Siempui Pa Lungril Hminna Ding

Khuo chu nuomzawng thuomlum inbel thei tawkin a dei hlar a. Kawrchung inthli hieu te chun Lientlangpui kawttuol ka pen thla hnek hnek a. Hi zan hin chuh zakthupna ding ruol thruoi ka tum nawh, mani ning ninga beiseina va tlak ka tum lungril. Ama nu mi sang dan ding ka engto lem naw a, a bula hang chettlak dan ding mawlh chu nih buthleng hmuna inthawka ka lung kamtu.

An rûnsang chu mautrang rá vanglaia saiva fûnkhawm  ang rau chun a Lûn a. Inzakna le zakmáwkna chu, Siempui ngaimel tlattu lungrilah chun an kawtkai chen chun an lan suol ta fan a. Pahni inbuon chu pahni hrat thei hek lo; a tawpah zakmáwkna chu dingchangin, sekawtrawl ka kán zo ta dér el.

"Siempui a um maw?" ka ti le tap saka mit meng, mi lo hawphur zet zet hmel ka zuk hmu a. Zakmaw ta sa sa, ka hnungtawl tum awzáwng nawh. Tapphelah chun inchawngpa ruoi kîl ni awm fahran hin lu a'n tung fir a. Phalbi zan, mani lumna khawp hák intak hun lai tak ni sien khawm, meilum bél el lovin ka thrung fál bîk a. Inzakna le dei ti infáwmin ka khûp chu an indektuo zau zau a. 

Siempui chun, "U Thang, I hung léng khiet de!" tiin báu a hung phawng a. Dik tak chun, ka lungrila a lienzie hrie ni sien, "I va hung léng ngai naw de" mi ti lem ding khah. 

Siempui hi hmelthra tia hang hril tlawr hluom ding chun a ni chie si naw a; a mi hne rûk rieu si. Vawi tam lo inthlawp tah ni inlang khawm, sungpuinu ding tak chun ka la biekthlek ngai naw a. A hawiher le nungchang ruok chu a nu-le-pa ti lo chu a hre sei tak ni ngei ka tih.

A hawiháwm lei chun an ina léng taphawt chu zan hni inzawm naw an um nawh. Chuleiin, mikhuol zan khat riek ding chauhai chu kan khuo tlangvalhaiin an léngpui ngai nawh.

Chuonga meilum khawm áwi phák lova khawlbing lungril put hmel taka ka thrung chu Siempui chun a mi hung pan a. Tap saka thrunghai a hungsan kha ka zuk insie sáng vang vang hle. 

Kan khuoah chu sawrkar sin a um ve naw a, a thawktu "kámding" khawm an um hliek nawh.  Bu trin 347 ka thlosuok a. SDO ni ka tum naw a, BDO khawm ka'n hnar hliek nawh. Kan khuoah BDO a hung cháng khawm ké thoin a hung. Incháwk ding a um chuong naw a, India hnampa lim nei nekin ankhapui umna hriet a pawimaw lem a. Thing trawl umna hrie lem chu nunghakin an zui nuom vieu. 

Chuleiin, thing ka át thiem ta bawk a, ka la dama tum ka nei ding a ni chun Siempui  a sîra zan tina zal thei dinga  kher thlûk chu a nih ka inchûklaibu chuh.

Ka sîrah chun Siempui chu a thrung ta ran el. Zuk  hril hmasa ding tak hre lovin ka to dep a. Ama ma chun, "a dei vei leh lai hin in thrung bîk a," tiin a mi hung dáiphawr a. Hi lai kil khata thrung fálna san ka nei ti ruok chu, hi nunghak hawiháwm zet hin a hriet hmai ka ring nawh.

Vawizan chu ka dit thu kam hni khat chauh hril hrám ka nuom leia insukpachanga, dei tuora sazukchal ram tla ka thaw hi, ka thawsuol nawh ti chu ka hung hriet pei a. Lawm ding ka ni ruolin, chu hunthra chu bawpel duoi thei ka nizie le, khuonu samsui ti thei dinga truon rang hun lai tak a nih.

