HMAR HNAM HUMHALNA KAWNGAH- MANI KEA NGIR

Gospel Songate

Hmar Students' Association, Hmar Youth Association le Hmar Women Association hai hi Hmar hnam sunga pawl lien, Hmar Inpui  hnuoia mi an nih. Hieng pawlhai hin tuta ei fe dan kalphung hi maksanin, ei culture humhalna le suklarna tieng thapui ei thaw a ngai tah. Ei thiltum tak chu Hmar hnam hmasawnna a nih ti ei hriet, amiruokchu, ei la thaw tawk naw a, hi neka nasa lemin ei tum phawt chun la thaw thei ding a nih. 

Ei trawng sukvulna ding hi mitin mawphurna a nih ti chu ei pawm thlap a. Amiruokchu, thil hrim hrim mipui kutah ei sie chun a tlo ngai naw a, a bo vat hlak. Chulei chun, Hmar hnam thil le a humhalna hi ei hnam sunga a khawsathei deu le a neinung deuhaiin ta neia an nei naw chun boral hi ei hla ta naw hle'n ka hriet. Ei Culture le Literature tieng khawm, society chu ei um fir fer ve a. Amiruokchu, hma ei sawn thei naw hle nih. Thruoitu demna tieng ni loin, Hmar Culture bik enkawltu pawl ei um si chun ei culture sukhmasawnna ding hi thaw ve bawk hai sien chu nuom a um. An um nawh ti dinga laklaw chu a nih tak. Chuong ang bawkin Literature tieng khawm, hi neka nasa deu meta ei insan mar chu a ngai a nih. Ei hril ta angin, mitin mawphurnaah innghat thei a ni nawh hieng thil hi. A bawngek sir hmasahai hin hmangaina tak taka enkawlna sin ei thaw a pawimaw hle nih.

Hmar mipui hi vawi khat te khawm ka la dem nuom ve naw a. Tipaimukh mipuiin election sum an fak nasa, an ti khawmin ka dem nuom ve nawh. "An fak nawh" ka ti naw a, fa lo dinga siem theitu chu thruoituhai tho an nih. Hril sei naw manih, hril ding a tam ding a nih.

Hmar hnam sunga tlawmngaipawl po po hin kum thupuiah "Hmar Hnam Humhal" hmang inla. Thupuia ei nei sung hin Trawng, Zierang, Hla, Nunphung le Khawtlang Nunah hma ei sawn theina dingin hma la thei tah inla nuom a um.

Tiena tlanga inthawk tah "Thilthra Thaw, Tlawmngaina, Nundan Mawi" ti zing zing khawm hi ngaiin ei nei tah. Chun, "Sinin, Hrilin, Sanin, Thruoiin - Serve The Nation" amanih, "Our Land, Our Treasured Jewel" ti hai khawm ei put sawt thawkhat tah.   Ei trobul thuring (founding motto) an nih ti innghil loin, ei tha thona ding khawmin thumal dang deu hang nei hlak inla. Chu chun term khat sunga thruoituhai ta dingin GOAL (thiltum) peng a ta. Chu GOAL sukpuitlingna dingin OBJECTIVE induongin, thruoituhai chu thaw ding neisain mawphurna an lak ding a nih.

Hnam sunga pawl tin hin election le assembly ei hang nei hlak a. Ei sum seng ngaituoin ei thurelhai hi a ropui hran nawh. General Assembly'n kum thupui siem nghal sien, a sukpuitlingna ding OBJECTIVE induong nghal bawk sien. Chu zoah term nawka thruoitu ding thlangna ei hung nei a. Thlang thara umhai chun GOAL, AIM, OBJECTIVE neisa thlapin mawphurna an hung lak ding a nih. 

Ei kalphung hi siemrem ngai chu a tam tah. Ei inthruoi dan a thring ta leiin ei hnamin thil thar a hmu thei ta nawh. Hmar Inpui inzaum tak hin kum 2010 a'nthawk khan hrilfakum khawm hmalakna a nei i hriet am??  Kum 2010 a'nthawk khan H.S.A. hin hnam ta dingin lungdaw a nei i hriet am? Hmar Art & Culture/ Hmar Literature Society hin thingpui khaia lawmthu hang hril khawp meu hmalakna a nei am?? A fe chu ei fe det det tawl a, hmasawnna ei ti tak hi chu a um ta nawh. 

Hmar hnam sunga pawl tin hin mani kea ngir thei dingin tuta inthawka kum 2 sung hin sukpuitling ding plan siem tum ei tiu. Ka tina ki chu sum le pai inenkawlna tieng bik a nih. Hmun le ram nei khawm ei um nel nuol. Hieng ei nei sun sunhai hi sukpung tumin a kawng le lam hriehai rawn ei tiu. Pawl thil, hmun le hmanghai sukchereu loin, mani kea ei ngir theina dingin a sukpung dan ding hi zawng mawl ei tiu.

Entirna mei mei hang hril inla: H.Y.A. thruoitu remhrie deu lo nei ni inla chu Hmarin ei delna hmun, thingrai thatna hmunah thingrai huon kum 1990 bawr lai khan lo siem hai sien chu, vawisun thil chite thaw dingin bawm (donation box) siem vet naw mei nih.   

"Mr. X, kum 2017 a Hmar pawl pakhat President chun Harangjao hmunah lo tin 10 hmun inchawin thingrai a phunpui a. A hmun lienzawng le thil pawimaw (data) po po chu a zieka siein, mi po po hmu thei dingin internet haiah chatuona bo ta lo dingin upload -in. Thingrai kung 3000 an phun hi  a sukfai mawphurna Buonzawl khuo dande niin. Kum 2025  General Assembly ah zawr dan ding ngaituo ning a tih. Chu hma po chu kung khat khawm tukhawma tukthlu theina permit nei naw nih."

Hieng ang hmalakna hang hmu inla chu aw.......   A liem ta chu insira ngaituo zui loin, kum 2018 bekah hiengang ngaituo mawlmang tak khawm ni sien, Hmar hnam sunga pawl, a thaw hmasatak chu mani kea ngir hmasatak dinga hmathruoitu ni ngei a tih. 

Kam sehlek