Lekhathawn Dangdai : Chan Nawna Kiah Pathien Hmel Inlang

By: Gospel Songate

Inrinni túk a ni a. Ruthi chun a tuola lekhathawn siena bawm chu a hawng a, dákip a hming le chengna chau inziek pakhat a lo um a. Hieng hin a'n ziek:
"Dit tak Ruthi, vawisun i in lai ka hung ding a n'a, hung kan ka che. I hmangai, Isu," tiin.

Ruthi'n lekhathawn a tiem zo chun an thin ta hlawp hlawp a. "Pathien chun iengleia mi kan tum am aw ni ding? Mi hausa le danglam bik ka ni si naw a, thilpék ding hlak ka nei nawh," a ti sep sep a.
Ruthi chun a mikhuol fak ding a hei en chun iengkhawm a nei naw a, a fak lai hlak chu Pathien meu lo mikhuolna ding chun a'n sit hle si.
A pawisa ip a hei en leh cheng 5 chau a nei bawk. Thlasik dei tak hnuoia chun a nei po chawiin a mikhuol fak ding chu inchaw dingin a suok ta a.

hmar chanchinA pawisa tlin ang tlawmte an chawk zo chun in tieng panin a kir a. Lampuia chun nupa tuok ni ngei ding upa tieng deu ta hi fúnghrawl leh, thuomhnaw tha khawm inbel mang lo chu a kuom tieng hung pan a hmu a. Anni chun, "Pi, fak ding le thuomhnaw mi pe rawh," an ti a. An hmel enin țhangpui an ngai ti fie takin an lang a. Ruthi chun lunginsiet hle sien khawm anni a sawmdawl chun a mikhuol pék ding a nei naw ding ti a hriet a. Chuongchun, a harsatna hrilin a pék thei naw ding thu a hril a. 


Putar chun," Pi, kan hrietthiem ie,"
ti'n a nuhmei kut chelin an fe ta a.

Ruthi chun an fe liem ding chu a thlir zing a, tlasam ém ém kut ruoka a'n kir tir lei chun rinum a ti hle. Inring taka khekin, "Pu, Pi, lo ngir ro," ti'n an kuom tieng a tlan a. " ka thil van chawkhai po hi peng ka cheu, ka mikhuol ding Isu chu iengkhawm lo siempék da'l ka tih," a ti a. Pitar chun lawmthu a hril mawl mawl a, dei a ti ém lei chun Ruthi chun a zakuo hak lai chu a'n bel tir a. Ruthi chu kut benthekin vúr tla sap sap hnuoiah chun a kir ta a. A túk nawk chun Ruthi chun a dák bawm chu a en nawk a, a hmaa ang bawk lekhathawn a hmu nawk chun mak a ti hle a. 

A hei hawng chun: 

"Dittak Ruthi, zani khan fakding inhnik tak mi pein, kan dei ti inlauin i mi tuom lum a, ka lawm ie. I hmangai," Isu ti'n.....

Ringtu dittak, ei hringnuna Pathien tuok ei tum dan leh an mil am?? Ei ringnaw zawngin Pathienin ei insung, khawtlang, kohran le mimal nun mi kan A tum rawp hlak a. Ei inchán nawna kiah A hung rawp leiin vawi tamtak ei hnawl hlak.

Ropuina Lalpa hi retheina silfén hlieah khawm ei hmu fie theina dingin Pa Pathienin Mal Sawm raw seh, Amen!!

Pathien hi ei beisei le ring dânin a'n lang kher ngai naw a. Hmu ei tum angin ei intuokpui kher ngai nawh. Vawi tam tak Ama a nih ti hre loin ei hnawl hlak a; A nih! Pathien a nina anga insukropui loin tlawm takin a hung hlak leiin ei hriet naw rawp hlak a nih. Ringtuhai, Krista Pathien ei hriet rawp a, ama a'nthawka suokhai ei lo dawngsawng theina dingin "Inhnuoi" taka inthawka ei zawng hi a pawimaw hle nih.

20 January 2013

Post a Comment

Please Select Embedded Mode To Show The Comment System.*

Previous Post Next Post