ei tuora suknawmnat ei ni khawma lawm lem ding a nih, chuongchun a ropuina a hung inlang pha chun hlimtakin lawm thei ei tih.

            “Krista Isu sipai thatak angin rinum mi tuorpui rawh” (Timothe 2:3) tiha Paula’n  Timothe kawla a hril angin mitin ko ei ni a. Sipai tukhawm indona hmuna um tawk tawk an um ngai nawh, chuleiin sipai thatak angin rinumna le harsatnahai chu tuormuolsuo pei dingin ei hringnun insiemthar peiin, Pathien ralthuom famkim chu inbel ei tiu. Krista neitu ta dingin ti ding iengkhawm a um nawh, India sawrkarin a mi humhimnaw khawma ei inhumhimna lungpui Krista hi suonglem rawp ei tih. Hmun derthawnga umhaiin Pathien thlarau umpuina an chang seng theina dingin tuta inthawk hin tawngtainain lo san mawl mawl ei tiu khai.

Gospel Songate  Dated Silchar
 The 24th May 2014
Writer can be reached at gospelthangsongate23@gmail.com


         

Post a Comment

Please Select Embedded Mode To Show The Comment System.*

Previous Post Next Post