Sikpui Ruoi 2019 - Ngaibanramthar

Ditsakna insang tak changin, Sikpui Ruoi 2019 hmangnaah Functional President (Inkhawm Uoptu) dingin fiel ka hei ni ve hlau a. Ngaibanramthar HYA President Pu Rokhumlien Hmar le Tv. Lalrohuol haiin ka in ngeiah an mi hung fiel tlut tlut leiin, hniel theilo ngirhmunah ka um a. Ka mimal inhawk lei ni tah lovin, a tulna le a pawimawna leiin ka baua inthawk "AW" ti der lovin ka thang ve chu a lo ni der el tah. Ka ina an hung hma hin telephone hmangin an mung biek ve a, ka lo hnar ti ti a. Amiruokchu, tulaia an khuo'n harsatna tam tak a hmasuon mek chu sutkieng dingin, Sikpui Ruoi, phuisui taka lawm a, program siem hi thaw makmaw a nih a. Hi program hi hmang tangkai an tum nasa hle a nih.

Functional President ngirhmun hi program puitlingna dinga pawimaw pakhat a nih, ti ka hriet a. Tlangval puonthuo khailai chun sum le puon tieng pawsi ka lak thei naw ding ka hrietchieng hle bawk a. Ka thei ang angin thil tulhai buoipuiin hun ka hmang a. Ka thaw ve tlawm hle sien khawm, Kut hlawtling taka hmang thei a ni hih ka lawm em em el a nih.

Kum 2015 khan Ngaibanramthar khuoah hin Hmar Martyrs Day ka lo hmang ve ta a. Kha hun lai kha famtah Malsawmkim Hrangchal boruok sosang lai a ni bawk leiin, Hmar Martyrs Day ei lak ursun tum tak  a nih. Ka thuhrilnaah hnukul rakin ka tawng a, Malsawmkima ka ngaisang lei le, ka'n pam em leiin. A hnungah Malsawmkimin silai a tlansuokpuihai po an hei thakkir khan chu, Hmar ka ni ka'n sir rum rum el.

Ngaibânramthar khuo hi Dimasa le Hmar buoi kum 2003 zova Hmar khuo 5 lai zet  intélkhâwma hluo lum a ni a. Khâ buoi hun lai khan Hmarhai ta dinga insasengna hmun pawimaw a nih.

In 50 bâwr chengna Ngaibânramthar khuo hi Udharbond Block, Cachar sunga um niin, an fâkzawngna tak chu tlânglo nei le thing ât a nih. Hienga ram ra suok thing le ruohai zawra khawsakna an innghat zing lai hin, Assam sawrkar chun ram (forest) a hung humhal nasa deu deu ta a, fakzawngna tieng harsatna nasa tak an tuok mék zing a nih.

A tum khatna dingin Sikpui Ruoi 2019 chu ropui taka lawm dingin hun iemani chena inthawk khan HYA Ngaibânramthar Unit chun hma a lak a. Thing dâm âtin tangka sum mamawhai an lamsuok a. Hieng lai zing hin, forest department chun an thingâthai khawm an man pék nawk leiin harsatna namen lo an tuok ta pei a nih. 

Sikpui Ruoi a vawi khatna chu hmang ngei ni sien, sawrkar tieng milien koa harsatna chi hrang hranghai chu sukkieng dingin HYA chun thu a sukthluk tah a. Chuong ang chun Assam sawrkar ipawm restricted holiday December ni 5 chu Ngaibânramthar-ah ropui taka hmang a nih.

Sûn huna hin Shri Sunnydeo Choudhury, IFS, Divisional Forest Officer (DFO), Cachar chu khuollien niin, forest department a'nthawkin Ranger le official iemani zat motor  2 zet an thang bawk a nih. Nk. Elizabeth Singson, Advocate chu Guest of Honour niin, Tv. Lalsiemthar Hmar, Vice President, HSA BV JHQ le Tv. Gospel Songate chu Inkhâwm Uoptua (Functional President) thangin, sûn prawkram phuisui taka hmang a nih.

