Thuhma: Kum 2018 chu a liem tah a, iengtin am ei hmang ral tawl ti chu mani seng ei insutnawn rawp a thra awm ie. Mihriem fello le tlaktlailohai hin, ni tin nun mi thruoitu dingin Pathien thu ei pawimaw a. Hienga a sela-hlova tluong taka fe hi a'n tak hlak leiin, kohran tinin Kum Thupui ei insiem hlak a. Thil thra tak khawm a nih. Amiruokchu, zawrsum taluoa tarmawi (poster) hei siem a, to taka zawr kher kha a Pathien thu naw hlein ka hriet. Kum Thupui ti a, ei beramhai zawm dinga ei siem chu, a thlawn ngat khawmin intar tir el ding kha!
Kum thupui hi mimal nun chitah nei thei inla, kum liem taa ei thupui kha hmang zing bawkin. Kum tin thupui thar nei a, hmang ta hnunghai khawm nuna sawm tung pei hi thil thra tak a ni awm. Ei kum thupui chu hnesaw naw deua ei inhriet chun, a ngai bawk kha kum 10 khawm nei inla, a thieng nawna umin ka hriet nawh. Hnesaw vieua ei inhriet pha chauh thupui thar hi nei hlak inla chu, hlawkpui nawkzuol ei tih. Chu ni lova, a thar hrim hrim dit ei ni chun, thupui chu thla tin khawm siem el ding a nih. A pawimaw tak ruok chu, zawm pei nun kha a nih.
Kum Hlui: Mani tawkah a vawi khatna dingin kum thupui ka'n siem ve a. Kum 2018 kha Bible tiem rawn le vawng, ti thupui hmangin kumbul ka tran a (Kum 2018 thupui). Mi angin tiem rawn naw langkhawm, ka thupui nei hma nek khan ka tlung insang vieuin ka hriet; kum 2018 sung January a'nthawk May ni 30 chen ni tin Bible ka tiem a, vel khat ka tiem suok ve tah a nih. A vawi hnina dingin ka tiem zawm zing a, kum 2019 kum laihawl velah zo thei ka'n beisei nawk a. Hieng hin, Bible tiem chu kalphunga nei tumin ka hei bei ve mek chu nih.
Hne tah ka'n ti naw a, sukdik le thaw thra khawm ka'n ti nawh. Amiruokchu, ka tum sukpuitling theia ka um hi ka lawmna a nih.
Kum 2019 Thupui: Thupui ka hei ti hin, va sopui ber bur dinga ka ti a ni nawh. Ka mimal nunah a ruk taka ka suolsuok ve dinga ringkawl inbat ka ni lem a. Sermon ang zawnga thupui hi a tak maw vieu, a hril chun thil hih a lo awlsam a. "Thilpeka Rawngbawl" ti thupui kan nei lai khan, a hril hrat hrat kha a tiksie an nih.
Thilpek thuah zuk lut met inla. Ei Bible-ah Marka bung 12:41-44 a ei hmu angin, hmeithainu khan a pek rawn tak a nih. Ei lungril phalna chu thu dangah sie inla, Isu hin ei siekhawl a'nthawkin a min khi pek niin a'n lang. Chuong a ni chun, vawisuna thawlawm pe thra vieua inngaihai hin an siekhawl hih an ngaituo suok rawp naw chun, pe rawn an insawn lai, pe lova an ingaihai khan an lepel vawng ding a nih.
Hnuoi danah a number tam tam chu thawlawm pe thra an nih. Krista ngaia ding ruok chun siekhawla inthawka thawlawm dinga ei phawrsuok le a bang la um kha a enmil thung a. Chukfuk chu a'n tak ding hrim a nih.
Leh, ka thupuiah kir inla. Jacob bung 4:15-16 ah, - Chuongchun, "Lalpain rem a ti chun dam ei ta, chu chuh, kha khah thawng ei tih," in ti ding hi a nih. Nisienlakhawm, in uongnahai hi in suong lem sih a; chuong ang suongna po po chu suol a nih. - ti ei hmu a. "Lalpain rem a ti chun, ti hlak ro" (Bible chang dangah a ziek angin) ti hi ka hei invawi bek bek a. Ka changvawn ding le, ka kum thupui dingin ka hei hmang nawk rawih ei a nih.
Intiemna Ni Lovin Inpumpekna: Pathien hmabulah intiemna siem hi ka tri a. Mani sukpuitling thei ding chin hrea inpumpek hi ka thiempui zawng a nih. Thuhriltuhaiin chona an siem a, mipui an intiemkam tir a. Entirna dingin hang hril inla. Camp speaker pakhat chun a thuhril zovin, "Ka tho charin mobile phone ni lovin Bible tiem hmasatak ka tih" ti thei ding po hung suok ro a ti a. Pulpit hmaah, van Pathien hmaah an intiem tawl a. Kei chu ka suok nuom naw nasa, suol lo theia um zing kha, intiemna puitling lo dinga intiema suola van siem kha ka tum naw bur el. A'n tiemhai po po kha pakhat khawm a sukpuitling ding an um nawh. Kar khat sung khawm thaw naw ni hai. Biek-In inkhawm sung tawite, mi hmu dinga intiem kha suola mani insiemna a nih. Rawngbawltuhai khawm hieng kawnga hin fimkhur a thra awm.
Chu leiin, kum thupui ka ti hin, intiemna a ni naw a, amiruokchu ka tlin ang tawka sukpuitling ngei ngei dinga ka tum a nih. "Lalpa, ni tin Bible tiem tang ka tih," ka ti naw a, "Bible tiem suok ka ta, Pathien thu tiem rawn tang ka tih," ka ti a. Hriselna le damna Lalpa'n a mi pek a, ka tum chu sukpuitlingin, vawisun chenin ka lan tlawnpui zing thei hi ka ta ding chun hmasawnna ropui tak a tling.
Thu Suktawpna: Iengkhawm ni sien, Lalpai'n rem a ti chun, hi ka thuvawn hrilna ding hi dawkan buotsaiin a la um ngei ka beisei a. Chu hma chun, a taka lo nunpui hi ka thaw ding chu a nih. Hril hmaa mania lo zawm phawt hi tulaia ding chun ei mamaw ngawt el.
Kum 2018 chu "Pathien thu tiem rawn le vawng" ti thupuia neiin, kum 2017 le 2018 chu ka hringnuna vawi khat Bible ka tiem suokna ve chun "Danglamna" ka'n siem a.
Chu nun chuh sawm pei pumin, "In thaw taphawt Lalpa'n rem a ti chun, ti hlak ro," ti chu hi lungrilah hin a lien em leiin, nun suol le khawhlo ka hraw ding tam tak umhai po po karah, van pathien ditzawng tlawmte bek thaw dingin le, thil iengkim Amaa inthawk a nih ti hih, hi nunah hin a lien deu deu theina dingin, kawng iengkimah "Lalpa'n rem a ti chun" ti hih ka hmurin a sam zawngsak ngei dingin ka chang thlang a nih.
Gospel Songate
02 - January - 2019
Silchar
Tags
Thusep (Article)