Mizoram sawrkar le HPC(D) chun inremna an ziek angin, April ni 13 2018 khan Central Training Institute, Sesawng-ah ralthuom chi hrang hrang 46 le a mu 2,892 lai zet an intung. Mizoram sawrkar kutah hin HPC(D) mi-le-sa an hotuhai leh mi 114 an inpe bawk. HPC(D) inpehai hin Rehabilitation Package 3 Lakh seng an hmu ding a nih. Chun ralthuom man sawrkar rate hisapin nuoi 7 vel an hmu bawk.
April 2, 2018 kham Hmar Helpawl HPC(D) Zosangber thuoi le Mizoram sawrkar chun Memorandum of Settlement (MoS) an ziek a. Chu dungzuia chu inpe an nih.
Hmar helpawlhai inpek huna hin Mizoram sawrkar chun iengkhawm an inremna hi Assembly Act in a la pass naw a. Pawl pahnihai hi inringtawk tak puma inbie an ni angin, HPC(D) chun Mizoram sawrkar hi Pathien ringa an ring el niin an lang a. Mizoram sawrkar hin election hmangruo el ni lova, a tak taka Hmar helpawl le an inremna hi a sukpuitling ngei nuom a um.
Hienglai zing hin, HPC(D) President Lalhmingthang Sanate pawl chun an thil phut pangngai an la phut zing a. Indian Constitution hnuoia 6th Schedule naw chu pawm an tum hri naw nih.
Mizoram Home Minister R. Lalzirliana chun inremna siem hnunga buoina um hrim hrim chu indawi lova tukdawl pei an ni ding thu a hrillawk nghe nghe a. Lalhmingthang a pawlhai hi an um trawk trawk el ring a um chuong naw leiin, inremna um hnung hin thisen luong ta naw nih ti ngam a um nawh.
Iengkhawm chu ni sien, Hmar hnam damna tak tak hi phuokchawp council hnuoiah a um beisei a um hran naw a. Hmar hnam zalenna ding le a ngirsuokna ding chu a lan kho hle ding a nih. Tuta dama umhai hin thapui suoa ei nawr ta naw khawmin, thrang la hung tharhai chun hi neka ngirhmun insang hi la hung suol suok tum ngei an tih ti ka ring nghet bur a. Tu hria ding chun, hieng bang hi ei tlin hri naw niin an lang.
Tags
HNAM RO