Hmangai Beemi (Hmar Hlatuolleng) by Gospel Songate

Hi hla hi kum 2008 October thla laia ka hun tawng chosuok a nih.  Pawl 10 kum 2009-a exam ding ka ni leiin, Lungthulien a'nthawkin October 2008 chun Churachandpur kan pan a. Lampui siet vanglai tak a ni bawk leh, Thawtannia kan suok chu Zirtawp zan kan tlung phak chau.  Zan li zet lamah kan riek a, Pherzawl, Zochung, Thanlon le Santing-ah kan riek a. Chanchin mak tak tak kan nei hman nuol.

About Gospel SongateAbout Gospel Songate



Kan ruolcham Lalrochung, Ramchuoilo, Lalremkung Pangamte, Hminglawrsang Pangamte, Kei Gospel Songate le motor puhai - Casey Lalrothang Songate le Pu Robindro (Driver) kan nih.

Vawi khat chu kan motor (Punjab Body Truck) kha khurah a tla lut thut a. Pil pawng kan innghai bur nghal. Motor lusipa chuonghai kha an hung inchawmthla rup rup el a, motor a chat fel der ta hnung khan! 

Thanlon-a kan riek ding chun Hmar tlung-in (hotel) ah kan innghat a. Bu fak khawpin kan hei suok thawveng a. Tleirawl hmel fel var pakhat chun dawr a lo nghak a. Mamaw lei em em khawm ni chuong lovin dawrah ka va lut a. A hming indawn malamin nepnawi ka'n chawk a, ka suok nawk el a, dawr nghaknu ruok chu ka lungrilah a cham sawng. Ka ruolhai ka va hril a, anni khawm tleirawl buoipui dang an nei ve bawk leiin an mi engtopui lem nawh. Dawr lai chun ka um zing a, tuola inthawka a hmel ka zuk hmu po khawm kha inhawi ka ti vieu. 

Khanga chawp-le-chil taka ka lungril hnetu tleirawl kha kan thawnthu tawp el dingin ka phal naw a, iemani tak thaw thra dingin ka ngaituo a. Kan tlungna hotelah ka tlankir a, lekhate ka lak a, English chun, "Beemi, I love You. How beautiful are you? You make me fall in love with you," ti chu ka ziek a. Dawrah ka fe nawk a. Kutzeizirin tuolah kosuok ka tum leh, kan inbiek fu thei nawh. Dawrah ka zu lut nawk a, English-in kan inbiek ve nak nak a. Class 9 inchuklai chau, Don Bosco School, Churachandpura kai, harvest holiday hmanga hung a ni thu a mi hril a. Ka zuk dit nawk sawt el!

Lekha chu pek ka tum leh a mi lo hnar (ignore) a, kil khatah a upa alu bag bulah thaw neia thung a um bawk leh a lak ngam naw khawm a ni thei. A mi ditzui le inngaizawng kher khawm ka beisei phak nawh, ka kutziek le ka dit thu bek kha chu a tiem ve ngei ka nuom leiin lekhate chu pek ngei ka tum. A dawr hmaah ka zuk sie nawk khawma a hung tawlkir nawk pei a, ka ngir zing a, kan inen a. A upa kan kuom tieng a hung phei charin a hmaah ka zuk sie nawk a, inhmaw takin a lak a, a kekawr mansaah a thun a, ka'n thuok huoi el! 

A upa chu in sungah a lut nawk a. Beemi chun lekha chu a phawr a, a hei phar lai chu ka en zing a. Kha lai boruok tak kha chu ICU (Intensive Care Unit) a lutpui khawp niin ka hriet, a'n hawi cham cham.  A tiem ta ngei a, a'n nui tat a, a tiem pei a, a'n nui nawk sat pei a. Ka sikhlim a lo puor sur sur el!  A mit inlawn dan vel khan chu vel 3 vel a tiem ni dingin ka ring. Chu zovah a fun trawm a, dustbin-ah a zuk thlak a. 

Khanga mikhuolin tleirawl ka hei tungngha zing kha, a sunghai chun thra an ti chie naw ning a tih, a nu'n a hung thlak a. Trin rawh, ti ngai lovin keikhawm ka suokzui ve nghal ta a. Ka lungril chu a hlim vieu tho a. Ka beiseina chun motor amanih, lampui amanih la sie sien, zan khat bek la zuk riek kha ka nuom vieu a.

Hotel ka tlung a, ruolpa Lalrochung khawmin pakhat a lo va  kher thluk ve bawk thu an lo hril a. Lampuiah ni 3 kan thangna a'n ta a, riek lem chu thei sien khawm nuom nawna chu a um ve bawk tho. Ka pawisa chawi khawm fak manin ka hmang liem treu tah. Zing khuo a hung var a, IRB hai motor-ah kan insawn a, Thanlon leilung chu kan tlan pel ta a. 

A hmutu ka ngui chup lei chun lampui sira sulhna chen chun ka hmu ngui a. Chu ni hrima zalamtluongpui hraw ka huphur trum kha um tak mawh? Motor a tlan hrat leh lungril a mawk a, a tlan muong leh ngaituona a fe sei si. Ka lungrila thu inlanghai chu ka khawlkhawm a, Beemi laka a hrietpui lova thawnthu ka isiempui chu zaihlaa la'n awi dingin ka ziek ta lem a.

Khawvel a'n vir a, inhmu nawk hun khawm la tlung thei ngai a nih, ti ngaituona neiin hmel vawi khat hmu ruola INDITNA le HMANGAINA pieng chu a tak chang theina ding lampui ka suongtuo a, kum tam a'n vawi khawm chun kan inhmu ta hrim hrim nawh. Khawvel hi a lien a, a pakhatin a mi pan mieu naw tlat a, hang tawng nawk ngaina hi um dingin a'n lang ta nawh.

November thla chun Don Bosco school-ah Beemi ka va zawng a. A hming khawm an lo hriet a,  Thanlonah a la um thu an mi hril a. Chu bak chu ka va zawng bik ta nawh. Ama le kan kara thil um chu kha hun laia ka thu zieksuok chau te hi a ni tah:

1.  Singkhuol ka chamna vangkhuoah
Hriet lo hmeltha ngainobeite
Ka sungril hmangaina changtu
A sakhming ka zawng an sumtuolah

Aw hmangai Beemi
I mawi  ngei aw i tha chuong ie
In vangkhuoa la cham ka nuom
Sien khawm khuo'n a rel thiem si nawh

2. Palai bawngte thaikawi ziek triel
In run sungah hung inhlanin
I dawnletna nghak hman lovin
In vangkhuo ka lo inher liemsan

3. Truonna vangkhuo muol dang sien khawm
Dawnlungrukah i cham vawng vawng
Kira lam ang let thei chang sien
In run sangah  ar ang lawi ve din

4. Kum tam liemin thrang le tharin
I tawna duthu aiang sam
Bang zai min reltir tum si lo
A pawi ngei maw  aw Di tuorem lo

(Hi hla ka zieksuokna tak chu kum 2008, Ocotber thla lai kha a'n tah. Hmangaina par tam tak tlan hnungin, ka hei tiem nawk a, "Aigupta lengmaser" rim a'n nam nawk deu hamin ka hriet. )


Post a Comment

Please Select Embedded Mode To Show The Comment System.*

Previous Post Next Post