Tulai khawvela motor manto le mi po po inhnar le dit Lamborghini hi ei hriet deu fur awm. A'n dintu le a siemtu chanchin hin ngaiven a hlaw lem naw a, a car siemsuok ruok chu khawvela a'n lartak ti inla suol kher naw nih. Tuta trum hin Ferruccio Lamborghini chanchin le a hlawtlingna thuruk hung ziek ei tum a, tiemtuhai khawmin ngaituona thar ei nei pha thei ngei ei beisei.
Lamborghini Company
Kum 1963 khan Lamborghini company hi Ferruccio Lamborghini chun a hung indin a. A thiltum tak chu car siemtu inlar le mi po po ringzo Ferrari chunga um a, car siemna (automaking) kawngah khawvela a ropui tak ni a tum a nih. Kum 1965 bawr vel chun an car siem hmasatak chu insuo a ni a, khawvel mihriem lai chu a tla na ngang el! A piengphung, hmel, a khawl le a iengkim chun mit a lak bek bek a. Chu bakah, chuong inhawi tak dingin an lang leiin mihai ngaiven a hung ni nghal a nih. Tuta an ropuina ni zing sports car chu kum 1966 khan an hung lutchil nawk a. An sports car hmasatak Miura Sports Coupe, 1966 a an siem chun Ferrari hlutna nasa takin a hung sukhnuoi tah a nih.
Lamborghini hringnun hmasatieng
April 28, 1916 chun Ferruccio Elio Arturo Lamborghini chu a pieng a. A nu le pa hi loneitu ve el an nih. Amiruokchu, Lamborghini hin a nu le pa anga leihnuoi inleta fakzawng a tum awzawng nawh. Chu nekin, mechanics thila iemani tak siemsuok a nuom a. A pa lo neina tieng chun inhnik hran naw sien khawm, tractor khal le enkawl a nuom tho leiin iemani chen a'n hmang a. Hieng huna hin tractor khawl le a siemna kawngah hrietna a hmusuok rawn hle a nih. A hnungah an hnikna tuia inhlieu dingin technical school Bologna-ah a lut. World War II lai khan Italian Air Force ah thrangin, transport tieng a thawk a. Kum 1944 lai khan British Military Force ah intang (prisoner) vein, hi hmuna hin mortor tieng sin a nuom thu ni chuong loin an inthawtir a. Amiruokchu, Lamborghini inhnikna tak a ni leiin a ruk tak chun a tha a fan vieu. Hi taka inthawk hin motor sie siem le a enkawl dan chun namenloin a hung thiem tah a nih. A ta dingin “Sukrinuma ka um hi malsawmna a nih” ti chu a hung indik tah.
World War II zo
Indo a hung tawp chun ama khawm in tieng a kir thei ta a. World War II laia khawl (engine) le mechanics thil an hmanghai chu a lakkhawm a. Chuonghai chu loneituhai hmang dingin tractor siemnan a hmang pei a nih. Hi taka inthawk hin Lamborghini chun bul a tan a. A tractor siemna hi indopui II hun laia khawl hluihai a'nthawk niin, an company hawng lawma (inauguration) khawm garage (motor siena) kawta nei mei mei an nih. An tractor siem chu loneituhaiin an dit bek bek a, an umna chun a dawl zo lo khawpin dawrtu (customer) an hung pung a. Chuongchun, hmun lien lemah an insawn hiel a nih.
Ferrari le an intawngna
Hieng hun lai hin Lamborghini khawmin a car dit a hril nikhuoah “Ferrari” a ti ve a. A company a hung hlawtling chun khawvela car manto tak Ferrari chu an chawk ve a. Amiruokchu, Ferrari car chun a duthu a sam tak tak thei naw a. Bak neiin a hriet leiin Ferrari neitu Enzo Ferrari kuomah thurawn (suggestions) thenkhat a pek a. A bik takin luxurious car Ferraris chu a thra lema an siem dan ding a zuk hril a nih. Ferrari chun tractor siemtu thurawn chu a lo engto naw khawp el a. Chu nekin trawngbau nakhei a la nei khum lem a. Lamborghini chun Ferrari trawngbau (comments) chu an diknaw nih ti finfie a tum ta a. Ferrari sports car neka thra siem chu a thiltum a ni tah. Ferrari’n thra takin a thurawn kha lo la sien chu vawisuna an elpui tak Lamborghini hi sports car khawvelah hriet ni kher naw nih.
An bul tanna a hmasa tieng khan ei hril zuoi ta a. Kum 1964 khan Lamborghini 350 GT an siem a. Ferrari chu a khum chieng hle nih. Chuongchun 1965, 1966 ah an hung siem pei a. Kum 1966 a'nthawkin Lamborghini kutsuok po po chu Spanish bawngchal insuol huoi chithla hming (bull-fight breeding) hieng Murcielago le Gallardo hming chawiin an sak a. Car brand pakhat ruok chu Lamborghini Countach an ti ve thung. ‘Countach’ ti chu thra le mawi tak, mit la em em hrilna, Italian trawng a nih. Lomborghini-a thawktu pakhat chun an car siem zo a zuk hmu hlim chun inring takin ‘Countach’ a ti a. Chu zar chun a hming a hung put a nih.
A hringnun tawpna
Kum 1974 khan La Fiorita, Trasimeno dil kam, Castiglione del Lago , Central Italy hmunah a chawl hadam tan a. A hung suokna angin thlaiching (farming), sapel (hunting) le ama hming lieu lieua zu (wine) siem tieng a thaw a. A company hai chu an fe pangngaia an fe zing lain ama chun hadam taka a hun tawp tieng hmang a nuom a. Chuongchun, kawng iengkimah a khaipa ni zing si’n golf (inkhelna chikhat) khelna hmun dam siemin hun thawveng a hmang a nih.
Kum 76 mi niin February 20, 1993 khan Silvestrini Hospital, Perugia hmunah lungphuchawl (heart attack) leiin thlafam muol a lo liem tah. Monumental Cemetery, Certosa di Bologna hmunah a ruong inzal a nih.
~ Gospel Songate
~ Gospel Songate
Tags
Thusep (Article)