Inléng tam tak karah, ka bulah a thrung sawt naw ding ti chu ka hrietchieng leiin, ka baua inthawk ri a suok a ni chun, thu déngkháwng nei tak, "chia saw hmangaina thrang" an ti ang kha insuo ka tum rû hle.

"Ni e, hi laia thrung chu a lum huntawk naw ngei. Khuo khat hmelthra Thrasiempui (Siempui) kuomah hin, suon tam tak la hung suok theina ding thu thlungpui ka nuom tlat si a," ka hei ti a. 

Tapsaka thrung threnkhat chun ná an hung sit deu ka ring leiin, ka trawng inring nuom nawh. Tlangval 7 lai hin, 2 chun Siempui hi an hmutai vein ka hriet a. A dang chu kohran hmunkhat le beisei nei hran loa zan intáwi ve el an ni hmel.

Ka thu hril chu a umzie a hriet ni ngei a tih, ka baua thu dang suok a ngaichâng a. Thralai inkhawm zana dang innal zet hlak kha, hril ding ka chatlak chu a ni zing el!

Chuonglai chun, inléng danghai chu mi ditsak ni áwm fahranin suok an tum a. A thu hrimah, Siempui ngaizawng ding áwm hrie khawm kan um táwl nawh, tláng titi vélah khawm hrilsep a la um ngai bawk naw a. Hmabák éng inti deua léng chu kan ni tawl seng a, zan khat hang thrung muong bîk lang khawm, ieng tak ka ang an ring bîk naw khawm a ni thei ve tho. 

"Ratlan bul hnaia nunghak um hi chu ei vangduoi ie, nu le nau in hnungin mani se se muol hranah in t'a, in suok nawk duolin, mangthra khawm la'n phur naw phawt ka cheu, Mi-uhaiin inphur lem raw hai se cheu," tiin a hei fiemzui a. Innui dar darin an suok diel diel a.

Tuol kawt chu hung keikhár nghalin, mi dang hung léng ding kan huphur pahni khawm niin a'n lang. Chu bakah, khuo a dei a, inhawng heu huouna thu a um chuong nawh.

Chuonga an mi hang trinsan rap el chu, thlarau thilthaw khawm a ang hiel el!  Ka lawm luot chun tlan vang vanga khang val lenghai khah lawmthu va la hril tawl ka nuom rum rum el.

Siempui chun tap bul a pan a, thukah chun thingnawi a thun mawl mawl, "U Thanga, hung insawn phei rawh, dei ti táng i tih," a mung ti a. Ka rin naw chieng kher el. Tapphel hmun ruok lien tak chu hmu threlin, pal thila a mi nawt thawi ding reng reng chun ka hei inbengkai thawr a.

Ketli chu thuk chungah a hlángkai a, thingpuisen min dáwn a tum a ni hmel. 

Kei chun ka hmabák sunzawm kha ka ngaipawimaw tak.

"Siempui, khuo khata um ei n'a, i chanchin hi hril sap ngai lovin ka hriet a. I nungchang le hawiher hi vawi zana hi lai hmunah mi sietu a nih."

"Zan tin inléng tam tak i nei a, chu sa khawm chun hming hlieuna i la nei der naw hi, kei a'nthawka suok suon la um dinghai in chûktirtu dingin ka dit bék bék el che nih."

"Nunghak hmelthra le inchei nal tak tak chu um an tih, amiruokchu nang anga thratna le mawina kawl kawp hi an um nawh. Duthu sám ding khawm ni lang, i hming bák sám ding ka hriet nawh. Nang leh chun hringnun hi a va mawi awm de aw....."

