LUNG A MIN LEN THLIR NGHAWK NAW NING - Hnuoi Lungngai Mitthli La Hul A Tih

~Gospel Songate

"Tukhawm hlun sung hrim um nawna khuolzinna rama hin, fam ngai lusunin tawp ni nei ngai naw ni a. Ei kumhlun ram ding ei pan pei leiin, inthrena a la um pei ding a nih." 

Hla ngaina mi tak laia mi niin ka' n hriet a. Inpakna hla le a lenglawng tieng khawm ni sien, dit ka hau a, hei sak el thei dinga inkhawl ka nei ve nuol. Amiruokchu, hla mi, ti takah a sak tieng pang ni loin, a ngaithlak kan hnik a; makhata tlakfal chang hang sak ve lawng lawng chang khawm chu a um ve tho bawk. Chun rimawi tieng khawm iemani chen tak lo inhmang tah ka ni angin, rimawi hi ka thisen zama luong ang elin ka ngaina a. Hla le rimawi an ri det det a um hin chu tum lawk der loin ka hmur amanih, ka kutpar bek a lo chang hman hlak.  

'Hla Dit' hang ti ding, a mala thlangsuok ding ka nei ngai hrim hrim naw a. Rimawi ngaina mi chun a telpuiin ka ngaina vawng a, ka huom lien em em. A'n lang hun le a thawk bik hun thil chu a um na lawm ie..... Chuong taka 'dit' hang ti bik ding hi ka nei ngai nawh. Kar hni lai ka ngaithlak nghawk theilo el ni lo, ka sak nghawk ta lo hla hi hang hril deu hluom ka nuom a. Hieng ang taka lungrila pai hla ka la nei ngai naw leiin, a ziek meuin ka buoipui zui ta pei a nih.

Sung tinin thina lusun ei tuok a. A hel thei le pumpel thiem hring nauhai lai ei um nawh. Thina hin mi sie le thra a thlier naw a, a thra thra a dit lem amani aw.... ti dingin, mi ditum tak tak hunlo takin  ei chan rawn em em. Kan in sungah thina a tlung ta a. Kan siengna nu chun kum 10 mi ka ni laiin a mi maksan a. Vawi khat khawm hi khawvelah a hung inlang nawk ta nawh. Damsung dai dinga ei hmangaihai ei hang thre hi chu, a natna hliekhutu ding thil hi a um naw kawk el a nih. 

Kum 2017 August ni 6 khan kan zirtirtu ni hlak Upa Challiensung thlafam a chang thu ka hriet a. Chu thil chun ramtin a min ngaituo tir a. Ka ngaituona a'n vir nasa a, vanram chen ngaituonain ka fang hiel a nih. 

Lungril ngaituona chun vanram chu ka hei thlir a. Lungthulien Kawnpui E.A.C. kohrana inlawi, ka khuo hriet hnunga fam tahai ka zuk tiem chun, kutparin a dai ta nawh. Chuonghai chu vanramah Biek-In inkhawm anga an inkhawm ding chu ka suongtuona chun a hei hmu a. Anni laia thrang inhawkin mitthli a far hiel a nih. Famhai - Mr. & Mrs. Upa H. Chunga, Nu Thamawi, Pastor Tlangliensang, Pa Paukhawsawi, Rang Lienkung, Pu Daniel, Sakhmingthang, Hrangkapmawi, Ni Fimneikim, Rang Lalte, Lalramthlir, Netung, Tluongi - ti hai hi ka ngaituona hung inlang zut zut an nih. Chu lai chun Sir Chala hin a naupa kum tam tak a hmu ta lo Hosea chu vanramah a zuk hmu ding khawm chu ka hei mitthla a, anni laia thrang inhawk a um lem hiel a nih. 

'Thina'  hi trawngsephur a ni tlat leiin hei thi ding hi inhawk a um ngai naw a. Amiruokchu, a thi hai hi hnungtieng kir an nuomna ding san hi ka hmu naw khawp el. 