Chief Guest kuoma hin ziek ngeiin HNU Assam hmingin Ngaibânramthar khawtlang harsatna intlun a ni a. Sawrkarin rama thing lâk a khap si chun, fakzawngna dang ngaituo dinga ngen a ni a. Hi thila ding hin Hmar hnam thuoituhai chun sawrkar hmalakna tawiawm an inhuom thu hril a ni bawk.

Chief Guest dinga fiel a ni lai khan DFO hin, sawrkarin scheme a siem thu palaihai kuomah a lo hril ta hrim a nih.

Chief Guest chun a thu hrilnaah, tlangmihai fakzawngna chu ram ni sien khawm, ram chereu el thei ding ngirhmuna a um tah leiin venghim a ngai a. Ngaibânramthar mipuihai fakzawngna ding chu sawrkarin a ngaituopek zing a. Tuta kar sûng amanih, an hmatieng hnam thuoituhai forest department-in meeting neipui dingin a hung ko ding thu a hril a. Chun, hieng ang tlangmi hnam zierang suklangna festival hi, khuolzinmihai hîpna ding khawma a that thu le, sawrkar scheme hnuoia thaw thei ding a ni thu a hril. 

Sikpui Pa Dr. Vanlallien Pulamte, President HNU Assam chu sûn hunah a thang hman naw leiin, Functional President Tv. Lalsiemthar Hmar-in DFO kuomah lekha a pék a. Thu pawimaw dang dang sap sain, Ngaibânramthar mipuihai bu ngheiin ni khat khawm an um thei si naw leiin, fakzawngna ding sawrkarin a siempek hma po chu, rama thing an lo ât nawk phawt el ding a nih, tiin a hril a, DFO khawmin dawn ngaina a hriet naw leiin an nui el ringawt a, chu phing chun mipuiin kut an ben dur dur, an lawm hle.

Guest of Honour Nk. Elizabeth Singson chun inchûkna pawimaw thu le, forest department le kara hmalaknaah theitawpa bawzui tulhai bawzuipui an huom thu a hril. Udharbond forest Ranger khawm thuhrilna hun pék a ni bawk. 

Mikhuolhai hin Hmar hnam nunphung suklanga umhai chu an hmu nuomin, an mit a tlai hle bawk. Zantieng a bîk taka buotsai fak le dâwn kîlpui an ni bawk. Hi huna hin HYA thingât phurtu motor 2 mana umhai khawm an insuo ding thu forest department hai hin an hril bawk.

Sikpui Ruoi tobul le tulai khawtlang nuna a pawimawna Tv. Gospel Songate, Functional President a'nthawk, Chief Guest team le mipuihai hriet dingin ngaithlak a ni a. Sikpui lâm chi hrang hrang inentir a ni bawk.

Zan huna hin Sikpui Pa Dr. Vanlallien Pulamte, Functional Presidents le tuolsûng tienga inthawk thuhril ngaithlak niin, fiemthu, hla le lâm khawm a tla tha hle.

Sikpui Pa hin politics le sakhuona a'n kal naw thu le, hnam politics mi tinin inhnik a pawimawzie uor takin a hril a. Cachar phaia tulaia Hmar hnam hmalaknahai a hrillang bawk.

Khuol rama inthawka hung Tv. Vanlaljona chun ama hlaphuok "Hmarnau zaléng ruolhai" ti hla chun mipui a'n awi a. Vél 10 lai sak nawnin, pi le puhai lo thaw dân angin, kut inchela lâm dup dupin, Sikpui Inthang chu vangkuo nâwta lâm thaiin, inngai tak pumin  tumtiek a nih.

Sikpui Ruoi lawmnain zantieng arsa sizo hmepawk khawp taka kiltlang a nih.

(Virthli-ah News item angin insuo a ni bawk)