Pawlsiemlien Sak "Pielleiah Parte Nang i Leng Sung Chu" : Pu Lalhmuok hla

Vawizan chu ka lungrilah hieng thu hih a hung lút chu tie:

   Hmarțawnga lénglawng hla po pohai lai famtah Pu Pawlsiemlien hlahai hi an ril a. Ruol u deu le tlawma Hmarțawng fír dithai chun ei inhnikpui ém ém. Hiengang hla hring le inril hi a hung suok dan i sui hlak am? 
  Thil chitea ei ngaiah khawm hlawtling ding chun tuor a lo ngai hle nih ti ka hriet pha rawp. Hlaphuok hi thumal remkhâwm a, solfa thlûka sak ri el a ni nawh. Hlathu inril chu fei kibâr nêkin a sun a na lem i sawn naw!! . . Pawlsiemlien-in a sak hla po po deuthaw hi Pu Lalhmuok, tuta Muolvaipheia um phuok a ni a. Pu Lalhmuok hin hmangaina leia a tuor nasat ziehai a hla anthawkin ei hriet thei. A hlaphuok pakhat hang inzawt hluom ka tih.
☆Tiena rún remsa inlawi kár súnni khawm; Kumpuisúl ang sawt ka tia Parte. I chun le zuo lungtum țha val dang pawm a; A mi nuthai i chang ding pui chu ie, Ka dawn reng hin D tuor ka zuom lul nawh. 
♡Pielleiah Parte nang i leng súng chu. Ngailai puon-ang bâng kan zuom si nawh. Sienkhawm ka D, i lung tum réng dawn hin; Nau-ang țapin aw.....tuor a na em el. 
☆Ei vangkhawpui rún inlawi kar nghakhla'n aw, Tlaithla ênga síngmit kan lén ruoi a. Sakhmel tawnglo cháng tlaini hman a sawt a. Kumtluong nuthai i chang ding pui chu ie; Ka dawn réng hin Di tuor ka zuom lul nawh. 
☆Biethu di ei tuorem lai khan aw țhapui, Nau-ang min țaptir hi i lung tum maw. Hienghi maw parte an hril hmangaina chu; Ka dawn thiem nawh ka tuor thiem ve naw ie, Suilung damna pielral ka ngai vawng vawng.
 --------------------------------------------------------------------------------------

Khawvela hin hmangaitu tawng lova dam rin a um a. Tawng sia kawpchawi rem lo hin nun a sukbeidawng. Ni e, suilung damna an hril 'pielrâl' ngai a zuol hlak.

Post a Comment

Please Select Embedded Mode To Show The Comment System.*

Previous Post Next Post