Pawl 4 ka thaw laia sir Chala drawing min chuktir hunlai chu lungrilah ka hei zel kir a. Chun famtah sir Chalkhupthang khawm lungrilah a bo thei nawh. Hindi le Manipuri kan nghawk sa saa min chuktirtu sir Siemlien khawm kha tienami an chang chu a ni pei tah. Hming inzawt ding tam tak a um, ka hril kim seng nawh. Hi chena hin dittawk phawt lem ei tih.

LUNG A MIN LEN THLIR NGHAWK NAW NING

R.L. Kamlala hlaphuok hi khawsawt hla laia chu ka dittak tia ka sal thei dingin, sir Chala thi a'nthawk hin ka  lungrilah a sip hne em em a. A chunga ei zuk hril tah angin ka nngaituona invak vel kara chun, vawi khat hadam huoi angin hi hla hi a hung inlang a. Chuongchun Pi Lalruotmawi sak Lusei trawnga mi chu ka ngaithlak ta char char a. Hmar trawnga mi ka zawng a, ka hmu el naw a. Kar hni a liem chun  I.C.I Assam Hills Presbytery Choir haiin an sak kha ka hung hmusuok nawk a, ka dit thar deu deu pei. 

Dit ti ta rau rau, classroom-a chen khawm ka ngaithlak a. Trum khat ka trin inhma a, lampuiah kea lawnin ka sak pei a. Ka khuo a sawtin famhai kuoma hang um ve chu kan nghawk ta em em el a nih. Anachu, thi dinga ka hei inchan sin chun thi chu ka hawphur nawk tho bawk si.

1. Lung a min len thlir nghawk naw ning, 

Hnuoi lungngai khel ram saw,
Dam lai lungngai sûmpui zing hi;
Khel ka tih tapna ram.

Hnuoi lungngai mitthli hul a ta, ka tap lai ni bo a ta; 

Aw, Lalpa hmel hmu ka nghakhla, aw, bo el rawh, hnuoi nghawkum.

2. Kalvari , ka hreng ropuiin, 
Vanram kawtkhar a hawng, 
Va thlir ta la aw ka thlarau; 
I ram hlun ding an lang.

3. Ka ţapna zan thim bo a ta,
Jordan va-rala khin,
Aw ka ngai, ka lawmna tak hai;
An lengna rama khin.

4. Aw, iengtik am tlung veng ka ta,
Ka chung ram inhawi khi?
Varuom thim ka pal kai pha chun,
Tapna ram ngai naw ning.

*********

Pu Kamlala  hin ieng ang rinumna am a tuok, ti hril ding ka hriet nawh. A hla thua inthawk ruok hin chu harsatna le beidawngna hi khawvela hin a tuok a nih ti ei ring thei a. Chu laia langsar tak pakhat chu Thina'  ni ngei a tih.  A hla chang 3-na  chun "Aw ka ngai, ka lawmna tak hai;  An lengna rama khin," a hei ti hin, fam ngai a ni zie hriet thei a nih. 

"Thina hi mal sawmin um raw seh" ei ti hlak a. Hang ngaituo chun thina, malsawmnaa a'n chang hi a tuortu ta ding chun pawm a'n tak a nih. Amiruokchu, ei ngaihai an lo fe hmasa hin, khi ram khi ngai ve inla. Khawvelah ei lungril sie loin chungtieng ngaina ei nei rawp thei chun, chu chu a nih thina malsawmnaa a hung um theina chu. Chungtieng ei ngai zuol po leh, ei pa vana mi ditzawng khawm ei zui thei lem ring a um. 

Khawvela hin trapna zan thim, suor sietna ram hi bo ngai naw nih. Thina chau naw chu fe khelna ding a um nawh. Hi taksa hi thi a, khi ram inhawi, hmangaihai lengna a lut ve pha chun, ngai ta naw nih hnuoi ram hi. 

"Thina naw leilak dang, PIELRAL kaina ding a um nawh"

16th August, 2017