HMAR HI MIZO A NI AM?

Hmarpuon

Zawnna mawlmang taka inlang, "Aw" le "Aw Ei" tiin dawn ta ang inla, a se chip theilo ding inzat nawk si ding a nih. Iengleia vawisunni chena hi zawna hi indawn nawn ngai rawp am a ni aw........  Vawisuna thangtharhai thiemnaw a ni naw a. Thanghluihai khawm ei intum chuong nawh; Unau hmel inhai lei chu ni takin an lang.  "Unau hmelhai" ka ti hin umzie inthuk tak a nei a. Mizo ti hi Hmarhaiin ei hrietchieng tawk a. Vawisuna Mizo-pa inti nuom mang ta lo pa ziektu khawm hin a Mizo nina an hmai bik nawh. Amiruokchu, iengleia Mizo inti hi meiling them ding ang ela rin am ka nih tah aw...... ti hi ka ngaituo nawn rawp.

Mizo Nina

A chieng chu ka chieng ve tawk a. Hnam inhnai Sinlung suok ei ti rawp rawp, Mizo hnuoia umkhawm hi thil tha le ditum tak a nih. Mizo ei nih an ti khawma selna ding ka nei nawh. History inchuktu le tiemtu ka ni angin theory thar siemin hang sel (criticise) ding a ka hmu nawh. Hi hih Hmar thangthar po po pawm dan a nih. Mizo-ah ei chieng tawk a. Mizo umzie chu hrilfie hran ei ngai nawh. Sinlung umna hril thei bar naw inla khawm, "Sinlung Suok" an ti chu unau deuin ei hang um ve el hlak. Hi hin Mizo-a umkhawm ei rin nawzie a hrilfie hle.

Mizo DODALNA

Tulai thangthar lungrilah "Mizo" inti nuomna a tlawm tah. Abikin, Mizoram puotienga Hmar nauhai lem hin chu Mizo hi thina tur hmua ei hmu a nih. Kei, Mizoram mi-le-sa ni tah khawm hin Mizo hang inti fai ret chu tlawm thlak ka ti deu.

A san bulpui, Mizo dodalna hung suokna chu Mizoram Hmar Politics invir leia Mizoram tlawmngaipawl le a sawrkar chenin Hmar nauhai a sawisak dan enin inti Mizo hi tlawmah ei lak tlat niin ka ngai a. Kei telul khawm Mizo-a dam nekin Hmar hlang hlaka thi chu ka nuom lem dai.

Mizo zawna (questions on Mizo) hi Hmar nauhaiin ei sopui tak a. Lai, Mara, Paite, a dang dang nekin Hmarhai hin ei hril ngun a. Titi suktamtu chu a ni zing. Mizoram-a Hmar politics hi felin, Hmarhai hin inhumhimna det-in-do tak nei thei inla. Mizoram sawrkar ditsakna changin hang um inla chu, Mizo hnuoia a neitu chan chang thiem ding ding chu ei nih.

Tu hria ding chun, Mizoram sawrkar le Mizoram mipuiin Hmar politics an en dan hi a la fahra em leiin, an angsunga Mizo puon sil hi ei la nuom hri nawh ti hi a tam lem pawm dan niin an lang.

Mizoram Hmarhai

Mizorama um hnam tinreng ta dingin Mizo inti chu damna a nih. A Hmar, Paite, Lai khawm ni sien. Chakma le Bru hai chen khawmin Mizo inti nuom an tih. A san chu, an umna hmunin inlakhran a remti tlat nawh. Ka hril umzie chu, Mizoram sungah Mizo do an tak a. Mizo dotu chu a hnuk an hil ding a ni ringawt.

Chu chan chu Mizoram Hmarhaiin an chang a. Mizo hi an dodal vieu thei nawh. Aizawl khawpui kum 4/5 lai ka kartawn ta a. HPC(D) in bomb a sukpuok chang ration lak khawm inthlahrung a um pha hlak. Hi lei hin Hmar hang hril vung rak nekin, Mizo hieua hang um khan in kawl le kienghai ta ding khawmin nel ei um thei. Hi hih ka hmu dan le tawnhriet a nih. 