"Thu tam inzawt leia i hmangaina le ditsakna hnebán el ding a ni nawh ti ka hriet a. Mi lungril nghet le paukhau tak, a thlém zawnga thlém thlûk chi ni lo i nih ti hi ka hmu fie vieu bawk. Ka bau thiemin a tlin ngang naw khawmin, ka hawiher le chetzie hi i hmu a, i ringhla ka ring nawh. Chu chuh fiena dingin a huntawk nawh i ti chun, ka mit en la, "I ti tak tak nawh" i ti thei chun lungawi takin inkieng lem ka tih. Hmangaina ang zawnga hang hril ding chun, tuta ka um dan hi ka la tuok ngai lo thil a ni a, ka hrilfie thiem nawh. Aa..... khuo sik tum khawm ka hawi ie kei hih, ka pangin a mi hmet seu suou el," ka hei ti nawk trál a.

Siempui chun, "Ringhla ding ieng khawm ka hmu naw che. Vawi zan hun hi ei vawi khat inhmuna khawm a ni ta naw a, khawtlang siet le thrat trumahai ei lo inzui ve rawp a, i hriet tho ka ring, nu le pa tam takin nang a ang, tlangval taima le inrim hi an nau nunghakhai enkawltu dingin an inhnar seng annawm. Ka nu lem chun, "Thanga hai ang hi pasal tlák an nih," a ti rawp che a. Hieng thu hi la hril thrak naw inla khawm, nunghak pangngai, pasal la nei tum ta ding chun hmu threl ruol chu ni lo che a," a hung ti dam riem a.

"Anachu......"

"Iem Siempui?"

"In hnu tah!"

"Thu umzie iem a n'a?"

"Ningani zan khan kan Pastor-pa'n kan upahai palaiin a hung tir a. Ka pa'n rem nawna a um naw thu le, inbiek nawk huna sukfel dingin palaihai a lo intrin ta a," a hei ti zet chun hamhaiin val ka bing mup el.

Siempui trawngbau chun ka thapui a sat zo tah. Kha chen vawi tam tak ruol inzuiin kan lo inzui a, ieng leia hi thu hih vawi zana hril chauh am ka nih? ti ngawt chun a mi sun. 

Ráwl ináwt ruoiin, "Nang i dam a, kei ka la dam a, i trawngbau hmasahai kha i ti mei mei a ni naw chun, innei khawm in la ni naw a, palai a hung tir ve el a n'a, i nuom chun ka mitthli hi i hrûkhul thei awm ém," ka ti nawk hram a.

"Ka pa'n palai hung chungchangah ka nuom le nuom naw thu a mi la biekrawn naw a. A mi ráwn pha leh ka dawn dán ding mawikhai deu, ka pa lungril hnena ding i hung ngaituo thei chun, ruolthra ei nina le, ei kára hmangaina insiem mék hih a damkhawsuok ka beisei. Chu bák chu zuk hril rak ding khawm ka hriet nawh. Ruol inpawlin ei inpawl a, hieng thu hih i la hril ngai si naw leiin vawizan chu ka sa mupin ka hriet."

"Kan harsatzie i hriet a, ka ta dingin beisei ngam ding chi i ni lém. Tuhin ka khawsak a zieum ve chau a ni si a. Hausakna hnawt i ni ringna nei naw lang khawm, ngirhmun peleu laklaw hin chu huoisenna khawmin a mi trinsan ve bawk si a."

U Thang, "Vawisun hun i hmu theina lungril kha annawm ruolthraa ka siemna san che. Tlangval tlawmngai le detindo tak i nina hi pawisaa inchawk thei ding ni reng reng lo a." 

"Ieng po hril khawmin i pa chu thutawp siemtu a ni tho si. Pasal ka nina anga ka thaw ding chu i lung tizawng a ni chun hlen vawng ka'n huom," ka hei ti nawk a. Siempui ka chang ding a ni phawt chun inruk el khawm chu thra dingin ka ring.

Hi zan zet hi lawmna ding am trapna ding, ti chu ruottu Pathien thu a nih. Siempui chu ka trin san ta a. A pa lungril hne theina ding chu ieng thu'm ni táng a ti aw.....?

Ka beiseina tawp chu "INRUK"!


(Thlalak inhme deu hlek hmang ding a vang hlak leiin, hni hran ngai lo ka ta ka hung hmang el hlak a nih)