Thalaihai nunphung le inzawm tlat chu INTERNET a nih. Internet hmangtuhai hi netizen an tih. Internet hmangna ding hin mi tam lem chun mobile phone ei hmang deu tak. Internet khawvel ei hung dai hin remchangna tam tak a um a. Mi tam tak ta ding chun fakzawngna khawp a lo ni ve zing tah. Guwahati inzin ding khawma counter-a ticket va lak kher a ngai ta naw a. Umhmunah Bus, Rail, Flight ticket zuk haulawk (booking) el theina khawvel a ni tah. Pawisa thawn ding khawma umhmunah bawk zo thei a ni nawk pei ta a, bankah sunnithlak va'n tlar a tul ta nawh. Damdawi khawm online a'nthawka incha thei a la ni ta pei a; doctor hmu nuom khawmin ina inthawk zuk book thei a nih.
Hril ding tam tak a um. Hieng po po um theina chu INTERNET hi a nih. Chuleiin, a hmang dan thiem hi mi tin ei hriet a tha hle'n ka hriet. Thil iengkim hin THATNA le SIETNA a nei seng a. A hun le hmun hrea hmang hi a pawimaw hle.
Chun, ruol le hohlimna hmunah dam mobile hang phawr nghal el hai dam hi insum ding a nih. Sungkuo titi hun, inkhawm, ruol le inpan, lekha tiem le sinthaw hunah mobile chel naw tum hram hram ding.
Thenkhat ruok chun sunghai nghawk tawka games khel le, YouTube a hun khawral mei mei ei tam a. Games le thil dang dang khawm ni sien, a pawimawna chu a um tak meu el. Amiruokchu, a huntawk te hi a um ve a, chu hrethiem chin chu a hmang chintawk thiem ti ding an nih. Chu bakah, lam lawn lai puma mobile hmet khawm ching lo a tha vieu. Motor khal puma mobile hmang lek lem chu hringna le thina thu a ni leiin pmpel hram hram ding a nih. A tulnain a hne ngang a ni chun, sukchawla la hmang el ding.
Mobile el ni lovin, ni tin laptop a'nthawk internet ka tawk a. Lo sinthaawtuhai ni tina zau tieng an liem hlak ang deu ka ni tah. A hmang thiem tak ni naw lang khawm, umzie neia hmang thei nia ka'n hriet ve ta tho leiin, ka hun la hmang pei dingah INTERNET chu ka sawm pei ding thil niin ka hriet.
Miin thil ei hriet dinga an hril a um chun ngaithlak hmasa ding, mobile hmet puma mi tawng ngaithlak chu inngaihnuoina chi khata ngai thei a nih. Mobile-a sin pawimaw thaw a ni ruok chun la ngaithiem thei a n'a, a thei chinah insum tum ding a nih.
March ni 24, 2019 huna kan inkhawmnaah Biek-In sunga mobile hmet hmet mi 3 vel ka hmu a. A hmettuhai bak an buoi nawh, kei chen khawm ka lungril an lakhmang a nih. Annihai neka siek inkuoi deu ni lang chu hang baukhat met kha ka nuom a n'a. Ruoltlak hang inzil kha thil inhawi le mawi a ni chie si nawh.
Hieng po po ka zuk hril kher hi, a zawm nuomhai zawm ding le bengvarna dinga ka ngaimaw ka zuk hril a nih.
Tags
G. Songate