Hnam hi invawi zing inla khawm Mizoram sungah ei um zing chun, inti Hmar hle an tak dingzie hi Mizoram sunga ka hun hmang tlawmte anthawkin ka sui thiem a. Mizoram puotieng mihaiin ei unau Mizorama umhai ei hang insit deu hlak hi a awm vieu tho a. An ngirhmun charah hang um ve nawk inla, Hmar inhnik hi an takzie ei hriet ring a um.

Kei le Ka Sunghai Ruok Chun

Joshua tawngbau takin, "kei le ka sunghai ruok chun Hmar inti pei kan tih" ti hi ka thupui a. Mizoram nina indiktak neiin ka um ve ta a. Ka hming le iengkim chu Hmar indiktakin ka vawng zing bawk. Hnam hming, mihriem hming ti hai hi keisawi mei mei chi ni lo, Hming Bik (Proper Noun) a nih. Buongpui chu America-ah khawm  Buongpui ni zing a tih. Mizoram a ni leia Buangpui el ding khawm a ni nawh. 

Chuleiin, ei hming le nina hi a sipel (spelling) thlak el ding a ni nawh. Gospelthang Songate  S/o Laltlaansang Songate ti ka ziek leiin Mizoram sawrkar thil le mimalah harsatna ka la tuok nawh. Tuok ni lang khawm ka hming le ka Hmar em leia ka tuok chu tuor kan huom a, ching fel kan zuom bawk.

Mizorama Chakma mipuihai hin Mizo hming an put ngai nawh. Iengleia Hmarhai hi Lusei nina lak ei inhawk tlat am a ni ding? Ei pup-indawng deu chu ka ti hlak. Sunga,  Chuoilo, Duoilo, hai Mizoram an hang lut chu an hming khawm a dang vawng nghal: Chhunga, Chuailoa, Duailoa, an ni lem tah. 

Insuikhawm zai rel ei tiu

Ei ti ti khawmin, Mizo hming sukliena Lusei a lien ding chun inunauna hi khawvel le a puotieng tlung ngai naw nih. "Mizo ve kan ni alawm" ti zinga Hmar hnam sukral an tum a ni chun, lungril taka Mizo inti ding hi Lusei hnam bak um naw nih. 

Mizo hnuoiah umkhawm inla, Hmar hnam khawm hi nek hin nghet sien. Hmartawng hi inchukna sikulahai subject/ department pakhat ni ve sien. Mumal taka Hmar hi a ngir a ni chun Mizo vek inti thei ei tih. 

ILP Boruok

July thla (2017) laia Vairengte boruok ILP kha ei hriet a. HSA thusuok le chanchinthar dang danga inthawk khan "Mizo" ti tawngkam a tam khawp el. Ei ngirna ding khawm ei hrietchieng naw a. Ei thuhrilhaai kha thangsan/innghatna mumal boin ei siem kha a pawi ngawt el. 

Thuoituhai le mimal thuinsuotu tieng sawiselna ni loin, Vairengte Police fe pela hma lak dan chu a um thei kha tie...... Ei bultanna ri le ei tawpna hi an hlat thei khawp el.

ILP hi Mizo le Zo lo thil a ni nawh. ILP hin Mizo a sukzalenna a um chuong nawh. Mizo inti derlo khawma Mizoram ei lutin, ei khawsa thei. Karbi Anglong (Assam) ah Mizo ni leiin khawsa naw ti nih. Indian constitution-in scheduled tribe hai zalenna aa mi pek angin ei fena tieng tieng ei um thei ti hi a ropui lem a. "Mizo vek" ti nek khan changchawi lem ding thil a nih. 

Chakma-hai hi Mizo an inti ngai hrim hrim nawh, Mizoram neitu indiktak chu a ni si hi!!!    

Mizo list chu Lalthanhawl suklawm thiem hiem zieklutna a nih. Unau Gangte-hai Mizo  list a an zieklut kha ei hriet. Gangte hnam zieklut thei si chun a dang khawm zieklut ding an la tam hi tie......    

Hmar hi Mizo inti thak naw inla khawm ngirsuok hun la um a tih.

Mizoram sawrkar leh ei lan khing mup mup zing lai le, hmatieng hunah lan khing pei ding khawm niin an lang. Hieng laia "Unau/Mizo" ei lo ti ang lawi si hi, ei buor butin ka hriet.   

Hmarhai hin Chakma, Mara, Lai hai entawn ei tiu. A biktakin Chakma hai hi an huoisen hle'n ka hriet.