EDUCATION CAMPAIGN HLAWTLING TAKA HMANG A NIH - HSA BARAK VALLEY JHQ

EDUCATION CAMPAIGN HLAWTLING TAKA HMANG A NIH

July 20th, 2018/Dolakhal: Vawisun khan H.S.A. Barak Valley JHQ hmalaknain “Let us make our life easier through education” ti thupuia hmangin kum 2018 Education/Career Campaign hawngna Dolakhal khuoah nei a nih. Hi huna hin Dolakhal le a sevel khuohai anthawk Hmar inchuklai le nu le pa tam tak fekhawmin, program hlawk taka hmang a nih. 

Fiel bik thupui hriltu Pu James A Songate le Tv. Gospel Songate hai anthawk Dan-le-Hrai le sin zawngna kawnga inchuklaihai hriet ding pawimaw tam tak ngaithlak a nih.

Pu James A Songate chun, dan-le-dun hriet naw taluo hin ei tuor lo ding ding ei tuok hlak thu a hril a. Khawtlang thuoitu mawphurna, dan-le-dun kengkawtu Police thaw thei chin, Court chanpuol le thil suksuoltu le a tuortuhai thaw ding le hriet ding thu bengvar thlak tak tak a hril. 

Inchukna tieng thlurin, Tv. Gospel Songate chun, Hmar khuo tlangram le hmun kilkhawra khawm pawl 10 le 12 passed tam tak ei um a. Degree course inchuk suok ruok chu nasa takin ei kiem thu a hril. Hieng pawl 10 le 12 passed-hai ta dinga central le state sawrkar hnuoia kum tina sinruok tlangpuihai a suklang a. Inchukna insang tak nein aw khawma fak zawngna khawpa thiemna bik (skills) nei ding chun Industrial Training Institute (ITI) hnuoia Trade/Course tam tak um hi, hla tak tlung phak nawhai ta dinga ngaiven a tul thu le khawthlir (scope) a nei thu a hril bawk. Hienghai baka hin fishery, veterinary, sericulture le  diploma course hai, kum khat chau training nei a, mi dang inchupui theilo sinruok hluosip thei dinga ei lekha inchuk dan kalphung sukdanglam a hun thu a  hril bawk.

H.S.A. Dolakhal unit chun hi program hi hnesaw takin an tlung (host) a. Fak le dawn, thilpek le program hawihawm taka an cheibawl leiin Barak Valley JHQ chun lawmum a ti takzet.

Education Campaign hi Kumba, Muoltluong le Hmarkhawliena nei nawk dinga riruong a ni a. October 2018 sunga zo fel tum a nih. Khuo dang thenkhatah a remchang ang peiin nei tum a ni bawk.

Reported by: Publicity Dept., Barak Valley H.S.A. JHQ

(James A Songate, Bieklien Keivom, Gospel Songate, Lalmalsawm Thiek)

Dolakhal, Cachar, Assam