Hmarhai ei khawsakna hmun le inhme em em chu, "Lampui a mumal ta naw charin Hmar khuo a'n tan" ti dinga um hi a nih. Manipur, Mizoram, Assam, hmun tinah Hmar khuo hriet awlsam dan tak chu LAMPUI SIE hi ni dingin ka ring. Lungthulien, Tipaimukh biela pieng ka ni leiin, lampui sie hi nunphung pangngaia ka nei ve a ni ta a. Pawl 10 kum 2009 March thlaa exam ding ka ni leiin kum 2008 favang lai khan Tuithaphai, Punjab Body truck lienin kan pan a. Thawtranni'n Lungthuliena inthawk kan suok a, Zirtawpni zantieng Tuithraphai kan tlung phak chauh a nih.
Thu dang ka zuk hril sei deu tah. October 14, 2018 khan a vawi khatna dingin Cachar, Assam - Udharbond Sub-Division hnuoia Hmar khuo Muoldam kan va sir ve a. HSA program le inzawma fe kan ni a. Ruolpa Lalsiemthar Hmar leh kan ni nghe nghe. Hril ta angin Muoldam khuo khawm hi lampui thratna puontienga um ve a nih. Thawk thum lai lirthei chi dang danga kan chuong hnungin kein fing khat lai kan lawn a. Barak Valley HSA Presiden Tv. Lalmalsawm in lirthei a hung tir a. Hadam deuin ka tlung thei a nih.
October ni 14 zan hin Muoldam HSA huoihawt program kan hmang a. Kei le Tv. Lalsiemthar Hmar chun thuhrilna hun kan hmang a. Kan thuhril chu a iengpo khawm ni sien, program kha a hlawtling vieu el.
HSA Muoldam Unit hai chun sun hunah insukhlimna (Games & Sports) an lo nei a. Ruoi khawm tuihnai tak an thre bawk. Keini khawmin an sizo hmepawk chu kan hap ve a. A lima ang hin phing inki lawnga fak a awl hle.
Hmepawk hi ka du vieu el a. Inti khawpui um leia du fawm chu ka ni awzawng nawh. Lungthulienah pawl 8 ka thaw lai khan ka Pa leh in kan nghak a. Bawngsa Kg 2 kan inchawk a. Iemani tawk ka'n hro a, a dang po hmepawkin ka suok vawng a. Inkawl papui pakhat chun, "a na, pahni chau in um a, inhnik deuin zeu ta'n la...." a mi ti pek a. A ngaidan ang chun bawngsa zeu kha hmepawk neka inhnik lem ni ngei a ta. Kei ka dudan khan hmepawk a nih ti kha ka lo hrillawk bik chuong naw a. Inhniknaw deua hmea a mi ngai kha, ka du dan taka ka suong a lo ni lem zing.
KOHRAN PAKHAT: Hmar khuo tam tam Assam, Mizoram, Manipur le Meghalaya haiah ka sir ve tah a. Muoldam khuo chauh hi khuo khat kohran pakhat umna ka la sir fuk a. An hawi dingzie hi zan khat chauh khum ka del hman khawmin ka hip phakin ka hriet. Kohran pakhat inenkawlna na na chu khawtlang inrelbawlna khawm a felfai el khelah, inthuruolna a um hle bawk.
Muoldam khuo hi mei inaina in 60 vel niin ka hriet a. Huon le ram enkawla fak zawng an ni tawl. Udharbond le Silchar khawpuiah an thlai tharhai an sukthlawng thei a. Chuong taka sungkhuo sirbi inphet an um hmel nawh. A pawimaw tak chu ieng thlai khawm ni sien, tam tak tharsuok tum ding a nih.
UISA CHARTANG : HSA Muoldam Unit hai leh zingkar inthre tawmin uisa chartang trang awrin kan fak a. Dittawka uisa chartang le vai bufai hang fak khawp hin chu, thrungphate khampalei a, nghei thlepa in bawr bawr a ni'l. Sien khawm, mani ram pan a ngai leiin Tv. Lalmalsawm bullet bike-in kan zuk inphur a. A bike khawmin lel chu a mi lel deu, hnuoiin a lo dawm zeu zeu khawpin kan rik. Pa lien tak tak kan um nawa chu, uisa chartang khan a fen thlak rawn chu ni ngei a tih.
THLALAK THENKHAT KA LAKKHAWMHAI
Tags
Chanchin Lawrkhawm