Inrûk + Hmang = Inrûkhmang
Hmar țawng ziek kawp ding le ding naw hih ei buoi nasa tâwl ie. Mani țawng thiem naw tak hnam ni ngei ei tih. Thiem tuma thaw ei tam naw a, an dik le dik naw khawm ei ngaituo mang nawh. Tum ni inla Hmar Grammar tlawmte hi hun tawite sunga hang inchuk thei ding a nih; a reng a ram chun ka ti chuong nawh. A tlanglawn bek hi thiem a pawimaw.
Inrûk hmang: Mi inrûk sa/inrûk hnung hmang.
Inrûkhmang: A neitu hriet naw kara dan lova inrûk/lâkhmang.
Ziek kawp zie ding țhenkhat: Lâkhmang, siehmang, keikhâwm, lâkkhâwm, hûikhâwm, remkhâwm, dâwlkhâwm; Ngaituona ei nei pha deu ka beisei.
Thil pakhat nâwk....... Zani lai khan mi pakhatin ruo a sûr rawn leiin khawlaidungah "tui an ting" ti thu a post a. Ka ngaidân chun mi țhenkhat uminhnel thaw a ni awm de aw ka ti a....... ka buoi vieu. "Ting" ti le "Tling/intling" ti hi a umzie a dang dai a nih. Tui inting/ an ting a um chun tum réng leia thawtu a um ding a nih.Tui intling/ an tling ruok chun a san dang dang, khuorél (natural) lei dâm; mihriem kuthnung lei khawm ni sien, tum rêng lei ni lo a nih.
'Sa' hang thlûr nâwk ei tih. . . Hmar țawnga 'sa' ti hi sapțawng le enmil ding chun kâwk chi tum tum a nei thei. Chuonghai chuh:-
1) Sa = Meat. 2) Sa = Thick, dense.
3) Sa = Even though, despite, even if.
4. Sa = Heat, hot, etc. . .
A ziek dân chu hiengang hin a fie zo tak: 1) Ieng sa mana i hme? => Bâwngsa ka hme. (Bawng+sa=Bawngsa) ¤ 2) I ke a sa de! ¤ 3) Thaw naw rawh ka ti sa che'n i thaw a, i tlûk pha ta kha! 4) Vawisun chu ka pang a sa deu a nih.
¤ Ei inchûkna dinga țha: * Ka thawsuok sa, sa hme naw ti nih; i thaw sa ka fâk bîk nawh.
Tags
Hmar Grammar