Chanchinbu Poimawzie - By Lalthlamuong Keivom

June 29, 2017 suok Hmasawnna Thar (HT) a chun ‘Inhriettirna’ hieng hin a chuong a, inzak a umin ngaituo a suksei ngei!

Quote
“New Lambulane, Imphal Area sunga Hmasawnna Thar man chu kum khat lai zet pek a ni ta naw leiin tuta thla Chanchinbu man bata um hi hung pek a ninaw chun thla thar July, 2017 a inthawk chun New Lambulane Area a Hmasawnna Thar hung thawn zawm a ni tanaw ding a nih ti kan hung inhriettir cheu.

“Chanchinbu insuona lekhapuon man, a sut man le hmangruo dang dang man hai a to pei leiin a thlawnin kan hung thawn zawm thei ta nawna ding thuah hin lo hrethiem seng dingin ka hung ngen cheu.

 Hmarbiel le Churachandpur biel sunga Chanchinbu man pe tha lo hai khawmin bat lo pe diet diet seng dingin ka hung ngen bawk cheu. Thla ¾ bat hai chu pekzawm in lo ni tanaw khawmin sawisel thei ninaw nih.

Sd/- Editor & Publisher,
Hmasawnna Thar Daily”

Unquote

Khawpuia cheng le khawsak inhoi ka tina san laia pakhat chu zing tho chara newspaper tiem ding a um hi a nih. Ei hang inthrei ier ier a, mit êk ei nuoi tril trak trak a, kotkhar bula mi lo nghaktu newspaper ei va lak a, thingpui dawn malama ei tlang thlir thuok thuok amanih, an naw leh muong chara commode-ah inthrung a, inhnawm malama ei tiem nuomna lai bik ei hang tiem dam hi a va manhla de aw! Tiem manhla ka ti tak chu Editorial page a ni a, inhnawm malama ka tiem ngei ngei hlak a nih. Artikul thra le poimaw dang, ngaituona ril hmanga tiem chi chuh zal tawmin ka tiem a, mei sukthim zo, in hma siin ka ngaituo zom hlak. Taksain ni tina bu a mamaw angin, lungril le ngaituonain hrietna tui thar a mamaw zing. Taksa le thlarau mamaw inbuk tawka dongtu nun chu a siksawi ngai naw tlangpui. Mihriem hi bei chaua hring a ni si nawh.

Khaw lai hmuna khom fe inla, a ram mihai hmasawnzie le changkangzie inkhina thil dang dang laia pakhat chu an chanchinbu a nih. Mi ei la hriet ngai lo ei inhmupui a, ieng ang mi am a nih ti hriet theina pakhat chu chanchinbu a tiem le lekha a tiem nuom zawnga inthok a nih. Chanchinbu tiem hlak mi chun thil fe le hung a hriet leiin thil la hung tlung ding khom sei tak ngaituo nachang a hriet. Chanchinbu hi ni tina thu thara mi chawmtu le thil inlumlet dan mi hriltu, thu ziek dan thar min chuktir a, trong sukhmasawntu le humhaltu a nih. Mani tronga chanchinbu suok inchawtu le tiemtu chun ni tinin a trong hmasawnna le hringna dingin rong nasa takin a bawl bakah hnam dam khawsuokna dinga thapui thawtu a nih. Inchawa ngun taka tiemtu ei ni chun, cheng khat ei sengnaah a tlawm takah cheng za hŭ a hlawk mani ta dingin ei dong kǐr ngei ngei. Sikul thraa kai ang ei ni leiin, ei tiem nguk ang huin hrietna le varna ei dong a, khawvel lien lema khom tlangnêlin, nina poimaw chel thei ngirhmunah a mi’n ngirtir thei. Inchaw lo le tiem ngai der lo chu, ieng anga mi thra le fel khom ni sien, ransa le zăl tlangbung la thaw zing ang a nih.

India palai sin thawa kum sawmhni chuong a zawna ram danga ka um sung khan Saptrong newspaper le magazine thra tawpa ngaihai bakah Indian newspapers le magazines changkang china ngaihai hi Embassy-in kan lak bakah Manipur le Mizoram tienga chanchinbu le magazine poimawa ka ngaihai ka lak bok a. Ka penson hnung khomin Indian newspapers pathum bakah Churachandpur le Aizawl suok chanchinbu le magazine poimawhai chu ka lak zing a. Hmasawnna Thar hi computer-ah fie lemin ni tin ka tiem ve zing a nih. Ni tina Indian newspapers pathum ka lak hi arênga bel khawmin phek 100 chuong met a ni a, chuonghai chu zing thingpui dawn malama thlalak ena a tlangpui bi thuokna dingin minit 20-30 vel a ngai. Thu ziek poimaw, bi chieng tlaka ka ngaihai chu ka sinsie a, a kawpi file-a kol tlaka ka ngaihai po internet hmangin ka print suok a, hun awl remchangah tiemin ka bi hlak. Chuonga ni tina ei insawizoi chun ngaiah ei hung nei a, ei zăngin ei ngaituona a chakvak deu deu a; ei thaw naw chun ngaituona a hung mawl thau a, a ni têlin ei rik deu deu a, sawt naw teah che pei loin a bok phêk el a nih. Taksa thau nekin lungril thau a trium lem.

