Lungtau pahnam le V. L. Bawia Songate thla hung intan dan
Lungtauhai hi Tartenu le Tartepa thla niin an hril a. Singkaihmang lova lungvar an biek leiin ‘Lungtau’ ti hming hi an hung put a nih. An khuo hluo phutna tak chu ‘Khawthir’ le ‘Thirlung’ a nih. An hla pakhat:-
“Thirlungah kawlkei san rei,
Sak le thlangin sai ngam lo;
Khuo kan run ni’n lai that e’
Sak le thlangin sai ngam lo,”
Hin Thirlunga an um lai hnam hrat tak, do-le-ral ngamlo an ni zie a suklang.
Thirlunga inthawk ‘Lungbo’ an kai a. Hi khuoa hin pasaltha Haudar an lal. Haudar hi Takam vailienin an thuoihmang a, a hung kir ta nawh. Lungbo-a inthawk hin Neidawn an kai a, hi huna an lal Lienhak a thi hnungin Infimatehai Fimlur chu lalin a um. Hi taka inthawk hin Infimate an hungin lal tan.
Lungbo-a inthawk hin Lungtauhai chu an um indar tah a. A then Neidawn-ah, a then Keivom zovah. Keivom zova an um lai hin BIL (Chang) an kam hlak a, sakei dum lien deu a del leiin chu tlanga um po chu ‘Keivom’ tiin ko an nih. Chuongchun a then an thlang tla a, Tamdil vela dam an um a. Tamdila umhai hi ‘Tamhrang’ tia ko an nih. Mihriemate, Sielhnam, Lungchuong, Pakhumate le a dang danghai hin an umna hmun le thilthaw i zir peiin an hming hi an hung put tan a nih.
Ral veng dinga lung chunga chuongpa thlahai chu ‘Lungchuong’ ti an nih. An siel that vun hnama (thil phurna) nei –pa kha ‘Sielhnam’ an ta, a vun khumtu-pa kha ‘Pakhumate’ an ti bawk.
Lungtau pahnam ‘Songate (Sawngate)’ hung um tanna tak hi hrietchieng a ni naw a. Amiruokchu Lungtauhai le Dawnhai an indo lai khan, Zote Hrilerpa chun hnena hlado pakhat an sam a. Hi hla hin ‘Songatehai’ an um tah ti a namnghet awm ie. Chu chuh:-
“Songatepa lal chunghnungah,
Belzu zuong phur;
Zuo ler hi khuoi ang zuong bie,
Kan put ni’n Zawlkhuo’n chungah,
Sakawl inthli thangvan ang chunghnunga e,” tiin.
Hi indonaah hin Dawnhai chu Selenhaiin an thangpui a. Lungtauhai khawm chu Zotehai lal pasaltha Hriler-in a thangpui a. Lungtau tienga pasalthahai chu Haudar, Darpuivung, Tomising le Thluhrim an nih. Dawnhai hi tam tak an that a, chu lai ruom chu ‘Dawnruom’ an ti sawng der.
Lungtau-in Sialsawnga a hring a, Sialsawnga chun Thasawnga a hring a, Thasawnga chun Khawl Lema a hring a, Khawl Lema chun Chawng Thlu Siem a hring a, Chawng Thlu Siem chun Nau Khup Maka a thla a, Nau Khup Maka chun Chawng Thlu Lut a thla a, Chawng Thlu Lut chun Hau Hmanga a thla.
Hau Hmanga chun Hau Chhinga a hring a, Hau Chhinga chun Darchungnunga a thla a, Darchungnunga chun Pa Kuanga a thla a, Pa Kuanga chun Thangbut (Buta) a thla.
Buta le a nuhmei Ngamchawngpui (Pawki tia ko hlak, ama hi Khawbung a ni hmel) chun Van Lal Bawia Songate a thla a. V. L. Bawia Songate hin Lalrokung Ngurte a nei a. Hienghai hi an hring:
V. L. Bawia Songate nau laia a 11-na Laltlansang Songate hin nau pasal 5 le nau nuhmei 3 a nei a. Lalneichawng le an nauhai chu Ruolpawllien, Grace Ramsiemzo, Gospelthang Songate le Lalnunsiem an nih. November ni 7, 2002 khan kum 37 mi niin Lalneichawng hin chatuon ram a lo pan ta a. Hi hnung hin a pasal chun nuhmei nei nawkin, nau 4 an nei.
1. Lalrawnkim
2. Vanlalsung #V. L. Songate
3. Thangchawngpui
4. Rohlupui
5. Thangchuoilo
6. Lalkhawmawi
7. Songlienthang
8. Ngurthangsei
9. Lalremvel
10. Sapbieklien
11. Laltlansang
12. .Lalparmawi
13. Lalthangsang
 |
| Laltlansang, Lalneichawng, Lalnunsiem, Gospelthang Songate, Grace Ramsiengzo, Ruolpawllien |
 |
| Gospel Songate. Dated Silchar, the 4th March, 2016 |
Tags
Sungkuo Chanchin