Saisen nun ka hang dawn a, lungrila hlui thei lo tam tak a um. Sikul chawl changa vadunga kan ramtruon ve nihai dam. Inrinni changa hmeruo zawnga ram kan suok hunhai dam kha hun ngaium a'n chang el chu a'n tah. Tu ruok hin chu khawpui ri le sa mur mur ri fe khel a'n tak ta ngang el.
"Ka thla, chu tlangah chun vuongin va leng la,
Ruoltharhai tuolchaina saw va thlir ta,
An lai cheng ve ka nap ti hrilin;
Ka umkhawsawt thu mi va'n fak ta"
ti a, rauthla bek hang tir ka nuom vawng vawng el hlak. Tlanglakte ka ni lai hun kha, Joshua'n, "Nisa, Gibeon chungah ngir zing rawh. Nang khawm, thlapa, Aijalon ruoma hin um zing rawh," a ti anga ko ka nuom. Sienkhawm, hun le nihai chu tui luong angin an fe pei a. Damlai lamtluong chu hraw suokin, thina tuifinriet chu ei la lut ngei ding a ni si a.
Pathien malsawmna zar lieu lieuin May 24, 2019 hin kum 28 (DoB: 24/05/1991) ka lo kai ve tah a. Mihriem nun hi hrechieng ka'n ti ve leiin, nun hlutzie ka sut ngun a. Ka hun hmang mek hih ka ngaipawimaw vieu. Ka pa pu ka hmu phak naw a, ka pa pa khawm ka hmu phak chuong nawh. A umzie chu "An liem pei, an fe pei" ti kha a'n dik a nih. Kei khawm hriselna/hratna leiin kum 80 chu dam ve lang khawm, kum hi chenah chi ka la thla naw a, tumawng ka ben hman ding am hriet a'n ta nawh.
Piengchampha hi ka chin a tuoia inthawk kan lawm ngai naw a. Ruoi threa lawmna siem kha sungkuo neinung deuhai chanvo anga ngaina ka nei hlak. Pasiet chun lawm thiem a'n tak a, bengvar le hawihawm hlaw khawm a'n tak an ti hi thudik a nih. Chun, sum le puon lo nei tereng inlang khawm sengso taluoa lawm chu ka nuom hran naw a, a mi thruoitu Pathien kuoma lawmthu hril hi thaw chi lemin ka hriet.
Kum 25 ka kai ve a'nthawk khan ka khawthlir hi a dang zai ta a. Thilpeka rawngbawl, midang thrangpui, luongsuok, tihai hi ka ngaipawimaw tah. Rethei inla khawm luongsuok theina kawng khat bek chu Pathienin mi peng a tih ti ka ring nghet bur bawk. Chun, receipt cut kher a manih, a hretu umna chaua thilpek le rawngbawl hi ka ngaisang naw a, ka hel tum hram hram. Inrelbawlna felfai lemna dingin receipt a lo pawimaw vieu khawma, mipui laia la puong trawk trawk a manih, Biek-In bang chena thawlawm pek zat tarsuok dam, thawlawm pe rawn lawmman dawng dam hi ka thil inlau a nih.
Tuta trum chu ka piengchampha puolin hang luongsuok ve tum nawk ka tih, tiin thisen ka pek ve nawk a. Pathien thruoina zarin thisen vawi 10 ka pekna a lo ni ve ta zing el! Ruol hei fiel khawm ka'n thlahrung deu leiin YouTube video ka post hma khan chu tukhawma an mi hrietpui nawh. YouTube video le hi thuziek suksuok hi ka'n kiltawi/inphalam deua chu, mani thilthaw puonglang angzawng ni lem lovin, ka DAIRY BOOK anga ka hmang an ni mieu si a, tiemtu le thlirtuhai mi hrietthiemna ka ngen.
Kum 2019, ka kum 28 tling kum hi Pathien enkawlna kut chunga ka hmang ka nuom takzet a, chu chuh ka duthusam a nih.
Mihriem ni lovin Pathien en lemin, ei thilthra thaw a hmu hmai ngai nawh.
Tags
Thusep (Article)