RENGKHAWTHIM INHRAM

By: Gospel Songate

Tlang lo neihai ta ding chun July-August tha hi thlai tlung vanglai tak a ni hlak a. Zantieng lovai hung inlawi hai chun thlai, hmeruo le naupang lawm ding an hung phur hlak a. Ina lo um naupanghai chu zantieng nisa a hung inher ta hin chu lovai tuokah an suok ta hlak. Phur rik taka hung nupuihai chu anni sawngtu ding naupang an hei hmu chun an lawm ve hle hlak a nih.

Vaimim feikawl (vaimim a kung puma sat) hi naupang kan ni lai chu kan lawm thei em em a. Mansapui bit hmeruo pai pumin lampuiah indo (threng threnga) kan la hei thaw malam hlak a. Naupang ni lai khan chu, lamsuk lamtung hi ei hrietfuk nawh; tu hlak hin a tung a um met chun a ngeinaw ang elin kai harsa ka ti tah.

Tu chena, thawklekhata mi suklungleng nghal theitu chu "Rengkhawthim inhram" hi a nih. Tlangrama um lai khan, zantieng an hung inhram hlak a. Rengkhawthim an inhram ta hin chu vawkbu pek lai khawm kan tlansan dai el hlak a, kan man phak hma khat, thingbul an bawna naah kan hnawkzui hlak.

Rengkhawthim hi thingbul, a kakpui hnuoitieng hin an fu tlangpui hlak a. An hramna tieng chu kan hei ngai vang vang a. A ri umna tieng chu kan pan a. Thingbul chu kan hei ve dek dek a, a panga RENGKHAWTHIM, a mawng mar dat data inhram chu kan hei hupde chawt a. Chu zo chun meisem par kan pawtdawk nawk a. Rengkhawthim mawngah chun kan sunbur a. Kan invuong tir nawk hlak a nih. Kan hmu nuom tak chu Rengkhawthimin meisem par a fen a, sen vawr vawra a vuongpui kha kan en nuom chu a nih.

Tlangram ngaina hi re tieng nekin thilhlui ei hmu chang hin a zuol hlak a. Mi'n "Zionah kir ei tiu" an ti a. kei chun "tlangramah kir ei tiu" ka ti nuom lem.   Khawpui changkang le inhawiah ka um phak naw lei amanih, kum 10 chuong town chungtieng city chenah ka um ta a chu, a'n hawina hi hang hril hlur ding ka hriet naw nih. Ka khuo sawt ni le lungleng niah Tlangram bawk hi duthusam kimna a ni hlak.