Hmar Students' Acssociation, Silchar Branch Silver Jubilee 2017

Silchar khawpui hi Hmarhai ta dingin hmun pawimaw pakhat a ni a. Tiena tlanga inthawk tah ei chakkhai lakna, ei bazaar hmunpui a nih. Vawisun chenin bazaar thil el ni loin, inchukna tieng le politics ah khawm ei hmun pawimaw a ni pei. Hmarhaaiin Silchar khawpui ei del tanna hi a sawt ta a. Ei lekha thiem hmasa tam tak khawm hi lai hmuna inchuk an um. Amiruokchu hnam hminga pawl ei nei tanna chu kum 1992 khaa niin, H.S.A. indin kum a nih. Tukum 2017 hi H.S.A. Silchar Branch chun kum 25 hmel a lo hmu ve tah.

Kei khawm Silchar hmunah B.A. a'nthawk kan chuk tan ve a. M.A. ka zo hnungin B.Ed ka la hei thaw nawk a. A kuma tiem chun 2011 anthawk vawisun chenin suok loin ka la um a. A um sawt pawla mi ka ni ve tah. Buoina dang a um naw chun kum 2019 chu ka chuongkai hmel a. Ka hun tam lem ka hmangna chu a lo ni der tah. Ka piengna khuoah pawl 10 chen ka'n chuk a. Chu hnung chu khawpui dang dangah ka um kuol ve nuk ta a. Titi nikhuoah Silchar chanchin hang hril ve a awl ta khawp el. 

H.S.A. Silchar Branch Silver Jubilee Souvenir editor dingin an mi hei ruot a. Thruoituhai ruotna pawmin ka hei bawzui a. A bu ngeia insuo thei a ni khawm hi lawm um ka tih. Ka mimal ta ding khawma experience pawimaw tak a nih. Tha sien tha naw sien, hlawtlingna ropui, ka mimal ta ding le H.S.A. Silchar Branch ta ding khawmin a nih.