AW RINGTU, FIMKHUR RAWH
Tulai khawvel Kristienna hi a dal deu deu a, ‘Bible-in iengtin am a tih ti’ nekin ‘ieng thil am a tlung’
tihai hin ringtuhai nun a hluo inthuk ta hle a. Inkhawmna huna khawm Bible thu inchuktirna nekin
mani dit danin ‘sermon’ ei hril rawn lem ta vieu. ‘Sermon’ uor taka ei fepui hin ringtu kalchawina
nunah bahlana an tlun lem khawm niin an lang ta a. Bible hi a ni ang angin pawmin inchuktirna hi
fepui lem in la, hieng ang chau hi ni naw tawp ei tih. Thuhriltu pakhatin “Hmarhai hin ringumna ei
pawimaw” a tih a. Pakhat dangin “Hmarhai hin thuawina ei pawimaw” a tih nawk a. Hienghai hi hril
ngai lova ei pawimaw a nih ti ei hriet. Amiruokchu, Bible thu bulpui ‘Piengtharna/Sandamna’ hi
chang ni in la chu hieng thil dang danghai hi ei hung nei le chang pei ding thil a nih. A pawimaw
hmasa ‘A ram le A felna’ hi zawng hmasa lem ding a nih.
Hnamdang Kristien-hai hi a huou huou an baw ve dim chu ka hriet hran nawh. Eini, abikin Mizoram
Kristien-hai le Hmar ringtuhai hin ‘An ri ret ret’ zawng lovin ‘An ri dur dur’ ei zawng a ni deu tak.
Pathien ram khawm ni sien, kawng dang dangah a risie nazawng hi hnawt chi a ni nawh.
Pathien-nau pakhat: Kristien-hai ta dingin Pathien nau/Thlarau thienghlim nau bik pieng nawk ta
naw nih. Pa hun a tawp ta a, Naupa hun khawm; Ama ring taphawt chu Thlarauthienghlim nauhai ei
nih ta lem. Pathien naupa pieng ding thu hi MIKA 5:2, ISAI 7:14, MATTHAI 1:18-23, LUKA 1:26-31 le Bible chang danghaia hril a ni a, Bible zieksa lo chu awilo a him tak awm ie! (Krismas hma el khan Khawzawl (Mizoram) ah thlarau thienghlim nau a pieng an tih khah!)
Vai le sakhuo danghai anga a pieng danglam phawt Pathien/Thlarauthienghlim nau ei ti chun la
buoizo ngei ngei ei tih. Kawng tam takah Bible thu ei maksan zeu zeu hlak hi thilpawi tak a nih.
# Tulai kohranhai hin hieng ang thila inchuktirna hi ei nei ngai mang naw leiin tam tak chun ringna
indiklo hi an lo pawm hlak a nih. Ringna indiklo ti hin Isu inphat kher a kawk nawh.
## Rawngbawltu tam tak an hung suok a. A tehlem um ding khawm Bible-in a mi hrilpek sa vawng a
nih. Ringtuhai hin fie hlak ei tiu (1 Johan 4:1).
### Matthai Bung 24: 5, 23, 24 hai hin chieng em emin rawngbawltu tehlem um ding thu le thilmak
tam tak an thaw ding thu a hril a. Vawisuna ringtuhai hin chu a tehlem hmu dingin mitvarna ei la nei
naw a nih. Iengtik huna um dingin am ei ngai a ni ding chuh! Thil hrietna mak tak tak nei an ta,
damnaw chen khawm sukdam an tih. Thei nihai sien chu ei ringna chen khawm mi lapek an tih, ti
Bible-ah ei hmu. Ziek dang tam takah ‘Rawngbawltu tehlem’ hi ei hmu bawk.
####Korinth ziek-ah Tawng hrietlo chungchang chieng takin a hril a. Chusa khawm chun hlim changa tawng buoi ei la ching ta fan tho. Tawng hrietlo sing khat hril nekin hriet thei panga hril a tha lem (1Kor 14:19). Korinth thawn khatna Bung 14 chang 22 ah: Tawng hrietlo hi ringtuhai ta ding chun inchikna an naw a, awinawhai ta ding a ni lem.
(Midang va sawisel tumna a ni naw a, fimkhur dinga inchana a nih. Thilmak thaw thei phawt phawt a
tehlem ei ti naw a, a tehlem um ve ngei an tih, ei ti lem a nih)
Dated: May, 2015. Silchar
Tags
Thusep (Article)