INTERNET KHAWVELA FAKZAWNGNA HUONG: INTRODUCTION

Khawvel hi upahai ta ding chun ' A Mak' ti ding vawng a ni ta a. Thangthar lekha inchukhai khawmin mani inchukna muol sengah hiretna tak tak ei nei naw chun khawvel hi a danglam hrat em em a. Mihai ke pen ruolin ei pen ve thei naw ding a nih. Subject thuhmun la seng seng, mi thekhatin an hlawtlingpui bik a, thenkhat chun ei muolphopui thung a. An tak le harsa bik hrim thaw hlak ei ni tawp si nawh!  Chuleiin, ei thaw ding hi a bul tan hmaa chik taka ngaituo a ngai a. An thim zawng le a eng zawng sui kim dap inla, chu hnungah baw chau ding a ni hlak. 

Chun, eini lai hin lampui (trait/course) hriet naw leiin ruolhaiin an thaw thaw ei thaw rawp hlak a. A lo hlawtling um hlak de inla khawm, a tam lem chun ei lampui hraw hi ei hriet mumal ngai naw niin an lang. Chuleiin, ieng thil am ka thaw ding aw....? tia inngaituo vawng vawng hnungin Class XII Science/Art/Commerce khawm ni sien, Agriculture/Horticulture/Sericulture khawm ni sien, ei vawi khat dam sunga ei nun ding hi uluk takin thlang tum ding a nih.

Khawvel hi a lien a, a lien angin fak hmuna khawpa thaw ding hi a tam a. Mihriem ei tam chun damna ding hi a lo tam pei bawk . Entirnana- Aizawl khawpuia chu in tin deuthawin sathu an hme a, Chuleiin sathu zawr chu a hlawk naw thei nawh. Thil chitea ei ngai khawm a hun le hmun an dik chun hlawtlingna a ni thei vawng ti ei hriet a pawimaw. 

Mihriema pieng nawn nawk ta lo dingin Hmar hnamin ka  pieng a. Hril le sak nikuoah "Hmar ei ni hi ei lawm a, ei varin ei tum an sang" chu ei hang ti ve nawk nawk hlak a. Ei hnam nina kan sit naw a; kan zapui bawk nawh. Amiruokchu, hnam tlawm ei ni leia ei thiem thil le ei thaw thei ve sun hai fak hmuna khawp a tling naw hi ka ngaituo hlak a. Bengali, Bihari, Meitei, Tamil, a dang dang lo ni ta ang inla, vawisuna Hmar laia chitea ei ngai hi fak hmunaa hmang thei ding a nih. 

La hei hril pei ei tih: Tun thawnthu ngainuom um tak i ziek thei a. Bu tam tak khawm a ngai nawh, bu khat chau i ziek a. Hmartawngin i ziek chun copy 500 i zawr ring a um nawh. Vai hnam danghai chu hril lo, Lusei/Khasi tawngin ziek la chu copy 2000/3000 hai zawr thei i tih. Ei tha seng inang zing si, a thlum dan le a an hnik dan dang chuong lo, amiruokchu mipui le a tawng hmangtu an tam leiin i lekhabu anthawk chun i kum khat fak ding i hlaw thei ding a nih.  Vawisun hin chu ei hnam sungah, a neinunghai naw chun lekhabu khawm ni  sien, film khawm ni sien, siem ngam a um naw a. Thiemna tam tak neihai khawm a bazaar siet leiin a thaw ngam ei um naw pei a nih.

Fiemthu titakin, "Hmar ei ni hi ei vangnei, Bengali lo ni inla vangnei nawkzuol ei tih" ka ti hlak a. An khel ring a um nawh.

1. Fiemthu thiem tak kan khuoah a um a. Rawl (voice) chi tam a saksuok thei. A hmel le a hawiher reng reng hi a fiemthu vawng el a nih.  Mizoramah fiemthu hmanga sungkuo chawm an tam takzie le, fiemthu hi "Infiem Pawlawtna" el ni ta loin, fakzawngna khawp a tling tah ti ei hriet a. Tuarpui, Mapui, Thangkur ei ti hai neka talent nei tha ka hmu nuol tah. Amiruokchu, Hmar tawng hmanghai lai hin bufai bag khat hlawna ding siete khawm a um der si nawh.  Lusei tawng hmang ni hai sien, Comedian Search velah top 10 vela ei hmu ding hi ieng zat tak am um an ti aw.....

2. Audio/Video cassette/CD siem khawm Central Choir le mimal dang dang anthawk ei hmu tawl tah. A "rau" tieng chau thlir thei an naw a, a bazaar a pawimaw leiin ei lo "Eng e" nawk el hlak a nih; a awm naw chuong nawh.

Tawng hi ei talent sukpungna ding le ei thiemna suklangna ding thil pawimaw tak a nih. Chuleiin, Hmar tawng ei hriet chu makmaw a nih; a tam thei ang tawng dang ziek le thiem tum ding a nih. Einihaiin ei tlin ta naw khawmin, ei thlahai chu a pawimawzie hril ding an tah.

INTERNET KHAWVELA FAKZAWNGNA

Tuta tum a bul tanna angin tawite chau hang hril ei ta. Hun nawkah Internet anthawka mihai sum huilut dan ei hung ziek zawm pei ding a nih. Hieng thil hi mihai chau thaw ding ni loin, eini khawmin ei thaw thei ve a, Facebook/Whatsapp/Youtube hai khawm a nachang hrie ta ding chun lamsuok a um thei a. A bat batin ka tawnhriet ka hung suklang hlak ding a nih.

Ei lo hriet ding thuhma:  Ei khawvel hi a changkang ta a. Tulai mihausahai hi rangkachak khur amanih, lunghlu, thilsiemna khawl lien tak tak, thautui khur, an nei vawng nawh. Internet anthawka mihausa hi an tam hle a, an hausakpui dan ruok chu an ang vawng nawh.

India rama Online Market Flipkart neitu Sachin Bansal and Binny Bansal hai hi Assam Oil, Indian Oil, hai angin khawl lien le thautui an nei ve nawh. An sum lamna chu internet a nih. Kum 2007 laia indin chau an nih. Kum 2016 khan thawktu khawm 30,000 lai zet an nei tah. 

Website an nei a, Mobile Application an nei a. Mi thil siemsuok le an zawrhai zawrna ding an siem a, Internet hmangin an zawr a, chu chu nih an hausakna chu.  Kum 2016 khan 15,129 crore zet revenue an nei tah.

Eini laia dawr thawhai angin zawr ding an inchawk naw a. An kuoma hin min zawr ding an
neihai an siekhawm lem a nih. Chuonghai chu commission (a hlawk) hmuin, an siemsuok 
um thaklo anthawkin a siemtuhai nekin an hausa lem tah.

Introduction-a ding chun dittawk phawt ei ta. Hu nawkah YouTube Video anthawk mihaiin 
sum an hmu dan le, nangkhawmin i hmu thei ve dan lampui hung hril ei tum ding a nih.



Post a Comment

Please Select Embedded Mode To Show The Comment System.*

Previous Post Next Post