Mani tronga lekhabu, magazine, kaset, video le thil dang dang an siemhai inchawk ngei ngei hi ka pawlisi a ni leiin a kop a thuoa ka kol a tam. Chanchinbu amanih magazine dam hi a thei phot chun a man pek lawk ka nuom hlak a, a thi leia ka chan khom a tam rei tah. A man ka pek lawk laia sawt tak chu EFCI thla tin suok ‘Khawnvar’ a nih. Kum 1980-a Saudi Arabia-a ka um laia ka pek lawk khan kum 34 sung, kum 2014 chen a dai a, pe lawk sei tak nina ka hlaw nghe nghe niin ka hriet. Chu chen hiel ban tung thei dinga ka hringna le a magazine hringna humtu chu LALPA a nih. Chatlak loin hi magazine hi tu chen hin ka la lak ngat ngat a nih. Kan makpa Lalhmingliana Torrel buotsai ‘Sikni Eng’, Churachandpur-a ‘Zoram khawvel Daily’ ti hming put thei um sun kha a tira inthoka a kulcho chena la ngat ngat hlak ka ni a, iemani chena inthok khan a hmêl hmu ding a um ta naw a, inpâm a umin khuo a suksawt takzet a nih.

Hmun hrang hrangah Hmar trongin chanchinbu hi a hung suok hlak a, sawt naw teah thla det tir angin an tlum hmang nawk a. HSA chanchinbu insuo ‘Inchuklai Nun’ khom a suok le a tlak hun hriet hrang thei lo khopa hringinhroa sawt tak a um hnungin a rim a ra hriet ding um loin voi boin a bo daih a! Ei political party nei sun Hmar National Union (HNU), inthlang sung chaua an kei tho hlak le a hnunga hung suok, thisen tam tak cho suoktu HPC hlak khomin thu inrum tak tak a changa an insuo hlak ti naw chu chanchinbu nei tumna lungril khom tu chen hin an la put naw a hoi. Hnam pakhata inngai vê lĕm si nungchang ding chun a zîk bûl deuh a hoi.

Delhi tlanga HSA Joint Headquaters insuo ‘Delhi Thurawn’ (DT), kar tin suok, tri-lingual weekly ruok chu kum 1983-a inthok khan tu chen hin a la suok a, September hi kum 34 a suona ding a ni tah. A kawpi hlui ka kolhai po, kum 2000-2015 sunga mi chu bu 23-a chil khawmin 2016 khan binding kan inthawtir a, ram le hnam ta dinga ro hlu a tling. Kohran pawl hrang thla kip chanchinbu Kristien, Khawnvar, Kohran, Thuhriltu le a dang dang hai hi an nina sengah an poimaw hle laiin, pawl tawtawrawt, mani pawl seng inkhuokhirna hnuoia insuo an ni leiin an zalen naw a, a bila tho lo deuh vong an ni bok leiin, trăm hnĕma hmang thei thu le hla a tlawm. Ei trawlzie le inphănzie hmu theina darthlalang an nih. Chu chu thangtlawma la-in insiem thratnain hmang pha inla nuom a um ngot el.

Hmar tronga Manipura ni tin chanchinbu um sun chu ‘Hmasawnna Thar’ chauh hi a nih ti a hre naw ei um nawh. ‘Sellate Brothers’ haiin thi le thi, dam le dam ti-a sawl le kham dawn loa an mi keihringpek, kum tam tak khah cyclostyle-ah her a, khawl ha thar le thra deuh khom hmang zo loa inpher nuoia an lo sut suok, an ti naw zawng met thuziek a um leh ei ramhuoi ruolin silai piellung le nuom nuoma an lo vauh khawng, sienkhom hnam le trong damna le hring suokna dinga hmangruo poimaw a nizie hre zinga iengkim chăn huoma an lo sansuok a nih. Kum 2016-a inthoka Web Offset hmanga standard size-a lien lem le mawi lema sut a ni hnung lem chun mi tlawmngaihai ziek artikul tiem tlak tak tak tiem thei phanain ei hung nei a. Ei khawvel puo tienga thil tlunghai hriet phanaa ei hmang bakah chu khawvel leh chun damten a mi suizom a, ei hriet phak naw thilhai ei hung hriet a, ei tukver mi zauh lienpekin, ei thil thlir dan khom a zâiin ei hung thlak tran a, ni tina hrietna thar ei khawl khawm dan zirin ningkhong le nachang hrietna tieng khom ei hung inthrang pei a nih.

