Mizoram Government le Hmar People’s Convention (Democratic) hai inbiekna chu a fe mek zing a. Riruong lo siem tah angin, July thlaa inbiekna nei nawk dinga ti chu Official Level ni ta loin, Political Level Talks dinga dawmsang tum (most likely to be elevated) niin Mizoram Home department senior official chun a tih.
Nikum August ni 10 anthawk khan vawi li (4 Rounds) inbiekna nei a ni ta a. Sawrkar tieng le helpawl tieng khawm a thei china inphahnuoiin, a tu tieng tieng khawmin boruok muongum tak an siem ve ve a. Hun sawt taka inthawka Hmarhai thil ngiet chu hmu a ni theina dingin pawl pahnihai hi inringzo takin an inbiek a. Helpawl tieng hai thil ngiet hi a reng a rama hmu fai vawng a ni naw khawmin, inbiekna hin inremna tluontling a ra suok ngei ring a nih.
Inbieknaah Sinlung Hills Development Council (SHDC) thuneina le a ruongam chu hril nasa tak a ni a. A hming khawm Sinlung Hills Council (SHC) tia thlak ni dinga ring a nih. State Finance department chun HPC(D) mi-le-sahai sawmdawlna ding le enkawlna ding khawm a sukfel tah nia hril a ni bawk a. Inbiek nawk hunah thil tam lem fel ta dinga ngai a nih.
HPC, tuta HPC(D) ni ta hin kum 1994 a inthawk khan SHDC pawm loin Autonomous Council an lo ngen tan a. Hringna tam tak sawrkar tieng le helpawl tieng khawm an lo chan tah. Inbiekna hin inremna pumhlum a siem chun a tu tieng tieng ta ding khawmin hadamna ni ngei a tih.
AIZAWL, June 26, 2017
~Gospel Songate
Tags
Hmar Diary