Manmohan Singh thuoi United Progressive Alliance (UPA) sawrkar chun India nauhai an lo hnienghar theina dingin DAN a siem a. Chu chuh National Food Security Act, 2013 ti a nih. Hi DAN hi Parliament chun September ni 10, 2013 khan a pawm tah.
A thiltum tak chu India ram mipuihai fakding tha pek a ni a. Phiengtam leia thina sukbo a, mipuihai damna tawk bu pek a tum.
Hi DAN hin tlangram (rural) mi 75% huom a ta, phairama (urban) umhai 50% huom bawk a tih.
Targeted Public Distribution System (TPDS) hi tum bik nei project a ni a. India mipui hmun thuma thea hmun hni (2/3) hai a bituk bik.
DAN ang chun mi pakhatin bu Kg 5 thla khatah dawng a tih. Bu hieng rice, wheat le coarse grains hai hi Rs 3, 2 le 1 in kum 3 sung sem ning a ta. Kum thum hnungah hi DAN hih sawrkarin sukdanglam thei a tih.
NDA sawrkarin kum 2000, December ni 25 a Parliament ah a lo pawm tah Antyodaya Anna Yojana (AAY) chu a fe pangngai angin fe zing a ta. Sungkuo tinin thla khatah bu Kg 35 la zing an tih. AAY bufai hi Rs 3 (rice) le Rs 2 (wheat) per Kg a nih. Chun BPL bufai hi Rs 6.5 per Kg a ni bawk.
NFSA hin nuhmei le naupang a thlur bik a. Nu naupai le naute chawmin chanpuol an nei. Nu naute chawmlai chun thla 6 sung Rs 6,000 a hmu ding. Sum hi a hlek (instalment) khawmin sawrkarin pe thei a tih.
Naupang pawl 8 chen/kum 6 anthawk kum 16 chen school-a bu siempek ding.
Inchukna school, sawrkar le khawtlangin a enkawlhai chun naupang bu an siem ding.
NFSA hi Village Authority/Council/Panchayat haiin an biel sengah vil an tih.
State le District tinah Public Grievancess Redressal Mechanism (Mipui lungawinawna ngaithlaa bawzuitu ding) um a ta. Complaint hrim hrim ni 39 sunga sukfel ding.
State-in State Food Commission (SFC) nei a tih. Chairperson le member 5 um an tih. Member-a hin nuhmei 2 um an ta, Schedule Caste le Schedule Tribe anthawk mi 1 ve ve um an tih.
Sawrkar thawktu NFSA le a keihnawia DAN bawsie amanih, ama leia buoina a um chun thla 6 chen jail intangtir thei ning a ta, a hlaw (gross salary) thla khata inthawk kum 5 chen chawi (fine) thei bawk a tih.
State Food Commission indinna ding hin state sawrkarin sum tum a ta. One time financial assistance (bul tanna) central sawrkin pe thei a tih. Hi financial assistance hi non building assests (Office in le lo bawlna/lakna ding nilo) niin, furniture, fax, printer, air-conditioner, telephone, etc inchawkna ding ning a tih. Hi bak hi central-in thangpuina pe naw nih.
National Food Security Act, 2013 hi scheme le project mei mei a ni naw a. Act (DAN) a ni leiin state sawrkar le official thenkhat lo keihek chi a ni nawh. NFSA palzuttu chu danin a tiem angin hrem thei ning a tih. Khawlai hmuna khawm bufai hi a rate insang lema zawr a thieng naw a. Kum 3 hnungah central sawrkarin thil man insang le inmilin siemtha thei a tih; chu naw chuh a sukdanglamna ding a um nawh.
Ei hril ta angin AAY chu fe zing a ta. NFSA hi a belsana ang a nih. AAY hnuoia sung tinin bufai Kg 35 an dawng zing kha sukbuoi naw nih.
India sawrkar hin ieng DAN khawm siem sien, a dawngtu nekin a semtu hlawkna ram a ni a. NFSA, 2013 hi um naw sien khawm, AAY hi a huntawk hle nih. Amiruokchu, AAY khawm zawng hawn laia mawt thlar vawr chek ang tawpin a dawngtu ding nekin politician le official haiin an chang rawn lem. AAY le NFSA hnuoia bufai hi a man thuhmun tho a nih. Mi retheihai hin Kg khat cheng ieng zatin am ei hmu ding ti chu lungril himawna a nih. Thil felhlel a um chun hma la ngam dingin hnam thuoitu, Village Authority, political party le social worker hai ei huoisen a pawimaw.
# Gospel Songate
10 June, 2016: Silchar
Tags
Chanchin Lawrkhawm