Henry Ward Beecher chun, “Chanchinbuhai hi vantlang mipui zirtirtuhai an nih (Newspapers are the schoolmasters of the common people- Proverbs from Plymouth Pulpit) a lo ti a, indik hleng a tih. A hmun le hun zirin vantlang laia thu puongtu dingin Pathienin hmangruo hrang hrang a hmang a. Zawlneihai a hmang hun a um a; ziek le tiem dan ei hung thiem hnung chun hmangruo dang thu le hla phuoktu le ziektuhai le thu the darna hmangruo hrang hrang, entirnan chanchinbu dam, lekhabu dam, radio le television dam, boruok zai hmanga indawrna internet dam le thil dang dang a hmang tah lem a nih. Kei khom thu ka hrilnaa pulpit ka hmang tak chu chanchinbu, lekhabu le internet pulpit a nih. Keivom Diary hin ni tin a tlangpuiin kantu 200 vel a dong hlak. Sellate Brothers hai hmanga ni tina Hmar khawvela ei pulpit lien tak chu Hmasawnna Thar a nih.

Chuonga ei sumphuka hrietna le varna bawm hung inthruttu Hmasawnna Thar chu a hlutzie hre loa a thlawna lo ban thlak tum ei um chun thil vangduoithlak tak ning a tih. Fanghma dawng faka a thlawna fak tumna lungril hi piengsuol thuomhnaw, kutdaw lungril putna a nih. Lunginsietna zar lieu lieua Pathienin a thlawna Isu Kristaa intlanna sin a hung hlen ti bâk hi taksa le thlarau khawvelah iengkhom a thlawn a um nawh. Inthlang laia a thlawna lo fa miel miela inngaihai khom hin a thlawna an fak amanih sawn an ta, kum nga sung an inzor man an tuor ngat ngat lem a nih. Suol hlaw suok chu, kong hrang hrangah, thina vong a nih.

Hi thil hi ei ngaituo hlak am? Chanchinbua mi thu ziek ei tiem tam tak hi kum tam inrim taka research an lo thaw tah, vantlang tiem thei dinga thrahnemngai taka an hung pek suok a nih. Chanchinbu lienhai chun ziektuhai thu ziek hi an inchawk hlak a. Kar tina Delhi Thurawna insuo dinga artikul ka ziekhai hi national newspapers hai inchawkna ‘rate’ in inchaw ding ni hai sien, kar tina ka hlaw chu a tlawm takah singthum vel ning a tih. Thu ziek ding dap khawm hi sin hautak a ni a, tiem tlaka rem khawm khom hi inpui bawl ang a nih. Artikul tin hi a hrana in bawl ang vong a nih. Sawl a um a, bawl zo thei loa ei pamtrŭl khom a tam. Ei nuom ang le dit dan anga a suok naw chang chuh, nghok puta ei namnul mei mei khom a um. Mi lekha ziek hi hang tiem inla, chuonga law ngaina hre loa an namnŭl el ni awm chu hmu ding a kat nok a nih. A chang ruok chun a sei taluo taa ei hriet leia ei fik bong thut a um bok. Hril ding a tam.

A thu kharna dinga ka hril nuom tak chu hi hi a nih: Inrim taka Hmasawnna Thar buoipuituhai le inphal taka vantlang tiem thei dinga thu ziek hung petuhai thrahnemngaina le tlawmngaina hi hre zingin, ram le hnam hmangaitua inngai taphot chun thla tin lak man pe lawk seng ding le lak nachang la hre lo mani khuo le venghai chu la dingin hrilhmu seng ei tiu khai! Chu chu a taka ram le hnam hmangaina a nih. Chun, nupa khoma hmang intrawm lo chi hanawtna, kekorte le Baibul ang bokin, chanchinbu khom tuolbawmhai leh inhaw ton loa in tina a hrana nei seng tum ding a nih. Lak man bat ti vêl hi ei diksawnari-a inthokin phûm hmang ei tiu. Veng hming suota bat ei inthrinna lekha dam hi ei nauhai, tuolbawmhai le chalrâng ruolin lo hre pal hlauh rawi an tih! A hnam puma hmingsietna a nih.

(July 1, 2017; Delhi)

Post a Comment

Please Select Embedded Mode To Show The Comment System.*

Previous Post Next Post