CHANCHINTHAR SIEMNA KAWNGA PAWIMAW CHU


Ei khawvel hi inelna khawvel, chanchinthar ziekna kawngah khawm ni sien, thil dang dangah a hmasa inchuna ram a nih. Chun hmun tin ram tin ei inhrietpaw vawng ta a. Khawvel hi Information Technology hmangin ei sawr chin (globalization) a nih.

Journalism le Media tieng hi eini lai chu an hman hman sin ang deuin ei nei a. Ei changkang ve huna chu qualified (an chuk ngei) haiin chanchinthar mi la ziek pek an ta. Tu hria ding chun, ' a post hmasa' inchu malam le, chanchinthar ziek inchuna ang titi deu leiin ei thu hriethai hi a chiengkuong naw a, thukhel a la tam hle bawk. Thiltlung ei hmuhai mani ngeiin post ei tum a, voluntary reporter am ei inti ding, freelance, ka hriet chie nawh. Hi lei hin belchieng dawllo a tam pha a nih.

July ni 1, 2017 thiltlung, ei Upa dit lai famtah Upa Bieka, thina anthawka tho nawk anga chanchin thedartu khan mipui lungril a sukhliem nasa hle nih. Hrie awm taka a tawngbau chen a hang um sa ta pei lei khan mipui khawmin ei "awi" thlap a. Amiruokchu, a hmuna umhai anthawk khang ang thil a um nawzie ei hriet nawk a. Thukhel let der ei hang thedar kha, thil inzakum le muolphona thil a nih. Mi tu el khawmin chanchin chienglo le indiklo hi thedar tum ngai naw inla, thudik hriet hma chu la hei nghak fan lem hlak ei tiu.

Chun, a post hmasatu nekin chieng taka kimchang lema ziektu ni kha tum lem hlak ei tiu. Chu chuh tiemtu ta ding khawmin a hlu lem a nih.

Chun, copy-paste khawm hi tulaia buopui um le, a suokna hrietlo, thusuokna (source) khawm sui hleitheilo khawpa a semdartu ei tam hlak hi thil buoithlak pakhat chu a nih. 

Thil tlawmte, chanchinthar ei ziek (report) hmaa ei ngaituo ding le ei hriet dinga tha hang suklang ei tih.

Journalist, Reporter le Media Person

Chanchinthar le thiltlung ziek hi a hman hman thaw ding a ni nawh ti kha ei hriet a tha a. Journalist le Media tieng inchuk kherlo vawisuna Media tienga ei hmu hlak an um a. Annihai hi  tuoihriem (trained/experienced) an ni a. Qualified an nih.  Facebook le Group a thil tam tak hi chieng mang loa a post hmasatu ni tumna lei am ei ti ding, bur buta ziek a tam a. Ei qualify nawna tieng hma ei lak niin an lang. Chuleiin, chanchinthar (news) report chu an chuk le a thaw hlakhai chan dingin sie hlak ei tiu.

Thiltlung le Chanchinthar inhriettirna


Chanchinthar umna hmunah i um a, a hrietu i ni khawma nangin posts tawp el naw rawh. I hriet sun sun chu indik takin ziek/tawngbauin report le media tienga mihai inhriettir la. Anni chun tuoinamin, mipui hriet ding le tha po hung report lem an tih.  Chu chuh thiltlungna hmuna um i ni anga chanchin hretu thaw ding indiktak a nih.

Hnam changkanghai hang en inla, facebook-ah a nuom nuomin news an report ngai nawh. Eini lai hin inhrilhrietna ei mamaw hle nih. Inchuktirtu (teacher) sin a hman hmanin ei thaw ngai naw angin, news report khawm hi a hman hman ni loin, a thaw hlak (trained) a ni ding a nih. Hnam tlawm le hnufuol ei la ni leiin, Journalist degree nei thlap lem chu ei la um mang nawh. Amiruokchu, tuoihriem a ni ding a nih.

Thuchieng nghak fan fan

Ei hril ta angin, a post hmasa nekin a fie le kimchang lem inhriettirtu ni tum lem ei tiu. 
Entirnana - " Tu el khan motor a accident" hang ti a, tawp nawk vang vang nekin, la nghak met inla.  A hnung deuah a accident-na hmun le a thi um zat dam, tuhai am, ieng hnam am, ieng motor am, ti hai kha Breaking News Headlines khawm ni sien, a tha hle ding a nih. Chu taka khawm chun ei chanchinbumihai kuoma ngei pe bawk ei tiu. 

Hmingthatna 

 Chanchinthar i ziek sawl man le  information petu i nih ti hrietna dingin, news item a khan a tawpah contributor/input/correspondent/writer hming kha media company tieng khawmin hung belsa ve hlak an tih.


A iengpo khawm ni sien, thil indiklo sukdar hi bansan ei tiu. Chun, ei hmatawk tawk, a hlui a thar hrietlo, a suokna hrietlo thil chu "forwarded as received/copy-paste" thaw bek bek ta naw inla a. Social Media le online news portal hai hi hung thienghlim thei a tih.



Post a Comment

Please Select Embedded Mode To Show The Comment System.*

Previous Post Next Post