Assam sawrkar chun Assam pumpui inpumkhatna ding le, Brahmaputra Valley chau ni loin, Barak Valley khawm India ramhai kal pen ruola hma a sawn theina ding ti beiseiin Namami Barak (Festival) a hung buotsai a. Kum 2017 kumbul tieng March ni 31 - April 4 sung khan Namami Brahmaputra an lo buoitsai ta bawk.
Namami Barak hi November 18-20 sung khan nei a ni a. A hunpui tak chu Silchar, Cachar hmuna nei a nih. Hi hun hi Barak Valley a ding chun mipui pungkhawm tamna tak ni ding ngai a nih. Kei khawm phur taluo rak loin, thil um zen zen lo a ni leiin a tawp zan ka va sim ve a. Mipui tam taluo leiin kan lut nuomna lut el thei loin kan uma. A tawpah darkar 1 lai intlar hnungin Namami Museum kan lut ve thei a. Chawp le chila huoihawt ni sien khawm tribal hnamhai thil chu a kim vieu el.
Hi experience hi tawite chau zuk ziek ka nuom a. Thlalak ringawt sietha nekin ka lungrila inlang thenkhat el bakah, Hmarkhawlien HYA President (November 2017) kuomah indirect deua ka lawmthu ka zuk hrilna ni bawk raw seh.
Barak Valley-a ding chun India sawrkar le a bik takin, Assam sawrkar, tuta Sarbananda Sonowal keihruoi BJP hin Barak mihai ta dinga hmalakna an nei tumhai an hung sawpsuok a ni deu tak. Hi festival hi Cachar district el ni loin, Barak Valley po po a huom a, a mipuihai khawm an phur tawl hle niin an lang.
Hi huna hin hnma tum tumhaiin an hnam zierang seng pholangna an nei a. Hmar hnam bika dingin Hmarkhawlien HYA chun mawphurna a lak a. Hi thila hin Hmarkhawlien HYA President inpak a um tak zet. Mawphurna a hlenpui el ni loin, duthusamin an thawsuok niin ka hriet.
Hnam lam mawi tak an inentir thei kha hnamdanghai lakah ei lo uongpui vieu a. Hmar hnam lam hi a mawi tak a nih ei ti nuom hiel. Chun, Namami Museum sungah a hmasatakah Hmar hnam thilhai pholang a ni kha lawmum ka ti nawkzuol. Museum kantu mipuihai hmu hmasatak chu Hmar hnam zierang kha a nih. Tuola intlarhai khawmin an zuk hmu zing thei a. A sung lut hmaa an zuk hriet chu Hmar hnampuonhai kha a nih.
Chu el khelah, "Hmar Community" ti lien le fie tawk takin tar a ni a. Entuhai ta dingin a neitu hriet a awlsam a. Kha tuma ding chun "No. 1" ka ti naw thei nawh.
Ei hnam thuomhai khawm a kim thawkhat a. Mipui sabutin an zuk hmu thei ding chun a kim hlein ka hriet. Hmalatuhai inpak an umin, an inrimna a thlawn nawh ti kha ei hriet nuom a um.
Namami Barak hin Barak Valley a ding State Museum a hringsuok hmel a. Silchar khawpui ngeiah Barak Valley State Museum a la um ring a um. Chu huna chun ei Hmar hnam ro thilhai kim taka sie tum ei tiu a. A lakkhawmna tieng khawm HYA le pawl tum tumhaiin ei lo thaw zing thang a tih.
Namami Barak Museum a Hmar Hnam Thilhai:
Tags
Thusep (Article)