Google hi ei khawvel enkawltu le kawng iengkima ei hmang a ni ta a. An thilsiem (products) po po hi thil tangkai le, a boa nun harsa tak ding vawng a nih. Internet vela khawsa ngai rak lohai chun "Google" hi iem a nih ti ei hriet taluo naw thei a. Tawi fel deuin hang hril zuoi ei tih.
Google hi company pakhat ve a ni a. Information Technology tienga lientak le kawng iengkima sulsutu a nih. Tulai hin an hotulien (CEO) chu India mi, Chennai-a pieng , tuta America-a um tah Sundar Pichai a nih. Kum 2004 khan Google Inc. a zawm tan a. A hlaw khawm a tlawm nawh, US$650 million (December 2015) zet a nih.
Google thilsiem (products) thekhat ei hriet langsarhai chu :
1. Google Search Engine - Internet ah thil i hang zawng chun, i zawngna hmun kha Google ni ngei a tih. Tu tieng tieng hin Yahoo le a dang dang Search Engine a um ve ta bawk a. Hienglai hin Google hi mitin hmang le hmelhriet a nih.
2. Google Map - Khawvel leilung po po hriet fai vawng theina khawp MAP nei chu Google a nih. Website le Mobile Application ah hmang thei a ni a. Google Map-a hmun le hmang register ta phawt chu awlsam takin ei zawng hmu zung zung thei a. A hlat dan le hun ei hmang ding chen khawm a sui (calculate) thei a nih.
3. G-Mail - Email a ding chun Yahoo le Google (gmail) hi ei hriet seng ring a um. A tangkaina le a hlawkna chu eini nekin sumdawngtu le milienhaiin an hriet. Chun, tulai anga mobile application a tam hma chun E-Mail hi file inthawnna pawimaw tak a ni hlak a. Vawisun chen khawmina a la ni zing tho a, a hlutna a la bo chuong nawh.
4. Youtube - Internet-ah video ei hmu theina lientak chu Youtube a nih. A man chawi ngailoa ei ennuom zawng en theina a ni a. Khawvela ding chun a bak a um chuong nawh.
Tiemtu po poin ei hriet seng ding 4 ei zuk hril a nih. Hienghai baka tam tak hril ding a um. Amiruokchu einihai sawr ding a tam rak naw a. Khi 4 ei suklanghai, khawvela tlanglawn (common) em em khawm hi Hmar lai chu fak hmuna khawpa hmangtangkai thei hi inchik khawp chau ei la nih. Tuta 4 ei suklanghai hi a bat bata hril ding chun hril seng el ding an naw a. Youtube chanchin le sum hmu theina tlawmte suklang ei tum ding a nih.
Ka ziek hmasak khan (Internet khawvela fakzawngna) thuhma ka ziek zuoi a. I la tiem naw chun lo hei tiem ve la. I hmangtangkai ta naw khawmin, hrietna belsana ding khawmina tha ve tho hmel a.
YouTube hi kum 2005, February ni 15 a indin a ni a. A siemtu chu PayPal employees lo ni hlak – Chad Hurley, Steve Chen, le Jawed Karim hai an nih. November 2006 khan Google chun a hung inchawk a. USD 1.65 Billion zetin an lak a nih.
Google hin thil manto tak takin an inchawk a. Youtube khawm hi chuong huna ding chun a la hlu te chiem nawh, amiruokchu an sukpung thei an ring leiin an lak pawp el hlak a nih. A siemtu mi 3 hai chun kum khat sung USD 1.65 billion an hlaw zai el a. Amiruokchu, Google-in vawisuna a sum laklut le tekhi chun an insir chang a um ve ngei ka ring. Chuong ang bawk chun Whatsapp khawm an lar tawm charin Facebook in an chawk a. Vawisun hin mobile po po Whatsapp hmang theina phawtah Whatsapp a um an tah. Tu hria ding chun a thlawnin ei la hmang a. Website ang deu thawa siem changkang pei a, sumdawngna hmunpui dinga buotsai mek niin an hril a. Naki chu, vawisuna ei Whatsapp hmang anthawk khawmin fak hmuna khawp a la tling ding a nih.
