Jubilee lawm hi ei ching tlanglawn tak hunpui pakhat a ni ve a. Threnkhat ngaia ding chun a hlutna khawm a um kher naw thei. Pawl amanih, kohran, khuo le mimal angin hun inser bik ding hi a lo um ve bawk hlak a. Mimala ding chun kum tina piengcham puithu taka lawm ei tam a. Hrisel naw zing puma ni khat hei chuongkai khawm, ngun taka ngaituo chun ni tin el hi lawm phu hlie hlie vawng a nih. Chuong ang chun, Pawl, kohran le a khuo ang khawm ni sien, kum 25 dan peia bek hin chu a sunga chenghai ta ding chun makmawa lawm chi a nih. Hmar Students’ Association, Silchar Branch khawm chatlak loa kum 25 zet tluong taka a hang fe thei hi, inri dur dura lawm ei thei naw khawmin ei tlin tawka lawm hi a ni ding hrim a nih. Jubilee hmangtu, mi lawmpuitu le souvenir tiemtu po po kuomah ei lawmthu um raw seh.
Hi, thiem lei chu ni der loin ngamtlak hnawkin editor nina an min phur a. Kar khat sunga souvenir puithu ve tak siem tuma hma hang lak chu , a hmasa ding le nuhnung ding khawm thlier a harsa rak el. Ngam zawnghai an kutsuok hung dengkhawm dingin ei fiel a. Ni 2/3 sung hun ei hang pek tawl a. A threnin an hung intlin thei hram a; hung thaw ve nuom hle hun i-dai talo khawm ei bo nawh. Hei intum ding rak khawm a um chuong naw a. H.S.A. le pawl thil hi chu an hnu ta maw tia hang baw thut hlak kha ei na. Hung thang ve hman talo ditsakna ei inhlanhai po po chungah thupha ei chawi a. An nakawrah a ri a lut chara an nei ang ang sengkhawma hun intar tak puma hung sukpuitlingtuhai kuomah lawmthu ei zuk rul ni bawk sien. Chun, mihai lo thaw hlak dan angin, hi souvenir-a thanghai a bu takngiel khawm ei inrawlruk thei naw ding thuah inphalamum kan ti hle bawk.
Hnam dang inchuklai pawl chu intodel tak tak an ni tah. Eini ruok chu 1939 anthawk - General to Unit - vawisun chenin khawnkhawma insawn det det ei la ni a. Thil mawikhai tam tak lungrilin hrie sien khawm, ei sukpuitling vawng thei naw nih. Kutsuok hlu tak hung thawlawmtuhai bawk hi inchaw dinga ei hnawk nawk khawm la um thei ngai a nih. A lo ni khawmin, ei lan hrietthiem nawk pei a ngai ma ding chu a nih. A thren lem chu an thil ziek vek hung tum (sponsor) an la um cheuh bawk.
Tulai hnai bikah, ei hnam hi a khaw tieng tieng khawm zuk hmasawn metna ei neiin an lang naw a. Lekhabu ziek le insuo tieng lek lem hin chu ei hnufuol nasa. Tha sien tha naw sien, hi souvenir a sela hloa ei buotsai hi kum 2017 sunga Hmartawnga lekhabu insuo umsun tawmte laia mi ding a ni ve. Hieng tieng pang ngaituo chun nachang hriehai ta ding chun a man indawn hmasa loa inchawk pawp el ding chi a nih.
Hnam tlawm ei ni el chu thu hran, ei la hnufuol leiin zawrna tiengah ei ramri a zam hle a. Lekhabu lek lem hi chu thil zawr intak a nih. Video Album siemtu ta ding khawmin damna a tling zo naw a. A hmang tamtu Mizo tawng ei belsa nawk el hlak. Hun le tangkasum ei khawral chu inzat tho si, Mizo tawng le Hmar tawnga thilthaw hi a bazar tieng thlir chun “E Nge” ti bel hi remchang tak a ni hlak.
Hnam angin tawng hran neiin ei um ve ta laklaw si a, literature tieng hma ei sawn pei naw chun ei tawng hi la boral thei ding a ni leiin, society, organization le association um ve thrip threphai hin tha ei la thaw nasa a ngai. HLS/HSA/Art & Culture le a dang danghai hin kum khat sunga lekhabu insuoa umhai hi endikin, a thratak Award dam siem thei inla. Annawleh, lekhabu ziek tum harsatna (financial) neihai dam lampui zawngpui thei inla, ei mawng dawk met met naw dim a nih. Mimal angin publication ei la hau thei naw khawmin pawl angin subject neiin kum tin pakhat bek hang nei thei tum inla. A zieka tiem ding a tam chun a trawng khawm inleng deu ngei ngei a tih.
A tawpna taka dingin, Souvenir changtlung tak le mawikhai taka induong nuom inla khawm, hun le ni’n a mi dai ta naw leiin lungril ngaituona ei hnawt phak ta naw a. “Thaw thrak naw nekin chite thaw khawm a thra lem” tia ringna neia ei buotsai a nih ti tiemtu po po mi hrietpui ei nuom.
Hun sien, Ka Lawm Ie !
(GOSPEL SONGATE)
Editor
Tags
Ziektu Danghai