Ei thupuiah kir nawk inla, Google Account (gmail) nei chun Youtube Account ei nei a ni nghal a. Youtube hi website le Mobile Application a um a, video post thei ve ve a nih. Video el bakah thlalak khawm video editor va hmang kher loin, awlsam takin youtube anthawk hin video anga siem thei a nih. Chun, YouTube hi mihriem nunphung (social) a dingin a pawimaw a. Inchukna tieng le sumdawngna tieng khawm a tangkaizie chu "Kei mimawl hin ka suisuok zo nawh" ti ding a nih.
Youtube-a video sietuhai hin a thlawna an sie a ni naw a. An video anthawk hin Advertisement (Ads) an nei a. Sum hailutna takin an hmang a nih. Amiruokchu, YouTube video po po ni loin, a nachang hrie le hmangtangkaituhai a nih ei hril. Eini Hmar lai khawm YouTube anthawka pawisa lam thei ei um zeu zeu ta a. Information Technology (IT) tieng hieng Internet, Computer vel inchuktuhai ta ding lem chun side income nei awlsamna tak a nih. Chun, Photographer hai lem chun YouTube hi hmangtangkai tum ngei ngei ding a nih.
Iengtin Am Sum Chu ?
Google hin Adwords le Adsense a nei a. Adwords hi Advertisement thawna a ni a. Adsense hi Advertisement insuotuhai umna a nih.
Ei hril ta angin, Google le an thilsiem hi khawvel mi po po hmang a ni a. Google-a Advertisement thaw theina chu Adwords a nih. A umzie chu, i thilsiem chempui, dawlhro, hmarchatawl khawm ni sien, i pholang (advertise) nuom chun Google anthawk advertise i thaw thei a. Anvertisement insuo khawm Google anthawk bawkin thaw thei a nih.
Hi lai thupui a ding chun po hi ni phawt sien, a fie tawk nawh ti ka hriet zing a chu hun dangah a bung hrana la ziek lem dingin sie lem ei ta. Ei thupui bawka kir nawk lem ei tih.
Google Adsense ah Account i nei ta chun i YouTube Channel kha sum hmuna (monetization) i siem thei. I channel kha mi 10000 in an en phawt a ngai a. 10000 views i nei charin Adsense Account leh i thlungzawm ding tina a nih. Chu taka inthawk chun sum i lo lam ve thei ding a nih.
YouTube Advertisement - YouTube video i en chang, a video hung in-play hma OR an play laklaw lai OR a tawp tawmah ( Account neitu setting ah an nghat) video dang a hung inlang zau kha Advertisement chu a nih. En nuom la nuom naw la, i en nuom tak i en ding chun kha Advertise kha i en tho tho a ngai a. A ziek le i bula Advertisement khan a hril tum chu i hriet tho ding a nih. Chulei tak chun Advertisement thawtu ta ding khawmin a tha.
Sum hlaw zat - YouTube Ads umna video kha action (click/visit) um naw sien khawm, mi 1000 pei a entu an umnaah USD 1 (Rs. 50 approx.) pei i hlaw thei a. Video entuhai khan Ads khan an click or visit an thaw chun mi 25 anthawk khawmin USD 2/3 i hmu thei. Entirna dingin- Hmar hla video thar mawi tak le thiem tak chu i YouTube Channel anthawk (Copyright buoina umlo) in suo ta a. Chu video chu i monetized bawk a, kar khat sung mi 25,000 laiin an lo en (views) hman chun, i hlaw ding chu - USD 25 vel a ni ding a nih. Chu chu video pakhat chau a na, I channel ah video unlimited i sie thei a; chau chu a ni nawh, indik taka video um po chu i monetize thei vawng bawk a nih.
PSY GangnamStyle Video kha YouTube limit cross thei ngat a nih. 2,881,231,493 views a nei a. YouTube anthawka a hlaw ding hang sut sin rawh. (Monetize a ni
le ni naw chu ka hriet nawh).
Ei hril ta angin, nangkhawmin hieng thi hi i thaw thei ve nih. Internet le a keihnawi hi fak hmuna
Tags
Thusep (Article)